PJJ GBKP Tgl. 22 - 28 Mei 2016

PJJ GBKP TGL. 22 - 28 MEI 2016

Pdt. Larena br. Sinuhadji (Nd. Rey Tarigan)

Tema : KETERKELINEN ERKITEKEN LIAS ATE-NA (Epesus 2:4-9)

Penjelasen Bahan Ogen & Perenungen

Surat rasul Paulus man Perpulungen Epesus si ipantekina (bdk. Perb. Rasul 18:19-21; 19:1-20; 20:17-38) ertujun guna mpeteguhi kiniersadaan i bas perpulungen, bage pe mpeteguhi kiniteken man Yesus Kristus. Secara khusus i bas bahan ogenta sendah, ngerana kerna pokok iman Kristen. Perikon enda i bas Pustaka si Badia ibere judul “I bas kematen nari ku kegeluhen”, i  bas Alkitab TB-LAI ibere judul “Semuanya adalah kasih karunia”. Si jadi inti i bas perikop enda e me ay. 8 ras 9, “Sabap erkiteken lias ate Dibata nge maka kam enggo terkelin, erkiteken tek kam man Kristus. Labo bekas perbahanenndu, tapi pemere Dibata kap e. Labo ulih pendahinndu e, e maka labo lit dalanna ise pe muji bana”. Kata-kata “erkiteken lias ate Dibata nge maka kam enggo terkelin” (bhs. Ind., “karena kasih karunia kamu diselamatkan”) e me tuhu-tuhu anugerah Dibata si nggambarkenca uga belinna kekelengen Dibata si la terbatas nandangi manusia perdosa. Labo lit je usaha manusia si banci mpeturah keselamaten si abadi (keterkelinen). E maka si banci ilakoken manusia perdosa e me tek man Kristus. Tapi labo terjeng je saja, kinitekenta man Yesus Kristus seharusna mabai kita ku bas kegeluhen si mbaru si berdampak mplimbarui sekelewetta. Enda teridah i bas ay. 10, nina, “Tinepa Dibata kap kita; i bas persadanta ras Kristus Yesus, ijadikenNa kita guna ndahiken dahin-dahin si mehuli si enggo leben irencanakenNa, gelah sidahiken e”.

Perenungen evaluatif man banta kerina, seh i ja lias ate Dibata e berdampak i bas kegeluhenta si tep-tep wari? Ma erkiteken lias ate Dibata kita terkelin? Hal enda tentuna berkaiten ras kinitekenta nandangi Kristus. Adi payo kinitekenta erpalasken kesadaren dirinta sendiri labo erkiteken ngikut-ngikut saja alu la iangkai kita kai kin e lias ate Dibata i bas geluhta, tentu saja geluhta igeluhken alu pengataken bujur man Dibata. Janah geluhta banci berdampak mplimbarui sekelewetta erkiteken enggo inanami kita alu mbages ras payo lias ate Dibata si mbelin i bas geluhta.