BIMBINGEN KHOTBAH PEKAN DOA BERNGI SIPEMENA

BIMBINGEN KHOTBAH PEKAN DOA BERNGI SIPEMENA

                               THEMA:KUTANDAI DIBATA SI KUSEMBAH

Khotbah : Keluaren 3 : 5 – 15

-          Pengantar

Wari/berngi enda eme berngi sipemena kita ngikutken pekan doa ibas tahun 2017 enda. Tentuna sieteh kerina pecan doa enda me pekan siarapken gelah ngawan ni perpulungen mulihken nginget tanggung jawabna man Dibata bagepe reh rembakna ras Dibata. Emakana guna sie, ibas tahun enda lit sitik perbedan ibas pekan-pekan doa si nggo lewat, erkiteken ibas tahun enda,

pekan doa si biasana ilakoken kita 7 wari, ibas tahun enda ilakoken 10 wari, ija sope kita masuk kubas pekan doa bagi semalna si lakoken, sibahan lebe pra pekan doa 3 wari ibas jabunta sekalak-sekalak, gelah sope kita benget ku pekan enda, tuhu-tuhu pusuhta ras kerina jabunta nggo kerina sikap guna ngerambaken diri ras Dibata. Janah adi siperdiateken tema umum Pekan Doanta ibas tahun 2017 eme “Ertoto Ulu Gegeh Dalanken pedahNa” emakana siangka pekan doanta enda ibas tahun enda ngajuk kita gelah lit sikap si aruh dalanken kita kenca kita ertoto. Pemahaman piga-piga temannta si erpengakap kenca ertoto nggo me dung kerinana, tading Dibata nari nentukenca, ibas paksa si enda ipekena, gelah si eteh kepeken lit tanggung jawab si harus ilakoken kita kenca kita ertoto. Jadi ertoto labo erbahanca kita jadi jelma si pasif tapi jadi kalak erkiniteken si aktif.

Emakana ibas wari si pemena enda, ibaba lebe kita guna ngangkasa ise kin Dibata si man baNa saja si penangkih pertotonta. Ibas bahannta

-          Keluaren 3 : 5-15

Bagin kitab enda nuriken perjumpaan pemena Musa ras Dibata ija perjumpaan enda guna ngutus musa guna mbebasken bangsa Israel bas tanah mesir nari. Emakana tentuna sieteh uga penggejapen ntah pe pusuh Musa ibas paksa si e.

Tapi kita labo ngerana masalah sosok Musa secara khusus, tapi rikutken tema, ras pekan doannta, emakana arah bahan enda, iarapaken gelah reh mbuena penandainta nandangi Dibata si sembah kita. erkiteken adi gelarna ertoto tentuna me e hubungen pribadi manusia ras Dibata, adi misalna rajin kita ertoto tapi la sieteh ras ise si peseh pertoton enda nggo me kuakap kita salah, erkiteken mbiarna aku kari dibata si jadi tujun pertotonnta enda nggo lanai bagi Dibata si turiken ibas pustaka siBadianta tapi dibata si ibahan kita tapi sikataken Dibata.

Emakana lit piga hal si perlu ipahami kita erkiteken Dibata si nggo mereken kegeluhen man banta seh ibas paksa enda arah bahan pengogennta enda :

1. Dibata labo milih ingan, situasi, waktu, rsdna adi atena erjumpa ras manusia

Sedekah enda siakap Dibata enda sikurung bas gereja, rumahta, kamarta. Je ngenca siakap banci kita erjumpa ras Dibata, tapi arah bahan enda iingetken mulihi kita, Dibata enda labo ibatasi ruang dan waktu erkiteken ia siempuna ruang ras waktu enda.

2. Melala cara Dibata ncidahken diriNa man banta

Enda si maun-maun si la sisadari, siakap Dibata enda ncidahken diriNa arah hal-hal si mehaga, meherga ras luar biasa, tapi arah sekalak kalak musil pe Dibata banci cidahkenNa diriNa.

3. Erjumpa ntah pe ngerana Dibata harus ibas pusuh si tuhu-tuhu meciho

Maksudna jenda, adi erjumpa kita ras Dibata labo banci lit si terbuni, emakana iarapken lalit sibuni-buniken kita ibas perjumpannta ntah percakapennta ras Dibata.

4. Dibata si sisembah kita la pernah tadingkenna kita

Mungkin siakap sedekah enda Dibata si sembah kita enda eme Dibata si gundari saja ras kita, tapi harus siinget Dibatanta enda sope kita reh pe kudoni enda nggo me itemaniNa ras ijagaiNa kerina manusia termasuk keluarganta

5. Maun-maun Dibata berekenNa kita kiniseran gelah arah si e kerina reh mbagesna pengangkannta erkiteken diriNa.

Sedekah enda siakap persoalen ntah pe perbeben e penyiksaan ntah pe penindasan man banta, tapi inget perbeben enda situhunna cara Dibata guna ngajari anak-anakNa i doni enda

6. Iidah Dibata perbebennta janah ibas si e Dibata la pernah sinik ernin perbeben sir eh kubas kegeluhennta

Hal sienda me si harus iangka kerina kalak erkiniteken man Dibata. Dibata la pernah pediatNa kita menderita, Cuma maun-maun cara siipake Dibata gelah kita pulah ibas perbeben enda la bagi kai sura-suranta. Janah maun-maun pe Dibata nggo me berena dalan pulah tapi kita ka manusia si mekeng kal. La terkataken, jadi maun-maun perbeben e hasil keputusan manusia sisada.

7. Padan Dibata e rusur itepatiNa

400 tahun kurang lebih bangsa Israel i tanah mesir, tapi me isampati Dibata ka gelah ndarat mulih kutanah si nggo padanken Dibata ras nini-nini kalak Israel. Jadi Dibata tetap ingetna padanNa man bangsa Israel

8. Dibata milih kalak labo erkiteken kebiasaan jelma, tapi erkiteken Dibata milih kita.

Arah bahan pengogennta, situhunna tangkas uga musa ngerana man Dibata ise kin ia maka ngasup erbahanca perbahanen si mbelin bage. Tapi enda me Dibata, pilihanNa mungkin la terukuri kita, tapi harus siinget Dibata me si nepa kita jadi jelas Ia metehsa kita kerina

9. Dibata la pernah pediatNa kita sisada dalani wari-wari kegeluhennta enda

Tangkas kal uga Dibata ngatakenca man Musa ibas kerina si banci jadi pagi Dibata tetap nemani Musa. Hal sienda tentuna banci adi tuhu-tuhu siundang diri Dibata kubas kegeluhennta

Enda ia piga-piga hal adi kita ngerana erkiteken Dibata si isembah kita gundari. Jadi kai jadi kebiarennta nembah man baNa.

-          Aplikasi

Sedekah enda tentuna melala denga kalak si erkiniteken pangen nuri-nuri ntah pe curhat man kalak asangken man Dibata. Engkai ? perban akapna jelasen ras kalak asangken ertoto man si la iidah. Tapi inget arah bahannta enda situhunna tangkas uga perbahanen Dibata man kalak si tek man baNa ras erpengendes man baNa. Gundari penungkunenna man kita tuhu kin kita ibas pertotonnta ntah perbahanennta erpengendes tuhu-tuhu man Dibata ntah silakoken kita terjeng formalitas ngenca gelah teridah bagi kalak erkiniteken. Emakana adi kin memang tuhu kita lenga tek 100 % janah pengendesennta lenga tuhu man Dibata.. ibas paksa si enda marilah siperubahi gelah tuhu-tuhu Tuhan saja si jadi ulu Kegeluhennta.