Pekan Doa GBKP Tgl. 15 - 22 Mei 2016

PEKAN DOA GBKP TGL. 15 - 21 MEI 2016

Pdt. Larena br. Sinuhadji (Nd. Reynard Tarigan)

TEMA UMUM : “ARON DIBATA SI ERTOTO, IPEGEGEHI KESAH SI BADIA GUNA ERTOTO” (Bdk. Perb. Rasul 4:31)

WARI I TGL. 15 MEI 2016

Invocatio : “Pindolah, tentu ngalo me kam; daramilah, tentu idatndu; tuktuklah, tentu italangi pintun man bandu. Sabap si mindo ngalo, si ndarami dat me, janah si nuktuk, italangi pintun man bana” (Matius 7:7-8).

Renungen : Perb. Rasul 4:23-31

Tema : “ARON DIBATA SI ERTOTO, IPEGEHI KESAH SI BADIA GUNA ERBERITA”

Penjelasen Bahan Ogen & Perenungen

Invocationta merupaken bagin i bas khotbah Tuhan Yesus i datas uruk. Maka i bas kita ertoto arus lit i je usaha janah enda teridah alu telu kata kerja: pindolah, daramilah ras tuktuklah. Adi la sipindo la ieteh kalak kai si jadi kebutuhenta. Bahkan i bas kita mindo tentu alu dem kiniteruken ukur (tan i teruh).

Bahan khotbahta e me pertoton perpulungen kenca Petrus ras Johanes ibebasken  penjara ras i bas persidangen Pengadilen Agama erkiteken la idatken pemimpin-pemimpin kalak Jahudi kesalahen kalak enda duana. Kalak enda ipenjara erkiteken enggo erteremna kalak si tek man Tuhan Yesus asum ibegina berita si meriah si iberitaken Johanes ras Petrus. Tuhan tetap erdahin, maka duana kalak enda ibebasken. Perban riahna ukur perpulungen, maka ertoto perpulungen raduken ras Petrus bage pe Johanes. Si isina lebe pengakun maka Tuhan nge Dibata si mada kuasa, si nepa langit doni ras kerina isina. Bage pe lit ancamen-ancamen sialami rasul-rasul Tuhan rikut ras perpulungen kalak si tek arah pemimpin-pemimpin kota subuk Herodes, Pontius Pilatus, bangsa-bangsa si deban, bage pe bangsa Israel sendiri. Maka perpulungen mindo gelah tetap ilindungi, iperdiateken Tuhan serayan-serayanNa si mbue ndatken ancamen ras gegeh guna tetap meritaken Kata Dibata. Tuhan si mperlengapi serayan-serayanNa gelah ngasup erbahan tanda-tanda sengget. E ma kenca dung kalak enda ertoto rumah inganna pulung e mugur-mugur. Kesah si Badia ndemi kerina perpulungen ras alu ukur si tetap enggo siap guna mberitaken Kata Dibata.

Makin ibabat makin merambat, e me salah sada kuan-kuanen si memotivasi pemberitaan Firman Tuhan tetap ielaken amin sekali mbue tantangen. Jemaat Tuhan nutus ertoto asum ibegina lit kiniseran si ialami Petrus ras Johanes. Bahkan asum kalak enda enggo ibebasken pe, tetap iangkatken pertoton man Tuhan. Mengakui kebesaren ras kemahakuasaan Tuhan. Je nari mindo pergegeh amin sekali mbue ancamen i bas meritaken Kata Dibata. Labo ipindoken perpulungen gelah bebas i bas tantangen nari, tapi gegeh tole guna mberitaken Kata Dibata alu la biar-biaren. Je nari gelah Tuhan sendiri si erdahin arah serayan-serayanNa gelah iperlengkapi alu tanda-tanda sengget i bas meritaken Kata Dibata. Janah Tuhan sendiri si ndudurken tanNa guna pepalem kalak si sakit. Ertina, tetap si iagungkenna e me kap kuasa Tuhan si la ersibar, labo itangkona kemulian Tuhan.

