BIMBINGEN KHOTBAH 07 MEI 2017

BIMBINGEN KHOTBAH 07 MEI 2017

JUBILATE : ERSURAKLAH

THEMA : “PUJI RAS BERITAKENLAH KINIULIN TUHAN”

Invocatio : Roma 11 : 36

Ogen : Johanes 10 : 1-10

Khotbah : Jesaya 40 : 9 – 11

Pdt. Maria E br Sitepu

-          Pengantar

Puji ras beritaken, dua hal si la banci lepas ibas kegeluhen kalak si erkiniteken khususna man Kristus Jesus, erkiteken adi nggo sigejap Tuhan Yesus eme Dibatanta emakana ibas kegeluhennta harus tetap si puji ia guna cidahken rasa ‘Fans” adi bahasa Indonesia. Tentuna rusur siidah kalak adi gelarna keleng ras sekalak jelma, katawari pe adi jumpa ras kaalka ipuji-pujina lalap si ngena atena ndai.

Emakana labo tuhu adi gelarna kita keleng tapi isuruh muji Dibata mberat siakap.

Janah adi kita ngerana ka masalah beritaken, tentu ka enda jadi tanggung jawabta ka nandangi kiniteken man Tuhan Yesus. Adi kita tek Dibatanta enda maba keterkelinen janah Dibatanta enda keleng atena man jelma kerinana, emakana perlu si beritaken Tuhannta Yesus enda man kerina jelma. Aminna cara si mungkin banci si pake labo bagi cara rasul ntah pe ajar-ajar marenda, tapi arah perbahanen, pengerana ras lagu langkah e nggo banci jadi alat perberita si meriah.

Emakana rikutken tema ibas paksa enda Puji ras beritaken tentu jadi sada tanggung jawab. Tapi kai harus ipuji ras iberitaken arah Dibatanta enda ?

Tentuna kiniulin Dibata. Kiniulin si uga ?

Enterem kalak adi isungkun kai kiniulin Tuhan Yesus, tentuna hampir kerina jawabsa IA nggit mate i kayu persilang guna nebusi dosa manusia. Tapi enda kin ngenca. Ibas bahannta si pemena ibas

-          Johanes 10 : 1-10

Bagin pengogennta enda, nuriken perumpaman kerna permakan biri-biri. Perumpaman permakan biri-biri enda ipake erkiteken sue ras konteks bagepe tujun kitab Johanes enda man perpulungen s imbue kalak Jahudi. Erkiteken adi ngerana erkiteken permakan nggo lanai asing man kalak Jahudi. Arah bahan enda, Yesus cidahken keilahianNa arah 2 gambaran dirina :

1. Permakan

Tentu la banci sipungkiri salah sada dahin permakan enda njagai domba-domba. Yesus pe nuriken dirina selaku permakan, erkiteken ia pe njagai manusia selaku anak-anakna

2. Pintu

Gambaran pintu enda, situhunna cidahken 2 hal

a.       Ngerana masalah penemani Dibata

b.      Enda ngenca dalan datken keterkelinen

Emakana adi ngerana kerna masalah kiniulin Dibata nandangi kegeluhen manusia enda me salah sada uga Dibata nggit nemani ras njagai manusia. emakana hal si enda perlu ka si puji ras siberitaken.  

-          Jesaya 40 : 9-11

Bagin enda termasuk ibas bagin deutero Yesaya si nuriken kata pergegeh arah nabi Jesaya man kalak Israel si sangana ibas pembuangan i tanah babil. Janah adi siperdiateken pasal 40 eme bena-benana kalak Israel reh ku tanah pembuangan. Emakana si eteh uga situasi ras kondisi sosial, politik ras psikologis bangsa Israel si sedekah enda igelari bangsa pilihen Dibata tapi dungna datken ia persoalan si luar biasa. Tapi kepeken kiniulin Dibata man bangsa Israel la pernah keri, erkiteken adi sioge datas nari, maka siidah nabi Jesaya nuriken man bangsa Israel gelah erbahanca dalan guna Dibata si reh guna mbebasken ia ibas kerina persoalenna.

Emakana salah sada kiniulin Dibata eme ia pembebas ibas persoalan-persoalen si lit ibas kegeluhennta. tapi harus tetap siinget hal si enda banci jadi adi kita pe mpesikap dalan man Dibata.   

-          Aplikasi

Kiniulin Dibata adi siukuri situhunna lanai banci terhitung ntah pe tersibari arah perukuren manusia, erkiteken manusia terjeng ngasup ngitung kiniulin si maun-maun sue bagi kai si ukuri, tapi kepeken kai si terjadi bas geluhta enda eme kiniulin Dibata si tentuna lit rencana si mehuli ibas kegeluhennta. emakana ibas paksa enda marilah si puji ras siberitaken kiniulin Tuhan labo terjeng man dirinta man man kerina jelma gelah terpuji Tuhan ras malem ateta dalani kegeluhen enda.