Khotbah GBKP Minggu Tgl. 15 Mei 2016

KHOTBAH GBKP MINGGU TGL. 15 MEI 2016

Pentakosta

Pdt. Larena br. Sinuhadji (Nd. Rey Tarigan)

Invocatio : Esekiel 11:19

Ogen : Masmur 104:24-35 (Antiponal)

Khotbah : Roma 8:14-17 (Tunggal)

Tema : SAKSIKENLAH PENDAHIN KESAH SI BADIA

Penjelasen Bahan Pustaka Si Badia

Bahan ogen e me puji-pujin Pemasmur man Dibata si mada tinepa. I bas ay. 26, Lewiatan e me sejenis rubia lawit raksasa si la siteh uga bentukna, e pe Dibata si nepasa. Ay. 25-29 merupaken puji-pujin ras pengagungan man Dibata si nuriken uga belinna kuasa Dibata nandangi kerina tinepaNa seh makana kerina tinepaNa e sangat bergantung man Dibata. Dibata si nentukenca geluh entah pe mate kerina tinepaNa. Secara khusus ay. 30 merupaken inti kegeluhen kerina tinepaNa e me Kesah Dibata. Kesah enda me si maba pembaharuan i bas doni enda. Ay. 31-32 merupaken pengarapen Pemasmur nandangi kemahakuasaan Dibata i tengah-tengah doni enda gelah tetap seh rasa lalap. Bage pe ay. 35 merupaken pengarapen Pemasmur gelah ula nai lit kalak si erbahan dosa. Erkiteken kemahakuasaan Dibata si la terbatas enda, maka i bas ay. 33-34 Pemasmur ertekad tetap rende muji Dibata sedekah geluhna.

Bahan khotbah termasuk i bas perikop ps. 8:1-17 si ibere judul “Nggeluh rikutken aturen Kesah Dibata”, i bas Alkitab Terjemahan Baru (TB-LAI) ibere judul “Hidup oleh Roh”. Enda me salah sada pengajaran rasul Paulus kerna Kesah Dibata. I bas ps. 8:2 ikataken, “Kesah, si biakna kin mereken kegeluhen man kalak si lit i bas persadan ras Kristus Yesus, enggo mulahi kam i bas biak dosa ras kematen nari”. Ertina kerina kalak si tek man Yesus Kristus enggo nggeluh i bas Kesah Dibata ras geluhna itegu-tegu Kesah Dibata. Kesah Dibata enda si ersaksi raduken ras kesah si lit bas kita maka kita enda enggo jadi anak-anak Dibata si ngaloken kai si enggo isikapken Dibata man banta, seri ras si enggo ialoken Kristus e me kemulianNa. Janah geluhta i doni enda ipeseri ras geluh Yesus Kristus si ngenanami kiniseran sope IA ngaloken kemulianNa. Ertina, kita pe arus nggit ngenanami kiniseran erkiteken Kristus gelah dat bagin i bas kemulianNa (bdk. TB-LAI ay. 17, “Supaya kita juga dipermuliakan bersama-sama dengan Dia”).

Invocatio masuk i bas perikop ps. 11:14-21 si ibere judul “Padan Dibata man kalak si ibuang”, i bas TB-LAI masuk i bas perikop ps. 11:14-25 si ibere judul “Janji tentang pembaharuan Israel”. Enda merupaken padan Dibata nandangi kalak Israel si sangana i bas pembuangan i Babil, salah sadana e me invocationta e me ibereken Dibata pusuh si mbaru ras perukuren si mbaru, pusuh si piher bagi batu igantiken Dibata alu pusuh si erkemalangen man Dibata. I bas TB-LAI nina, “Hati yang lain dan roh yang baru di dalam batin mereka .. menjauhkan hati yang keras dan memberikan hati yang taat”. Padan enda iulihi ka i bas ps. 36:26-28. Lit hubungen si la terpisahken antara pusuh, perukuren, ras kesah (roh). Teluna ipelimbarui Dibata.

Pengkenaina

Lit sada hal si seri i bas bahan Pustaka si Badia i bas wari sendah e me pembaharuan erkiteken pendahin Kesah Dibata, entah pe i bas kalimat si deban, Kesah si Badia mabai pembaharuan i bas doni enda khususna i bas kegeluhen kalak si tek man Yesus Kristus. Adi sinen i bas tradisi kalak Yahudi, Pentakosta (wari pe-50-ken, bhs. Ibr. Shavuoth) e me perayaan panen gandum si ilakoken wari pe-50-ken kenca Paskah. Paskah i bas tradisi kalak Yahudi e me peringeten pembebasen i bas perbudaken Mesir nari. Dua perayaan enda enggo ipelimbarui maknana i bas kalak si tek. Paskah e me wari kekeken Yesus Kristus i bas kematen nari, sedangken Pentakosta e me wari nusurna Kesah si Badia. I bas peristiwa Pentakosta, terjadi pembaharuan i bas ajar-ajar Yesus jadi per-Berita si Meriah erkiteken pendahin Kesah si Badia, labo seh je saja, lit kira-kira 3 ribu kalak si ertobat erkiteken pendahin Kesah si Badia. Banci ikataken i ja pape Kesah si Badia ringan pasti lit perobahen, pembaharuan, transformasi.

Gereja lit i tengah-tengah doni enda erkiteken pendahin Kesah si Badia. Janah Gereja e me perpulungen kalak si tek man Yesus Kristus si geluhna enggo ipelimbarui Kesah si Badia. Temanta sendah ngatakenca “Saksikenlah pendahin Kesah si Badia” berkaiten ras tugas tanggung jawab Gereja i tengah doni enda, e me labo saja melayani ras bersekutu, tapi pe ersaksi, erberita kerna Kata Dibata termasuk erberita kerna pendahin Kesah si Badia, baik secara kelembagaan Gereja bage pe secara pribadi. Tentu saja hal enda banci menjadi penungkunen evaluatif man banta, enggo kin geluhta sipergunaken guna ersaksi kerna pendahin Kesah si Badia man kalak si deban? Hal si paling penting kel e me geluhta arus lebe ipelimbarui Kesah si Badia makana banci kita naksiken entah pe erberita kerna pendahin Kesah si Badia. I bas bahan khotbahta enggo tangkas man banta bahwa geluhta enda iperseri ras geluh Yesus Kristus si ngenanami kiniseran. Hal enda situhuna merupaken sada keistimewaan erkiteken geluhta iperseri ras geluh Yesus Kristus, tapi maun-maun la kita nggit iperseri i bas kiniseranNa. Ertina, i bas kita ersaksi kerna pendahin Kesah si Badia enda labo hal si murah, erkiteken melala tantangen, perbeben si mberat, ras kiniseran si arus sihadapi erkiteken er-Berita si Meriah. Tapi tek kita bahwa Kesah si Badia nampati kita i bas kerina tantangen si nihadapi kita. Tema enda menjadi tekadta guna lebih bersungguh-sungguh geluh bagi si nisuraken Dibata.