BIMBINGEN KHOTBAH 21 MEI 2017

BIMBINGEN KHOTBAH 21 MEI 2017

“ERTOTOLAH NGATAKEN BUJUR”

Invocatio : Roma 8 : 26

Ogen : Perbahanen Rasul-Rasul 17 : 22 - 31

Khotbah : Masmur 66 : 8 – 20

Pdt. Maria  E br Sitepu

-          Pengantar

Pernahkah siukuri ibas kegeluhennta enda, engkai maka enterem kalak si erkiniteken e menukah kal :

1.      Stress

2.      Bingung erkiteken kegeluhen

3.      Putus asa

4.      Rsdna kerina

Padahal adi siukuri sekalak si erkiniteken nggo me aturenna ia ngasup guna ndalani kerina kai pe si terjadi ibas geluhna, subuk si la bagi ukur ntah pe si bagi ukur. Erkiteken pengarapen ibas Dibata nari situhunna nggo lit ibas dirina.

Tentuna sada hal si membaingungkan maun-maun adi sinin ibas kinata kegeluhennta. tapi adi siukuri ka mulihi lanai situhunna perlu mamang ate erkiteken lit istilah “Agama KTP” ntah “Kristen KTP” ras sidebanna kerina. E ncidahken kepeken enterem ka kalak si nina “erkiniteken” situhunna labo erkiniteken tapi eragama. E 2 hal si berbeda.

Kalak beragama ras kalak erkiniteken. Adi agama cenderung kita ngerana ku masalah lembaga tapi adi kiniteken kita ngerana erkiteken kepercayaan kalak ibas paksa si e. emakana kepeken lanai siakap mamang adi enterem gundari kalak si beragama datken pinakit si situhunna banci itambari adi ia tuhu-tuhu memahami agamana.

Hal si enda pe siidah ibas bahan pengogennta

-          Perbahanen Rasul-rasul 17 : 22-31

Bagin enda nuriken uga perjumpaan rasul Paulus ras kalak i Aten. Secara umum adi kita nginget kota Aten enda tentuna teringet kita erkiteken Filsafat, demokrasi ras piga-piga pemikiran si lahir ibas kota enda. Emakana banci ikataken kota enda eme kota kalak pentar secara rasional ntah pe logika. Tapi adi siidah bas bahan pengogennta aminna pe secara logika kalak enda pentar, tapi perlu ka si bereken penghargaan man kalak I aten. Erkiteken adi nin uga mbuena patung-patung man sembahen kalak aten e situhunna cidahken uga kalak enda secara rohani cukup kuat. Aminna pe bagi bahan pengogennta enda, la ieteh kalak Aten ise kin si isembahna enda.

Emakana arah hal si enda, ituriken rasul Paulus me Juruselamat emekap Tuhan Jesus.

1. Tuhan ngkuasai kerina doni enda janah labo ringan ibas ingan sembah-sembahen manusia

Pemahaman enda membongkar pemahaman kalak Aten erkiteken patung-patung si ibahan kalak Aten enda

2. Dibata si itandai Paulus enda labo lit sikurang bas ia bahkan ia si mereken kerina keperlun manusia
3. Dibata e singaturken kegeluhennta
4. Dibata enda labo ndauh ibas kita nari
5. Kita me kesusuren Dibata
6. Kerehen Jesus si peduakaliken

Hal si enda me kerina si situhunna man kita kalak si nggo tek man bana nggo me harus ngataken bujur ibas si e kerina. Erkiteken kita nggo lit pengarapennta nggeluh ibas doni enda janah adi nggo kita mate pagi.

Adi bage emakana perlu kita ngataken bujur man Dibata arah pertotonta.

Bahan sipeduaken pe ibas

-          Masmur 66 : 8-20

Nuriken uga sekalak pemasmur ngajuk kalak kerina guna muji Dibata erkiteken perbahanen si mbelin nandangi kita kerina. Aminna pe mungkin melala siidah kejadin si terjadi ibas kegeluhennta la bagi ukur tapi nina pemasmur hal si enda kerina pengujin Dibata ngenca man kita anak-anakna si nggo datken kegeluhen situhu-tuhu. Emakana sikataken bujurlah man Dibata erkiteken kiniulinNa man kita kerina

-          Aplikasi

Minggu enda eme minggu rogate eme minggu nandangi kenangkihen Yesus Kristus ku surga. Rogate ka iartiken eme ertoto. Emakana rikutken kalender gerejanta ija ibas minggu sir eh kita bengket kubas pecan Doa GBKP, emakana ipersingetken man kita kerina gelah tetap njadiken doa eme nafas hidup kegeluhennta. janah sue ras temanta ibas minggu enda eme Ertotolah ngataken bujur. Tentu enda pengajuk man kita kerina ngawan ni perpulungen gelah pertoton labo terjeng ipake kita guna nuriken perbeben ntah pe ndarami serpang pulah ibas kiniseran tapi pertoton pe perlu ibas konteks ngataken bujur erkiteken kiniulin Dibata si nggo siidah ibas bahan pengogennta wari sisendah enda. Emakana man kita kerina ngawan ni perpulungen ngataken bujur lah man Dibata arah pertotonndu gelah tuhu-tuhu kita jadi anak-anak Dibata si ngergaken kai si nggo bereken Dibata man banta arah pengataken bujurta.