Tema : “Aron Dibata si ertoto, ipegehi Kesah si Badia guna erberita”. Kita, e me kap teman sekerja Dibata. Serayan Tuhan rikut ras perpulungen ersada arih, ersada ukur, sepenggejapen guna saling mendukung i bas meritaken Berita si Meriah. Banci jadi lenga mbue jemaat si tersuruh ukurna mendukung i bas doa arah pelayanen si idahiken kemahen Tuhan. Tapi tema rikutken bahan renungenta mpersingeti kita, maka kita e me kap aron Dibata (serayan ras jemaat) guna saling mendukung, saling mendoaken gelah arah pendahin Kesah si Badia, ipengasupna kita tetap nehken Berita si Meriah.

WARI II TGL. 16 MEI 2016

Invocatio : “Sisampat-sampatenlah kam i bas maba baban geluh enda. Alu bage isehkenndu kap Undang-undang Kristus” (Galati 6:2)

Renungen : Roma 15:1-2

Tema : “ARON DIBATA SI ERDIATE, NGUKURI RAS SI MEREKEN KINIULIN MAN TEMAN”

Penjelasen Bahan Ogen & Perenungen

Bahan renungenta e me kap kerna surat Paulus man perpulungen Roma. Ibere judul “Bahanlah si ngena ate kalak si deban” (TB-LAI, “Orang yang lemah dan orang yang kuat”). Surat Paulus si mpersingeti perpulungen saling sisampat-sampaten sada ras si debanna. Si megegeh kinitekenna arus nampati si merampek kinitekenna. Ola hanya mementingken dirinta sendiri, dirinta ngenca siukuri. Tapi sekalak-sekalak arus mperdiateken temanna manusia janah ngukuri kai si mereken kiniulin man bana gelah alu bage reh teguhna kinitekenna.

Tema i  bas wari peduaken, “Aron Dibata si erdiate, ngukuri ras mereken kiniulin man teman”. Arus lit prinsip bas kita, kerina si mehuli si lit bas kita sipakeken guna jadi pasu-pasu (berkat) man kalak si deban, gelah banci geluhna tersampati ras idahna kekelengen Dibata i bas dirinta. Sabab memang kecenderungenta, kita ateta lalap iperdiateken. Pusat perhatian (centerna) kita. Tapi mari kita erlajar arah Tuhan Yesus, enggo pe ngenanami kiniseran, labo IA minta diperhatikan, malah kebalikenna iperdiatekenna nandena, iperdiatekenna diberu-diberu si ngikut-ngikut IA alu setia, bahkan ngasup denga IA ngataken, “Bapa alemi salah kalak enda sabab la ietehna kai si ibahanna”. Terkadang kita, selalu minta diperhatikan, apai ka sangana lit perbeben bas kita. Tapi rikutken bahanta sekali enda ipersingetina kita lako kita memulai, berinisiatif guna saling sisampat-sampaten. Terlebih si megegeh kinitekenna arus nampati si merampek kinitekenna. Sabab si merampek kinitekenna, mekatep ndarami ido, menuntut, murah pergelut, ertina, fokus kegeluhenna masih sekitar dirina, lenga bo ia ngasup ngukuri kai si mehuli guna kalak si deban. Guna si e me kehadiren kita si megegeh kinitekenta hadir guna nampati ia gelah reh teguhna ka kinitekenna.

Berlatih guna ngukurken, ngataken ras erbahan si mehuli benaken hal-hal si kitik. Sebage contoh mereken pujian, motivasi, senyuman, sapaan, kata pergegeh, memberikan maaf, mereken saran, rsd.

WARI III TGL. 17 MEI 2016

Invocatio : “Nandangi Undang-undang e aku situhuna enggo mate, janah lanai lit sitik pe kuasa Undang-undang e nandangi aku seh maka banci aku nggeluh guna Dibata. Aku enggo ipakuken ras Kristus i kayu persilang. Lanai aku si nggeluh, tapi Kristus kap si nggeluh i bas aku. Kegeluhenku si genduari i bas doni enda kugeluhken erkiteken kiniteken man Anak Dibata, si ngkelengi aku dingen ngendesken diriNa man gunangku” (Galati 2:19-20)

Renungen : Juna 2:1-3:3

Tema : “ARON DIBATA SI ERTOTO SI TUTUS NDALANKEN KOMITMENTNA”

