BIMBINGEN MORIA 21 - 27 MEI 2017

BIMBINGEN MORIA

AJARKENLAH ANAKNDU

Kuan-Kuanen 29 : 15 – 18 

Pdt. Maria E br Sitepu

-          Penjelasen Teks

Adi ngerana kita masalah tema enda, erkiteken ngajari anak, kuakap ibas tahun enda nggo me cukup rusur tema PA Moria ngerana masalah si enda. Hal si enda situhunna cidahken dua hal :

1.      Hal si enda tuhu-tuhu penting

La banci pungkiri pendidikan man anak seh kal pentingna, erkiteken tading-tadingen si mehulina eme pendidikan. Pendidikan la bagi erta banci masap, tapi adi pendidikan ntah pe kepentaren, mate kita pagi maka lanai igejap kalak, tapi adi nggeluh denga kita, pendidikan enda tetap lit ibas kita aminna uga pe situasi ras kondisi kegeluhennta. emakana labo kurang rusur siidah uga orang tua nyekolahken anakna menaken jaw 7 pagi-pagi seh kari jam 7 karaben, janah mulih pe kurumah suruhna ka erlajar, enda perban kai ? perban ngayak pendidikan ntah pe kepintaran ndai

2.      Enterem denga moria si lenga mperdiateken pengajaren anakna

Hal si enda banci adi, erkiteken biasana sada hal si rusur siulih-ulihi erkiteken lenga tersehi ibas perdalanen enterem moria emakana iakap penting kal guna iulihi ka tole. Janah adi siidah kinata kegeluhen wanita karo khususna si nggeluh i kuta adi banci sibahan persentase, piga persen si perdiateken pengajaran man anak ? pengajaran enda labo masalah pengajaran formal ngenca ya (sekolah) tapi pengajaran informal.

Emakana ibas minggu enda moria mulihken ngerana masalah pengajaren man anak, tapi ibas konteks uga nande ntah moria banci jadiken anak-anak mandiri.

Ibas bahannta enda, si jadi bagin kata pertenget raja Salomo, siidah uga orang tua harus mereken kata ajar gelah mehuli ia, ula rusur itami-tami.

Melala ibas orang tua melala salah pengajaran erkiteken rusur itami-tamina anakna. Tami-tami labo masalah tapi lit batasan-batasan si perlu gelah anakta tumbuh jadi anak si mandiri.

Janah siidah ka tole uga ibas bagin selanjutna, kepeken sifat orang tua banci erbahan kecedan man anak. Emakana pengajaran si paling pentingna man anak eme pengajaren man dirindu lebe. Ngajari adi terjeng ngerana ise pe banci, tapi ngerana alu perbahanen e si banci mis ipahami anak-anak, gelah arah si enda malem kal ate anak-anak enda erkiteken pedah ras ajar enda erbahanca ia megegeh (mandiri) dalani wari-warina kupudi.

-          Aplikasi

Moria ras kata ajar lanai terpesirang, erkiteken selaku nande itengah jabu si mungkin melala waktuna asangken mamre, iarapken ngasup mereken kata ajar man anak, gelah perkembangan perukuren bagepe perbahanen tuhu-tuhu cidahken kalak si mandiri. Moria maun-maun lupa kepeken ngajari anak enda situhunna bagi ngajari diri, jadi ngajari anak situhunna bagi ngajari sekalak jelma saja, kai siibahanndu ntah pe silakokenndu si mehuli pasti iikuti anakndu adi la mehuli bage ka bahanna, emakana pekena lebe diri moria gelah arah si enda ngasup kita mereken pengajaren man anakta gelah anak-anakta banci jadi anak-anak si mandiri.