Khotbah GBKP Kamis Tgl. 5 Mei 2016

KHOTBAH GBKP KAMIS TGL. 5 MEI 2016

Pdt. Larena br. Sinuhadji (Nd. Rey Tarigan)

KENANGKIHEN TUHAN YESUS KU SURGA

Invocatio : “Nina man rasul-rasul e, “O kalak Galilea, ngkai maka kam tedis natap ku langit? Bagi enggo idahndu Jesus iangkat ku Surga, bage ka Ia pagin reh mulihken.” (Perb. Rasul 1:11)

Ogen : Masmur 47:2-10

Khotbah : Epesus 1:15-23

Tema : IBEREKEN DIBATA TETAP GEGEH GUNA ERBERITA RAS ERSAKSI

Penjelasen Bahan Pustaka Si Badia

Perpulungen Epesus e me rasul Paulus si mantekisa (bdk. Perb. Rasul 18:19-21; 19:1-20; 20:17-38). Pelayanen rasul Paulus i bas perpulungen Epesus banci ikataken berhasil amin pe melala tantangen si nihadapina (bdk. 1 Kor. 16:8-9). Surat Epesus itulisken rasul Paulus sanga ia lit bas penjara i Roma (bdk. Ps. 3:1; 4:1; 6:20) alu tujun gelah perpulungen semakin paguh erkiniteken ras ersada i bas Yesus Kristus. Secara khusus bahan khotbahta e me pertoton rasul Paulus man perpulungen i Epesus. Alkitab Terjemahan Baru (TB-LAI) mereken judul perikop enda “Doa untuk pengertian tentang kemuliaan Kristus”. Alkitab Bahasa Indonesia Masa Kini (BMIK) mereken judul “Doa Paulus”. Erkiteken enggo ibegina perkembangen kiniteken perpulungen si mejile (ay. 15), Paulus nehken apresiasi nandangi perpulungen Epesus, sabab perpulungen e tetap erkiniteken dingen icidahkenna kinitekenna alu saling ngekelengi sada ras sidebanna. E maka la erngadi-ngadi rasul Paulus ertoto guna perpulungen e.

I bas pemindon rasul Paulus man Dibata nandangi perpulungen Epesus i bas pertotonna enda lit piga-piga pengarapen si niarapken ialoken ras terjadi i bas perpulungen e me: 1) Gelah ibereken Tuhan Kesah kepentaren man perpulungen (pneuma sophia, roh hikmat, semakin bijaksana) gelah banci perpulungen nandai Yesus alu payo (bhs. Ind. “Supaya IA memberikan kepadamu Roh hikmat dan wahyu untuk mengenal Dia dengan benar”). Perukuren manusia si terbatas la banci ngantusi ras ngangkai sura-sura Tuhan, rahasia Kristus si ilahi ras mulia seyakatan Tuhan jine si mereken Kesah kepentaren man perpulungen (ay. 17-18). 2) Gelah ipetangkas Dibata diriNa man perpulungen (wahyu - apokaliptis), alu ipetangkas Dibata diriNa man perpulungen, maka banci itandai perpulungen e Tuhan rikutken perkuah ateNa (bdk. Lukas 24:45, “Kenca bage ibuka Tuhan perukuren kalak e gelah iangkana si tersurat i bas Pustaka si Badia”). 3) Gelah italangi Tuhan pusuh perukuren perpulungen gelah terang pengangkan perpulungen, alu bage tuhu-tuhu igejapi perpulungen maka mbue kel pasu-pasu Tuhan nandangi perpulungen, e me kap erta-erta si mulia si isikapken Dibata man anak-anakNa. Ras pe tuhu-tuhu igejapi perpulungen seh kel belinna kuasa Dibata si tetap erdahin nandangi kalak si tek man Tuhan. Maka kuasa si lit i bas kita kalak si tek e, bali ras kuasa Tuhan si mbelin si ipakeNa asum IA mpekeke Yesus i bas si mate nari. Kuasa Tuhan si ndauh ganjangen asangken kerina kuasa pemerentah ras kuasa si la teridah, dingen ganjangen asangken kerina pemimpin ras tuan-tuan si la teridah. Janah pangkat Tuhan pe ganjangen asa kerina pangkat si terbelasken, subuk i bas paksa enda, bage pe si reh pagin. 4) Kegeluhen perpulungen semakin isempurnaken ras tuhu-tuhu banci jadi alat Dibata guna kemulianNa i doni (ay. 22-23).

Masmur 47 si jadi bahan ogenta si ibere judul “Dibata kap Penguasa si Megajangna” (Alkitab TB-LAI, “Allah, Raja Seluruh bumi”), e me ungkapen Pemasmur entah pe ende-enden bani Korah (keluarga pemain musik i bas suku Lewi nari) si mengagungken Tuhan. Seruan guna ertepuk alu ermeriah ukur, muji-muji Tuhan erkiteken Dibata si merentah kerina doni enda. Tuhan si enggo mereken kemenangen man bangsaNa. Dibata si enggo nangkih ku das kursi kinirajanNa, si merentah kerina bangsa-bangsa. Seh makana, pulung kerina pemimpin-pemimpin bangsa-bangsa, ersada ras bangsa Dibata si isembah Abraham. Pengakun Pemasmur arah ende-endenna, maka Dibata kap Raja si mulia, gegehen IA asangken kerina tentera.

Bahan invocationta e me kata-kata si ibelasken dua kalak dilaki si uisna mbentar man rasul-rasul kenca Tuhan Yesus nangkih ku surga. Ikatakenna maka Yesus Kristus reh me IA pagi bagi IA iangkat ku surga. Mungkin secara tersirat kata-kata enda merupaken sada pergegeh sekaligus perentah man rasul-rasul gelah ngelakoken kerina si enggo iajarken Tuhan Yesus.

Pengkenaina

Pertoton rasul Paulus pe itujuken man banta perpulungen kalak si tek i bas paksa gundari. Adi nggeluh denga rasul Paulus i bas paksa sendah, yakin kita maka pengarapenna pe iarapkenna jadi man banta. Tema : “Ibereken Dibata tetap gegeh guna erberita ras ersaksi” i bas rangka mpersingeti wari Kenangkihen Tuhan Yesus ku surga. Tuhan Yesus enggo nangkih ku surga, janah reh me IA pagi guna maba kerina kalak si tek man baNa ku surga. Tapi paksana e lenga seh, kita nggeluh denga i bas doni enda si dem alu kiniseran, tantangen ras perbeben. Tapi tek kita bahwa kuasa Dibata i bas Kristus mpegegehi kita guna ngadapi kerina kiniseran, tantangen, ras perbeben i doni enda erkiteken Kristus. E maka i bas waktu si tersedia denga man banta i doni enda, mari radu ras sipergunaken guna ersaksi, erberita kerna keselamaten si enggo isehken Dibata man banta i bas Yesus Kristus alu kai pe si enggo ibereken Dibata man banta i ja pape kita ringan.