BIMBINGEN MORIA Tgl 30April-6 Mei 2017

BIMBINGEN MORIA Tgl 30April-6 Mei 2017

THEMA : JABU SI RATUR RAS SEHAT

BAHAN:Epesus 5 : 15 – 17, Kuan-Kuanen 31:15

Pdt. Maria E br Sitepu

-          Penjelasen Teks

Bahan pengogenta ibas paksa enda eme salah sada nasihat entah pe kata pengajuk rasul Paulus nandangi perpulungen i efesus. Tentuna nasihat enda turah erkiteken persoalen si sangana inanami perpulungen Kristen i efesus ibas paksa si e.

Perpulungen efesus eme salah sada buah karya Penginjilan rasul Paulus. Enterem kalak si tek man Yesus Kristus ibas perpulungen enda labo kalak Yahudi, emakana hal si enda me si jadi masalah si cukup berat, erkiteken nai kegeluhen perpulungen efesus sope tandaina Yesus eme nembah man dewa-dewi. Salah sada dewi si terkenal eme dewi artemis ntah dewi kesuburen.

Emakana enterem denga kalak enda si terpengaruh ibas hal si e. lenga ka adi kita ngerana tuntuntan sangkep nggeluh si lenga nandai Kristus si erbahanca kalak Kristen i Efesus enda monce-once lalap kinitekenna.

Hal si enda me adi siidah bas bahan pengogennta khususna secara garis besar ibas Efesus 5:1-20 coba ituriken Rasul Paulus man perpulungen i  efesus gelah tetap nggeluh ibas terang aminna pe melala “Gelap” si nimai ntah pe si ganggui perpulungen ibas usahana nggeluh ibas Kristus.

Khusus ibas ayat 15-17, rasul Paulus nuriken man perpulungen i efesus gelah :

1.      Ula bagi kalak motu tapi bagi kalak pentar

Nasihat enda situhunna menarik adi sihubungken ras kegeluhennta. enterem kita khususna moria adi nggo ibas situasi si la menguntungken erbahan sada keputusen si cukup sensasional. Maksudna jenda kita erban keputusen si la bagi kai si lit bas pusuhta ntah pe la sue ras kinitekennta. Emakana perlu kita bagi kalak pentar ibas kerina situasi harus tetap kita ngasup erbahan keputusen si sue ras prinsip geluhta aminna pe mungkin keputusen si enda la mis datken hasil tapi kita tetap jemak padannta.

2.      Pergunakenlah wari alu mehuli

Adi sisungkun sekalak-sekalak kita gundari, piga jam sada wari e terbuang guna dahin si la penting ? tentuna melala me. e si perlu ipahami kita ibas nggeluh enda

3.      Pergermetkenlah kai si ngena ate Tuhan

Labo kai singena atendu, erkiteken si ngena ateta biasana ntabeh benana ngenca kedungenna pagi bagi rimo pantai buaya nina enden-enden kalak karo

Janah siidah ka tole ibas bahannta si peduaken ibas kuan-kuanen 31 : 15, eme pedah man ndehara si cerdik, uga ia beluh ngaturken perdalanen jabuna 

-          Aplikasi

Ratur ras sehat, hal si jadi sura-sura kegeluhen kerina kalak, khususna kita i tengah-tengah jabunta sekalak-sekalak. Bahan pengogennta nggo cukup tangkas ngerana masalah keteraturen si perlu ilakoken kita ibas kerina situasi. Hal si enda tentuna berdampak ibas kiniulin i tengah-tengah jabu janah guna kesehaten i tengah jabu. tapi sedekah enda si terjadi enterem kita membijaksanai kerina keteraturen si nggo lit, emakana ula kita bingung adi enterem kita terganggu kesehatan, erkiteken maun-maun ketidakraturen nggeluhta enda si erbahanca. Emakana iarapken man moria selaku motor penggerak ibas jabu, harus ngasup guna tetap njagai si e kerina, gelah tuhu-tuhu kejuah-juahen ras kemalemen ate jadi sikerajangen jabuna.