BIMBINGEN KHOTBAH PEKAN DOA BERNGI SIPEENAMKEN

BIMBINGEN KHOTBAH PEKAN DOA BERNGI SIPEENAMKEN

THEMA:ERNANAM MAN JELMA SI ENTEREM

Khotbah : Daniel 6 : 1 – 14

-          Pengantar

Sadar ntah la sadar kebencian kalak nandangi kalak Kristen, maun-maun terjadi erkiteken kalak Kristen e sisada. Hal si enda banci sinin, ibas piga-piga contoh :

1. Masalah parkir ntah pe kendaraan sangana ibadah

Piga-piga kalak ngatakenca penutupan ntah pe pelarangan ibadah warga nandangi gereja erkiteken ibahan sikap parkir perpulungen gereja si cenderung semrawut ibas ingan beribadah. Si contohken saja, lit sada gereja ibas sada dalan kitik, ibas wari minggu pas ingan beribadah kerina perpulungen maba kendaraanna janah parker kerina ias dalan si e tentuna si e me menganggu kalak si make dalan ndai. Emakana enda perlu pe jadi cataten man banta.

2. Masalah acara ntah pe kegiatan bas gereja.

Sikueteh labo lit gereja si la berusaha guna ngelitken sound ibas gerejana sekalak-sekalak, gelah meriah ibadah bagepe acara gereja siibahan. Tapi hal si enda maun-maun jadi masalah erkiteken kita la mengenal waktu janah emakana kalak si kelewet gereja pe terganggu erkiteken sora ndai. Janah perlu ka siinget gereja epe harus jadi berkat man kerina jelma. Kerina jelma me ertina man ise pe, ula kari gereja enda terjeng kiniulin kita ngenca. Kerina kalak harus nggejapkenca. Emakana adi lit acara asa bancina min sipake kalak ndarat nari. Enda pe salah sada tekhnik PI terbaru.

3. Masalah Pagar.

Inget gereja eme fasilitas umum, ntah pe fasilitas ibadah si ise pe banci kubas, tapi siidah adi misalna sentabi cakap make kamar mandi kita, pangen ka kalak ku mesjid asangken ku gereja, erkiteken gereja nggo ka meganjang pagarna lit ka biangna. Janah la pernah talang adi lalit acarana

3 contoh enda, piga-piga contoh ibas melala hal si mungkin la isadari gereja erbahanca kalak nembeh ntah pe ciga atena ernin gereja.

Hal sienda pe la banci tuhu ipersalahken pe perpulungen, erkiteken enterem denga ka serayan si lebih cenderung menekanken kehidupan rohani asangken kehidupan praksis perpulungen, ibas pekan doa enda, khususnan berngi sipeenamken enda, ipersingeti man kita kerina, gelah gereja enda labo terjeng jadi rumah pertoton man kalak, tapi jadi rumah ingan datken keriahen ntah pe kemalemen man kalak sideban. Emakana ibas bahan pengogennta :

-          Daniel 6 :1 – 14

Nuriken erkiteken sekalak kalak Israel si jadi “Artis” banci kataken ibas daerahna si sangana ijajah ntah pe ikuasai bangsa sideban. Daniel gelar artis ndai. Ija ibas bahan enda, ituriken uga sekalak Daniel si sekalak kalak Israel iangkat Raja Darius guna jadi wakil raja guna ngaturken kerina kerajan. Hal sienda tentun idatken Daniel erkiteken sikap si cidahkenna, adi ibas ayat 3 siidah uga nina ulin dahin Daniel enda asangken wakil raja bagepe gubernur sideban.

Hal sienda me si perlu siusih ibas kita jadi kalak Kristen. Daniel cidahken kepeken ketidak sukaan nandangi bangsa sideban labo erbahanca ia la ngelakoken perbahanen si mehuli man kalak. Erkiteken mehuli eme kewajiban siarus idalanken kerina kalak si erkiniteken man Dibata. La mengenal man ise ras ja inganna.

Tapi adi terbagesen ka sioge bahannta enda, siidah kepeken ibas kai hal si mehuli siibahan Daniel enda enterem kalak si la ngena atena, bahkan erkiteken si enda, kalak enda ndaram-ndarami kesalahen Daniel. 

Emakana erkiteken kiniteken Daniel emaka ia iukum guna masuk kubas lubang singa. Tapi perlu siinget kepeken ibas ayat 14, aminna la ipatuhi Daniel perintah raja si erbahanca ia iambeken ku lubang singa, tapi tuhu kal keleng ate raja seh darami raja dalan gelah Daniel pulah arah hukumanna.

Gambaran sienda me singatakenca kepeken erbahan mehuli banci kalak la ngena atena man kita, apalagi la mehuli. Gundari tergantung pilihanna man banta kerina

-          Aplikasi

Ibas pekan doa sipeenamken enda, iajuk kita guna mulihi nginget padannta selaku kalak si erkiniteken gelah jadi pasu-pasu man jelma si enterem, ntah pe ibas berngi enda gelah ernanam man jelma sienterem.

Ibas doni enda, adi ngerana kita erkiteken nanam enda tentuna melala nanam pangan si pernah igejapken kita, tapi adi ihubungken ras kegeluhen tading2 ngenca eme:

1. Nanam entebu
2. Nanam Pagit

Bagi cerita Daniel ndai lenga bo tentu erbahan mehuli kita banci sidat nanam entebu apalagi adi kita erbahan si la mehuli, emakana ibas paksa enda pilihanna gundari man kita, nanam kai kin situhunna ate iberekenndu man kalak, nanam entebu ka ntah nanam pagit.

Ertoto fungsina salah sada eme mindo man Dibata. Emakana perlu ibas paksa enda si petangkas gelah totonya sedekah enda labo terjeng keuntungan man dirinta tapi man kalak sideban ka. Erkiteken kerehennta ibas doni enda tentuna salah sada eme jadi berkat man kalak sideban.