BIMBINGEN KHOTBAH PEKAN DOA BERNGI SIPEDUAKEN

BIMBINGEN KHOTBAH PEKAN DOA BERNGI SIPEDUAKEN

THEMA:TUTUS RAS PATUH

Khotbah : I Samuel 1 : 21 – 28 

Pdt. Maria E br Sitepu

-          Pengantar

Melala tentuna kita bas doni enda ibas pertotonta man Dibata mindo gelah isampatiNa kita ibas kgeluhennta, ntah pe mindo erkiteken kebutuhan-kebutuhan kegeluhennta. hal si enda lanai situhunna barang baru adi kalak ertoto man Dibata, bahkan lit kang kalak pertotonna man Dibata isina kerina pemindon labo lit kai pe, menaken pemenana seh pendungina pokokna mindo lalap man Dibata.

Wajar eme istilah si pas adi kita ngerana erkiteken pemindon manusia ku Dibata sangana ia ertoto, tapi lit hal-hal si perlu iperdiateken kita ibas mindo man Dibata. Ibas wari sipeduaken ibas pekan doanta enda, ipersingeti kita uga kin situhunna tanggung jawab kita erkiteken pertotonta. Bagi berngi si pemena, pertoton enda harus ibarengi tanggung jawabta. Kai kin saja tanggung jawabta. Ibas bahanta berngi enda, lit 2 hal si perlu si perdiateken 

-          1 Samuel 1 : 21-28

Bagin enda situhunna reh jilena adi sioge ibas ayat 1 gelah tuhu-tuhu tangkas kejadin si terjadi ibas cerita enda. Bahan enda nuriken erkiteken sejarah ketubuhen Samuel si pagi jadi hakim man kalak Israel, janah ia me hakim pemena si ipake Dibata guna ngurapi Raja kalak Israel.

Adi siidah bahan enda, kepeken ketubuhen Samuel enda la lepas arah persoalen, erkiteken Samuel eme anak Elkana ras Hana, tapi bahan enda ngingetken kepeken Hana enda ndekah maka lit anakna, Penina (Istri sipeduaken Elkana) maka lit anakna, emakana adi siidah bahannta tuhu morah ate Hana erkiteken si e, ayat 5-6 cidahken sie, uga hana erpengakap Elkana lanai keleng atena dirina, janah Penina rusur nokohi Hana erkiteken lalit anakna.emakana erkiteken si e ibas sada wari ibas rumah pertoton ertoto me Hana janah adi siidah istilah siipake Hana erpadan man Dibata. Kata istilah padan enda ntah pe nazar adi ibas padan sedekah nggo me banci ikataken utang adi nggo sempat terbelasken. Emakana siidah adi kita ertoto ::

1. Tutus

Hal sienda banci siidah ibas pertoton Hana uga teridah ketutusenna guna datken anak, erkiteken aminna pe anakna pagi e jadi suruh-suruhen Dibata segedang-gedang geluhna asal lit anakna. Hal si enda perlu silakoken adi kita ertoto man Dibata, adi mindo ula min setengah-setengah, contohna bagenda, mindo kita lit pendahin, tapi adi banci min bagenda model pendahinna ninta bas pusuhta. Enda me ertina mindo labo tutus,adi pindo pendahin janah pendahin kai pe si reh me harus ialo-alo kerinana erkiteken e pemere Dibata. Janah adi ngerana ka kita masalah tutus

Siidah ibas bahannta enda hampir tiap tahun keluarga enda reh ku silo guna ersembah man Dibata, jadi labo kuakap sekali enda denga Hana mindo man Dibata gelah lit anak pupusna, erkiteken secara psikologi adi nggo erjabu ndekah biasana sada ketedehan ate sekalak diberu gelah lit anak pupusna, emakana kuakap nggo piga-piga kali pindo Hana man Dibata. Tapi kepeken aminna nggo piga-piga kali janah lenga ibereken Dibata labo ngkurangi kiniteken Hana man Dibata. Arah enda pe banci siidah ketutusen Hana man Dibata. Janah ketutusenna pe guna datken pupus.

Hal sideban si perlu siperdiateken pe adi siidah bahannta eme ibas ayat 12-16, uga dekahna Hana ertoto emakana tempa-tempa ia idah kalak bagi kalak mabuk. Inget ertoto e labo gelah nggo janah gelah kai si nggo isura-suraken kita nggo sibelasken man Dibata. Tapi pertoton eme cara kita guna nuriken perbebennta man Dibata, emakana aminna pe kai pengakap kalak erkiteken pertotonnta e urusenna lah, erkiteken ertoto enda hubungan pribadi ras Dibata.

Emaka tutuslah subuk ibas pengerana ntah pe perbahanen adi ate mindo man Dibata, ula setengah-setengah.

2. Patuh

Ibas bahannta enda salah sada hal si banci ipelajari kita ibas cara Hana mindo man Dibata eme kepatuhenna. Engkai maka bage :

1.      Samuel eme anakna sisada sada ngenca, tapi tetap jemakna padanna man Dibata gelah babana Samuel ku Dibata

Ayat 26, menarik kal uga cara hana guna mereken Samuel man Dibata.

Hal si enda me si jarang terjadi bas dirinta, contoh ertoto kita gelah sehat janah erpadan kita adi sehat kita sibereken pagi man kalak musil setengah gajiku bulan enda, kepeken sehat kita pagina, nggo ka kita rukur sibereken ntah lang.

Hal si enda si perlu sirubah ibas pemahamennta. Adi nggo sibelasken sidalakenlah.

-          Aplikasi

Ertoto labo terjeng ngerana ngenca man Dibata, tapi ertoto juga dalan kita erlajar gelah tutus ras patuh man Dibata.Ketutusen rasn kepatuhen enda me sada kunci uga kita banci datken sura-suranta man Dibata. Ertoto tentuna harus ibarengi alu sikap ntah pe biak kita selaku anak-anak Dibata. Emakana ibas berngi sipeduaken enda ipersingetina kita gelah TUTUS ibas ertoto janah PATUH kita ibas pertotonta man Dibata.