Penjelasen Bahan Ogen & Perenungen

Bahan renungenta e me kap kerna pertoton nabi Juna asum ia i beltek nurung. Latar belakangna enggo radu ras sieteh maka Juna isuruh Tuhan ku Niniwe guna nehken kata pertobaten. Tapi la ipatuhi Juna perentah Tuhan e, lompat ia ku Spanyol. Tapi ibahan Tuhan angin si meter rembus ku lawit, janah erkiteken galumbang si merawa menam pe pecah atena ibahanna kapal e. Dungna ibahan tikam tanduk gelah ieteh ise kin si ersalah seh makana bage rawana galumbang e, kena gelar Juna. Turiken Junalah maka situhuna ia lompat bas Tuhan nari. E maka Juna sendiri mereken usul gelah iambeken ia ku lawit maka banci teneng ka mulihi. Igejapi Juna nge maka erkiteken salahna nge maka angin kaba-kaba enda reh engkenai kapal (ay. 12). Kenca enggo ibenterken ku bas lawit, minter teneng lau lawit e, bahkan awak kapal pe kedungenna ertobat, erpadan ia nembah man Dibata, sedangken Juna itelen sada nurung si seh kel galangna bekas persuruhen Tuhan.

I bas beltek nurung ndai nge Juna ertoto man Dibata. Isi pertotonna, mindo penampat ia man Tuhan. Tuhu-tuhu isedarina maka enggo ia iambeken Tuhan ku bas doni kematen:  “IsampetkenNdu aku ku tengah lawit si mbagesna, lau si ergalun reh namburi Juna, narus mate ibahanna Juna, lumut-lumut ngelilet takalna. Tapi penderitaan e kentisik ngenca, minter reh penampat Tuhan arah nurung si galang. Nina Juna, “Tapi o Tuhan Dibatangku, irintakNdu kepe aku i bas ingan si mbages nari, maka aku nggeluh ka mulihi”.

I bas kiniseran sialami Juna labo ia ernalem man kuasa-kuasa si deban, la lit ukurna nembah man berhala-berhala si la erkuasa, sabab isedarina kel maka Dibatalah kecionna si tuhu-tuhu. Juna berbalik man Tuhan, sedar ia kerna kesalahenna. Iendekenna puji-pujin man Tuhan, iendeskenna persembahen man Tuhan ras kai si enggo ipadankenna man Tuhan isehkenna nge. Sabab tuhu-tuhu igejapina maka keselamatenna rehna i bas Dibata nari. Enggo ipulahi Tuhan ia i bas doni kematen nari. E maka asum reh Kata Tuhan si peduakaliken, iikutken Juna kata Tuhan e, lawes ia ku Niniwe guna nehken berita pertobaten.

Juna menyadari kesalahenna ras bertobat. Tuhu-tuhu ia erpengendes man Tuhan arah pertotonna, maka enggo ipulahi Tuhan ia i bas doni kematen nari. Dibata saja inganna ernalem la lit si deban. Dingen buah pertobatenna jelas teridah secara konkrit, ipujina Dibata, isehkenna persembahenna ras padanna man Tuhan. Icidahken Juna ketaatenna man Tuhan, asum isuruh Tuhan ka sekali nari la nari ia nimbak tapi alu patuh idalankenna perentah Tuhan.

Rasul Paulus i bas invocationta, isedarina kel maka Tuhan enggo “menangkap” ia secara pribadi, e maka nina, “La nai aku si nggeluh, tapi Kristus si enggo nggeluh i bas aku”. Kedangingenna, enggo ipakuken raduken ras Kristus i kayu persilang. La nari atena nia-niaken keselamaten, lias ate Dibata si enggo isehkenNa man bana.

Kita enggo iselamatken Dibata arah penebusen Yesus Kristus. Lias ateNa enggo isehken Tuhan man banta. Bujur ninta man Tuhan. Penggejapen bagi Juna ras Paulus si enggo iselamatken Dibata arusna tuhu-tuhu nggeluh bas kita. Sabab enggo ipulahi Tuhan kita bas doni kematen nari. Ertoto kita man Tuhan gelah ula min sisia-siaken nggeluh si enggo ibereken Dibata man banta. Setiap wari pemere Tuhan, sada kesempaten guna kita tetap jadi pasu-pasu (berkat) man kalak si deban ras mpermuliaken gelar Tuhan.

