BIMBINGEN MAMRE Tgl 30 April – 6 Mei 2017

BIMBINGEN MAMRE Tgl 30 April – 6 Mei 2017

THEMA : KEPENTAREN ERGAN ASANGKEN EMAS

THEMA : Kuan-Kuanen 2 : 1 – 8; 16:16

Pdt. Maria E br Sitepu

-          Penjelasen Teks

Adi siidah zaman gundari la banci ipungkiri pendidikan nandangi anak eme hal si utama si rusur jadi perayaken orang tua nandangi anakna. Hal si enda tentuna erkiteken enterem orang tua erpengakap kepentaren eme modal si seh kal pentingna man anak guna ndalani kegeluhenna. Adi siukuri tuhu kin,

erkiteken siidah saja zaman gundari enda, kalak si sekolah saja mesera ia datken pendahin apalagi si la sekolah. Emaka pendidikan gelah pentar enda jadi perayaken. Labo sitik siidah anak-anak gundari menaken erpagi-pagi seh kari berngi la ngadi-ngadi erlajar guna tujun orang tua. Hal si enda banci siidah ibas bahan pengogennta ibas kuan-kuanen ibas

Ayat 1 ras 2

Ayat enda nuriken sura-sura orang tua man anak gelah nggit erlajar arah kai si jadi sura-sura orang tuana .

Ayat 3 ras 4

Tangkas kal kataken salomo uga perlu lit usaha si ilakoken anak guna datken si e kerina. Kata mindo, darami, sekseki janah ayakilah enda gambaren usaha lako ndatken  kepentaren e. Emakana salomo membandingken kepentaren enda bagi emas.

Bagin si enda nggo cukup man orang tua guna ngangkasa uga pentingna pendidikan man anak.

Ayat 5 ras 6

Siidah uga kepeken kepentaren enda rehna ibas Dibata nari. Asakai pe usaha si usahaken kita tapi adi palas utama eme la erkemalangen man Dibata e kerina kuakap sea-sea.

Sebab Dibata simereken pemetehras Hikmat man manusia e sendiri

Ayat 7 ras 8

Tole ka kataken salomo kepeken labo terjeng kepentaren saja ngenca si perlu idarami. Pentar pe kam tapi adi la kam benar ras bujur labo tuhu kepentaren si lit ibas kam. Enterem siidah uga enterem  kalak pentar tapi labo benar ras bujur. Dungna ia ndabuh kubas perbahanen si la ngena ate Dibata. Adi nggo bage kai kin guna kepentaren enda.

-          Aplikasi

Kepentaren adi bahasa karona tentu menarik asangken bahasa Indonesia. Bahasa karo lebih luas ntah pe mbelang pengertinna adi kepentaren enda. Kepentaren labo terjeng IQ saja tapi SQ ras EQ.

Melala orang tua lupa ras si enda, anak cenderung i push guna datken hasil si mantap ibas persekolahen, tapi lupa ia kepeken emosional ras spiritual epe perlu iperdiateken. Hal si enda tentuna gelah kepentaren si datken anakta enda labo sea-sea terjeng kognitif saja ntah pe logika tapi ibas kerina perbahanen, perukuren epe pentar ka kerina.

Emakana enda jadi tanggung jawab orang tua, perban harus siinget bagi temanta kepentaren erngan asangken emas. Ertina enda penting ras tuhu-tuhu berarti man anakta.