PA Kategorial GBKP Tgl. 22 - 28 Mei 2016

PA MAMRE GBKP TGL. 22 - 28 MEI 2016

Pdt. Larena br. Sinuhadji (Nd. Rey Tarigan)

Spiritualitas Pengurus

Ogen : Roma 12:5-12

Tema : Ergiah-giah ndahiken dahin Tuhan

Tujun : Mamre Ngasup :

1) Nuriken kai saja kin dahin Tuhan si iampeken man Mamre

2) Erbahan sada tekad nggeluh si isina ergiah-giah ndahiken dahin Tuhan

Penjelasen Bahan Ogen

Secara umum surat Roma e me surat penandaken rasul Paulus man perpulungen i Roma erkiteken perpulungen Roma labo rasul Paulus si mantekisa. Melala si ngatakenca surat Roma enda merupaken ringkasan teologis rasul Paulus kerna Injil Kristus (Berita Si Mehuli, bdk. Ps. 1:16-17). Pasal 12 banci ikataken merupaken uraian aplikatif kenca rasul Paulus enggo nerangken dasar-dasar teologis kerna keselamaten i bas Kristus i bas pasal-pasal sebelumna. Bahan ogenta sendah i bas Alkitab Terjemahan Baru (TB-LAI) termasuk i bas dua perikop si berbeda judulna, e me ay. 1-8 “Persembahan yang benar”, ay. 9-21 “Nasihat untuk hidup dalam kasih”. I bas Pustaka Si Badia masuk i bas sada perikop ay. 1-21 si ibere judul “Lagu langkah kalak Kristen”. I jenda rasul Paulus ngerana kerna kengasupen si pelain-lain si enggo ibereken Dibata man perpulungen rikutken lias ateNa (karunia-karunia Roh Kudus - Yun. kharismata) bagi ringring i bas sada kula si fungsina guna membangun kula ni Kristus.

I bas ogenta ituriken rasul Paulus, melala kharisma si enggo ibereken Dibata man perpulungen, e me: ernubuat, nampati kalak, ngajar, mpetetap ukur kalak, mere man kalak si deban, mimpin, ras ncidahken perkuah ate man kalak si deban. Kerina kengasupen si pelain-lain enda arus ipergunaken guna membangun kula ni Kristus alu palas : sikeleng-kelengen, saling mpehaga, idahiken alu tutus, meriah ukur i bas pengarapen, megenggeng i bas kiniseran ras ertoto la erngadi-ngadi.

Pengkenaina

Kharisma (bentuk tunggal) entah pe kharismata (bentuk jamak) situhuna labo hanya terbatas bagi si itulisken rasul Paulus i bas bahan ogenta, melala kharisma si deban si ibereken Dibata man perpulungen (bdk. 1 Kor. 12; Ep. 4; rsd.). Selain si e pe situhuna melala kharisma si deban si ibereken Kesah si Badia rikutken konteks kebutuhen gereja si berkembang seh asa gundari. Ertina, ula kita terpaku ku bas karunia-karunia si enggo ijelasken rasul Paulus si erbahanca minder kita erkiteken kai si ibereken Dibata man banta labo seri bagi si ibereken Dibata man perpulungen paksa rasul Paulus. Adi lit si seri ngataken bujur kita man Dibata erkiteken karunia e ibutuhken gereja denga seh asa gundari. Adi la seri tek kita bahwa kengasupen e ibereken Dibata guna membangun kula ni Kristus sue ras kebutuhen gereja paksa gundari. Amin pe berbeda karunia-karunia e, sada prinsip si seri e me guna membangun kula ni Kristus.

Kai-kai saja kengasupen (karunia) si enggo ibereken Dibata man banta? Banci isiksiki Mamre sekalak-sekalak. Adi i bas tujun PA sendah ikataken nina kai saja dahin si iampeken Dibata man banta? Janah adi enggo siteh ras sisedari, maka langkah berikutna e me ertekad ergiah-giah guna ndahikenca i bas pelayanenta.

PA MORIA GBKP TGL. 22 - 28 MEI 2016

Pdt. Larena br. Sinuhadji (Nd. Rey Tarigan)

Si man ogen : Daniel 1:3-7; 17-21

Tema : Nuratken Pemeteh

Tujun : Gelah Moria :