WARI IV TGL. 18 MEI 2016

Invocatio : “Kedungenna o senina-senina, ertotolah kerna kami, gelah Kata Tuhan pedas min reh mbarna dingen ialoken kalak si nterem bagi enggo jadi i tengah tengahndu” (2 Tesalonika 3:1)

Renungen : Pilipi 1:3-11

Tema : “ARON DIBATA SI NGELAI”

Penjelasen Bahan Ogen & Perenungen

Bahan renungenta e me kap kerna pertoton rasul Paulus man perpulungen Pilipi si ituliskenna bas penjara nari. Perpulungen Pilipi e me perpulungen si pemena bekas Paulus mantekisa. Lit piga-piga hal si banci siidah i bas pertoton si itulisken Paulus: 1) Tep-tep kali Paulus ertoto kerna perpulungen Pilipi ertoto ia alu meriah ukur erkiteken penampat si ibereken perpulungen enda nandangi Paulus ras timna i bas pembarken Kata Dibata. Penampat si isehken perpulungen nai-nai nari seh paksa Paulus bas penjara pe. Perpulungen Pilipi tetap bas pusuh Paulus. “Kuinget kam lalap!” (ay. 7). Sabab perpulungen e tetap setia subuk i bas senang bage pe susah, subuk asum Paulus bebas denga mpertahanken ras mpeteguhi Berita si Meriah alu tutus ate bage pe i bas paksa Paulus i penjara. 2) Ipindoken Paulus man Tuhan gelah ertambahna min keleng ate perpulungen e rikut ras pemeteh si tuhu-tuhu ras pengangkan si serta (TB-LAI 1:9, “Dan inilah doaku, semoga kasihmu makin melimpah dalam pengetahuan yang benar dan dalam segala macam pengertian”) alu bage reh dewasana kiniteken perpulungen e seh makana banci ipilihna apai si mehulina si ngena ate Dibata, bage pe bersih dingen la erpandangen perpulungen e i bas warina Kristus reh peduakaliken guna ngadili kerina manusia.

I bas invocationta, mulihi rasul Paulus mindo dukungen doa man perpulungen i Tesalonika gelah Kata Dibata si iberitaken reh mbarna iberitaken ras reh teremna ialoken kalak. Igejapi Paulus la ia ngasup ndalanken tanggung jawab e i bas ngelaken Kata Dibata adi la kin idukung ras isampati perpulungen.

Rasul Paulus tuhu-tuhu nggejapken penampat perpulungen subuk Pilipi bage Tesalonika i bas ia nehken Berita si Meriah. Penampat si ialokenna subuk paksa senang ras susah (i penjara). Lit ungkapen si ngatakenca, kesetian teman sejati teruji asum lit perbeben reh man banta. Tetap ia setia nemani ras nampati kita. Adi hanya bas suka entah senang saja kalak e ndeher ras kita, bas susah e tadingkenna kita, berarti labo ia teman sejati. Jemaat Pilipi ras Tesalonika mendukung pelayanen Paulus, subuk secara moril ras materil gelah Kata Dibata pe reh mbarna iberitaken.

Jemaat Tuhan sada aron ras kerina serayan Tuhan, sabab kerina kita aron Tuhan. Dukungen doa, partisipasi i bas kerina kegiaten bage pe partisipasi i bas dana, tetap ibutuhken gelah reh majuna gereja Tuhan ras reh ernanamna kehadiren gereja man doni enda (sekelewetna). Sikap melayani (ngelai) arus menjadi karakter bas kita kalak Kristen, sabab Kristus pe reh ku doni enda labo guna ielai tapi guna ngelai.

