BIMBINGEN MAMRE 21 - 27 MEI 2017

BIMBINGEN MAMRE

NGANGKAI BENCANA ALAM

Keluaren 14 : 21-30; Jesaya 54 : 10

Pdt. Maria E  br Sitepu

-          Penjelasen Teks

Pemahaman erkiteken bencana enda situhunna seh kal perlu ibas doni enda khususna nandangi kalak Kristen si lit i tengah-tengah daerah bencana (Tanah Karo) hal sienda perlu gelah pemahaman kalak erkiteken bencana enda banci terbuka sitik, ula siakap bencana  enda eme hukuman Dibata nandangi manusia erkiteken adi pemahaman enda turah bas pusuhta e mengarahken pemahaman kita ku “pencarian kambing hitam”[1].

Adi hal sienda terjadi banci cedai hubungan manusia ras Dibata ras manusia ras manusia. Bencana maun-maun cara Dibata guna mperingeti manusia erkiteken dosa si ibahanna, tapi bencana enda lenga bo tentu cara guna ngukumsa kalak si erdosa.

Bas bahan pengogennta ibas pa mamrenta minggu enda, nuriken kejadin si mungkin la banci terlupaken kalak Israel ibas perdalanenna lawes ibas tanah mesir nari, eme ngepari Lawit merah. Kejadin enda adi siukuri me arah perukuren manusia tentuna hal si la mungkin banci terjadi adi la kuasa Dibata erbahanca, erkiteken adi siperdiateken bahan pengogennta ibelah Musa Laut gelah banci kalak Israel ngepari lawit merah. Hal si enda  jadi sada tanda kemahakuasaan Dibata ibas geluh bangsa Israel. Tapi si menarik jenda adi siidah eme ayat 26-28 ija lau ndai pinter mulihken ku inganna janah bangsa mesir kerina ibaba lau ndai lalit sada pe tading. Gambaren enda situhunna banci mereken pemahaman man kalak maka bencana enda tuhu-tuhu sada cara Dibata guna ngukum bangsa Mesir ibas paksa si enda.

Memang tuhu agak cukup mesera guna njelaskenca masalah si enda terkhusus mereken pemahaman man kalak kepeken hal si enda labo cara Dibata guna ngukum, tapi perlu siinget hal si enda kerina labo semata-mata guna ngukum saja, tapi ibas Yesaya 54:10 tangkas kerina si terjadi e labo engkurangi keleng ate Dibata man manusia.

-          Aplikasi

Bencana memang tuhu hal si membingungkan, tuhu enda erkiteken alam, ntah hukuman Dibata, tapi perlu ibas paksa enda si pahami kepeken maun-maun bencana ipake Allah guna mbangun solidaritas Manusia ras Dibata, manusia ras manusia. emakana perlu kuakap kesadaran nandangi kita manusia guna tetap nembah man Dibata. Gegeh manusia enda terbatas, perukurenta pe bage, melala hal i doni enda la sieteh engkai maka terjadi, tapi kita harus tetap tek lit maksud Dibata ibas si e kerina. Emakana man kam kerina mamre si mungkin sangana nanami bencana kegeluhen, rembakkenlah dirindu ras Dibata gelah reh tangkasna pengangkanndu erkiteken maksud Dibata ibas si e kerina.

---

[1] Yewangoe, Seminar Teologi Bencana, Makassar 2005