1) Ngasup nuratken kebeluhen Daniel ras teman-temanna rikut pe antusenna

2) Nuratken pemeteh si lit i bas ia ras si idatna arah kalak si deban nari

Metode : Nuratken erbage-bage pemeteh

Penjelasen Bahan Ogen

Bahan ogen nuriken kerna pembuangen bangsa Israel ku Babilon si terjadi kurang lebih tahun 6 SM. I bas pembuangen enda melala kalak Israel si itaban ras ibaba ku Babilon. I antara kalak Israel si itaban enda terpilih empat kalak perana guna erdahin i bas istana raja Nebukadnesar. Si empat kalak perana enda e me: Daniel, Hananya, Misael, ras Asaria. Si empat kalak enda terpilih alu seleksi si ketat erkiteken erdahin i bas istana raja. Kriteria si itentuken guna seleksi enda e me: kesusuren raja ras si bayak, mejile rupana, pentar kel, mbages pemetehna, pedas ngangkai pelajaren, la lit sitik pe man pandangen i bas kulana. Si empat kalak perana ndai memenuhi kerina kriteria si itentuken raja, bahkan melebihi kriteria si enggo itetapken. Kai kelebihen si empat kalak perana enda ndai? Daniel ras teman-temanna enggo tetap ukurna, amin kai pe si terjadi, la nggit ia ngelanggar aturen agamana, e me erkiniteken man Dibata ras ngelakoken kai pe si iperentahken Dibata. E maka Dibata pe mereken kebeluhen-kebeluhen si deban si kualitasna sepuluh kali lipat lebihen asangken guru-guru si beluh. Banci ikataken, sada prinsip si ijemak Daniel ras teman-temanna si jadi kunci i bas kerina pemeteh si idatkenna e me “Guna ndatken pemeteh, si pemenana si la banci la lit i bas kalak e me mehamat dingen erkemalangen man TUHAN” (bdk. Kuankuanen 1:7).

Pengkenaina

Tema i bas PA Moria sendah e me “Nuratken pemeteh” alu tujun, gelah Moria ngasup nuratken kebeluhen Daniel ras teman-temanna rikut pe antusenna, ras nuratken pemeteh si lit i bas ia ras si idatna arah kalak si deban nari. Sebage Moria i bas jaman si modern enda tentuna enggo melala pemeteh si icapai Moria, baik secara formal alu pendidiken tingkat dasar, menengah, atas, ras lanjuten. Bage pe secara informal alu pemeteh-pemeteh si icapai secara otodidak. Kerina pemeteh e tentu saja perlu ipalasi alu pengataken bujur man Dibata, erkiteken ipengasupNa kita guna ndatken kerina pemeteh e. Alu bage, bagi Daniel ras teman-temanna, itambahken Dibata erbage-bage pemeteh si deban. Kenca enggo isedari melala pemeteh si enggo ibereken Dibata man banta, tentuna kerina pemeteh e arus sipergunaken guna tujun si mehuli, e me membangun diri sendiri, membangun keluarga, ras membangun kalak si deban. Alu bage kerina pemetehta ndai jadi pasu-pasu man dirinta bage pe man kalak si deban ras gelar Dibata pe terpuji arah pemetehta.

PA PERMATA GBKP TGL. 23 - 29 MEI 2016

Pdt. Larena br. Sinuhadji (Nd. Rey Tarigan)

Matius 5:13-16

Kegeluhen Si Ernanam! (Transformasi Komunitas)

Gelah PERMATA GBKP :

1) Nuriken pengertin sira ras terang

2) Ncidahken kegeluhen si ernanam ku sekelewetna erkiteken keleng ate Dibata (Transformasi Komunitas)

Metode : Aksi PERMATA GBKP

Penjelasen Bahan Ogen

Bahan ogenta sendah termasuk i bas bagin khotbah Yesus i das uruk. Salah sadana ngerana kerna simbol sira ras terang. Sira e me sada benda si melala gunana, selain sebage bumbu si ipergunaken man pangan-pangan gelah ernanam, sira pe biasa ipergunaken kalak Israel guna mengawetkan pangan-pangan gelah ula pedas macik. Terang e me cahaya si ihasilken pelita. Pelita e me alat penerang si ipergunaken kalak Israel paksa si e si terbuat i bas tanah liat nari si iisi alu minyak zaitun. Pelita enda rikutken fungsina tentuna erguna kel man kalak Israel paksa si e sebage penerang i bas rumah-rumah bage pe i bas pesta-pesta si biasa ilakoken i bas berngi. Pelita ras terang enda ipergunaken Pemasmur sebage simbol Kata Dibata si nerangi dalan kegeluhen (Mas. 119:105).

Sira ras terang enda ipergunaken Tuhan Yesus sebage simbol kegeluhen si berdampak (ernanam) positif man sekelewetta. Kegeluhen si dem alu perbahanen-perbahanen si mehuli si banci iidah kalak si deban gelah arah perbahanen-perbahanen si mehuli e terpuji gelar Dibata. Simbol terang pe melala ipergunaken rasul Paulus guna nggambarkenca kegeluhen si mbaru i bas Kristus (bdk. Ep. 5:8, rsd.).

Pengkenaina

Tema PA sendah e me “Kegeluhen Si Ernanam!” (Transformasi Komunitas), alu tujun Gelah PERMATA GBKP nuriken pengertin sira ras terang, ras ncidahken kegeluhen si ernanam ku sekelewetna erkiteken keleng ate Dibata (Transformasi Komunitas) alu aksi si nyata. Arah tema ras tujun enda, iajuk PERMATA GBKP gelah geluhna banci maba pengaruh positif ija pape ia ringan, i bas kerina profesi si enggo ipercayaken Dibata, ras i bas kerina kondisi kegeluhen. Ibenaken alu transformasi diri sendiri, kenca bage mempengaruhi komunitasna ku arah si mehuli sue ras peraten Dibata. Selain si e, sebage salah sada komunitas i bas gerejanta, PERMATA sebage lembaga pe perlu menciptaken kondisi komunitas si berdampak positif gelah ise pe si bergabung ku bas komunitas PERMATA geluhna ipelimbarui. E maka bahanlah rencana kegiaten-kegiaten positif baik secara pribadi bage pe secara kelembagaan.