WARI V TGL. 19 MEI 2016

Invocatio: “E maka ola pada sitik pe kam mbiar. Aku pekena-kena kam ras anak-anakndu.” Dage alu kata si melias e, ipetetap Jusup mulihi ukur senina-seninana seh maka malem atena kerina” (Kejadin 50:21)

Renungen : Imamat 25:35-38

Tema : “ARON DIBATA SI ERTOTO, SI MPEHAGA TEMAN” (“NGANGKATKEN”)

Penjelasen Bahan Ogen & Perenungen

Invocationta nuriken kerna Yusuf si tuhu-tuhu ngalemi senina-seninana si enggo erbahan jahat man bana. Bahkan ipetetap Yusuf senina-seninana e si gulut ukurna seh makana malem ate kerina seninana. Kebujuren Yusuf i bas ngalemi senina-seninana iwujudnyataken alu ipekena-kenana kegeluhen senina-seninana rikut keluargana. Dasar kiniteken Yusuf i bas ngalemi senina-seninana teridah i bas Kej. 50:20. Kerembaken Yusuf ras Dibata (bdk. Kej. 39:2,21) mpengasup ia ngangkatken moril senina-seninana.

Bahan renungenta ibuat i bas kitab Imamat. Amin pe Imamat ertina “buku panduan imam” tapi isina labo saja berkaiten ras tugas-tugas si arus ilakoken imam-imam saja, lit i je pedah-pedah man bangsa Israel berkaiten ras kegeluhen si tep-tep wari. Secara khusus i bas bahan renungenta nuriken kerna pengelako si payo (sikap yang benar) man kalak Israel si musil. Kalak si musil arus sideheri ras sisampati, ola suruh ia nggalar bunga duit si ipinjamken man bana, janah ola buat untung i bas pangan si idayaken man bana. E kerina pengelako konkrit si payo si iperentahken Dibata man kalak Israel si megegeh erpalasken perbahanen Dibata si enggo ngangkatken kalak Israel i bas taneh perbudaken Mesir nari ras mereken taneh Kanaan alu cuma-cuma.

Bahan ogen i bas Pekan Doa wari si pelimaken enda mabai kita ku bas perenungen kerna perkuah ate Dibata si mbelin nandangi kita kalak perdosa. Amin pe mungkin melala ertanta, tapi situhuna kita kerina kalak si musil i adep-adepen Dibata, sebab kerina si lit bas kita rehna i bas Dibata nari, janah alu kebayakenta la banci situkur perkuah ate Dibata si mbelin e. Arah perenungen enda, mabai kita nginget teman-teman sekelewetta si sangana lit i bas perbeben ras kiniseran. Mari radu ras sitotoken teman-temanta si lit i bas perbeben ras kiniseran, alu bage ipengasup Dibata kita guna nampati ras ngangkatken moril teman-temanta si lit i bas perbeben ras kiniseran. Em pengelako konkrit si payo sebage tanda mpehaga teman-temanta. 

WARI VI TGL. 20 MEI 2016

Invocatio : “Aloi aku, Tuhan, aloilah, gelah ieteh bangsa enda maka Kam Tuhan Dibata kap, maka Kam me si mabai bangsa enda mulihken man baNdu“ (1 Raja-Raja 18:37)

Renungen : Jakup 5:13-20

Tema : “PERTOTON KALAK BUJUR ERGEGEH KAL“

Penjelasen Bahan Ogen & Perenungen

Surat Jakup isina secara umum e me mpegegehi perpulungen kalak Kristen si tersebar i darat Israel alu pedah-pedah praktis i bas kegeluhen si tep-tep wari i ja kalak Kristen ndatken tantangen ras kiniseran erkiteken Kristus. Secara khusus i bas bahan renungenta sendah termasuk i bas perikop si ibere judul “Saber ras ertoto”. Hal-hal si menjadi point penting kerna ertoto e me : 1) Adi ngenanami kiniseran, hal si pemena si arus ilakoken e me ertoto man Dibata. 2) Pertoton si ibahan alu tek man Tuhan erkuasa mpepalem kalak si sakit ras erkuasa ngalemi dosa. 3) Pengakun dosa ras pertotonta nandangi teman-temanta mabai kemalemen (ay. 16 i bas bhs. Ind., “hendaklah kamu saling mengaku dosamu dan saling mendoakan, supaya kamu sembuh”). 4) Pertoton kalak si bujur ergegeh kal (bhs. Ind., “Doa orang yang benar, bila dengan yakin didoakan, sangat besar kuasanya”). I bas hal si enda, rasul Jakup mereken contoh pengalamen nabi Elia. I bas invocationta pe isina pertoton nabi Elia man Dibata nandangi bangsa Israel gelah mulihken (bertobat) man Dibata, i ja bangsa Israel enggo menyimpang i bas dalan Tuhan nari alu nembah Baal (bdk. 18:21).

Pertoton kalak bujur ergegeh kal. Adi sikaitken ras Jakup 4:3, maka tangkas man banta kai si imaksudken rasul Jakup kerna “bujur”. Bas Alkitab Terjemahan Baru (TB-LAI) ikataken nina, “Atau kamu berdoa juga, tetapi kamu tidak menerima apa-apa, karena kamu salah berdoa, sebab yang kamu minta itu hendak kamu habiskan untuk memuaskan hawa nafsumu”. Kebujuren berkaiten ras ajaren Tuhan Yesus kerna keleng man Dibata ras keleng man manusia. Jadi adi palas pertotonta keleng man Dibata ras keleng man manusia e maka ergegeh kal pertotonta.

Pekan Doa wari si sendah mabai kita gelah : 1) Erlajar ertoto si benar bagi Pemazmur i bas Liturginta (Mas. 25:4,5). 2) Mpeteruk dirinta i adep-adepen Dibata alu ngakui kelemahenta ras dosa-dosanta. 3) Babai kerina kiniseran ras perbeben si nialami kita i bas pertotonta man Dibata gelah ndatken pergegeh ras serpang pulang. 4) Malasi pertotonta alu kebujuren, e me keleng man Dibata ras keleng man manusia.

WARI VII TGL. 21 MEI 2016

Invocatio : “Erkiteken si e sitatang-tatangenlah janah sisampat-sampatenlah kam bagi si sangana ibahan kam genduari e” (1 Tesalonika 5:11)

Renungen : Jop 42:9-11

Tema : “ARON DIBATA SI NGKUHI KERIAHEN”

Penjelasen Bahan Ogen & Perenungen

Jop e me kalak si saleh (bujur), la ia nggit ngelakoken si jahat ras mbiar ia man Dibata. E me hikmat si pentingna kel (bdk. Masmur 119:99-101; Kuankuanen 1:7; Pengerana 12:13). Hikmat si bagenda si mabai Jop ngalaken kiniseran si mberat i bas geluhna, amin pe sebage manusia labo ia sempurna. Perikop pasal 42 e me pasal si terakhir i bas kitap Jop, i ja i bas ay. 6 Jop erkadiola, kundul ia i bas abu dapur ras abu taneh sebage tanda mpeteruk dirina i adep-adepen TUHAN ngakuken dosana. I bas ay. 10 ertoto pe Jop nandangi teman-temanna gelah ialemi Dibata salah teman-temanna. Kenca si e ituriken senang mulihi geluh Jop ibahan TUHAN (dipulihkan TUHAN), janah iberekenNa man Jop kebayaken dua kali lipat buena asa si marenda. Erkiteken rembak ras Dibata maka ibereken Dibata hikmat janah ipengasup Dibata Jop guna ngalaken kerina kiniseran si ialamina bage pe ertoto ia guna teman-temanna.

Invocationta e me pedah-pedah rasul Paulus man perpulungen Tesalonika si ipantekina. Salah sada pedahna e me sitatang-tatangenlah janah sisampat-sampatenlah kam bagi si sangana ibahan kam genduari e. I bas Alkitab Terjemahan Baru (TB-LAI) nina, “Nasihatilah seorang akan yang lain dan saling membangunlah kamu seperti yang memang kamu lakukan”. Sitatang-tatangen ras sisampat-sampaten e me si arus terus-menerus silakoken secara konsisten, gelah kai pe si terjadi i bas kegeluhen enda banci radu ras sibentasi alu gegeh i bas Dibata nari. E pe salah sada hikmat kepentaren si rehna i bas Dibata nari.

Keriahen si kuh e me rehna i bas Dibata nari. Bahan ogenta sendah mabai kita gelah ngkuhi lebe keriahen i bas dirinta alu mindo hikmat kepentaren i bas Dibata nari. Je nari makana ipengasup Dibata kita guna ngkuhi keriahen kalak si deban. Mari radu ras sipindo arah pertotonta man Dibata gelah hikmat kepentaren i bas Dibata nari ialoken kita.