BIMBINGEN KHOTBAH 14 MEI 2017

BIMBINGEN KHOTBAH 14 MEI 2017

 Kantate ; Rendelah

Thema:“IBEREKEN DIBATA KEMENANGEN, PUJILAH IA”

Invocatio : Masmur 96 : 1

Ogen : Masmur 22 : 23-32

Khotbah : I Petrus 2 : 4 – 10

Pdt. Maria E br Sitepu

-          Pengantar

Ibas konteks beragama paksa enda, khususna nandangi kalak Kristen si nggeluh ibas negaranta enda, penderitaan, perbeben, kiniseran, ras sidebanna lanai jadi hal si asing nandangi kalak Kristen.subuk ibas :

1.      Pendirian Rumah Pertoton

2.      Ibadah i rumah

3.      Cidahken kekelengen

4.      Erdahin

5.      Rsdna kerina

Nggo me jadi hal si lumrah. Emakana lit sidah istilah “Erkiteken Kristen”enda bahasa si ipake kalak Kristen ibas ia atena nehken sura-surana tapi la tersehi.

Kinata kegeluhen si bage situhunna adi sipegermetken ibas tang-tangna kekristenan turah ibas doni enda nggo me jadi sada bagin si la terpesirang ibas kalak Kristen. Emakana adi lit denga kalak Kristen si junggut-junggut ibas situasi si bage, perlu i sadarken kepeken penderitaan, kiniseran ras perbeben enda nggo me jadi hal si melekat ibas diri kalak Kristen. Adi bahasa anak gaul gundari “ngak ada lo ngak rame”. Adi siukuri bage kin. Penderitaan enda pe maun-maun erbahanca “Hidup e semakin lebih hidup”.

Hal si enda me si situhunna coba i turiken rasul petrus ibas :

-          1 Petrus 2 : 4-10

Bagin pengogennta enda, nuriken kata pergegeh ntah pe nasihat man perpulungen si sangana ngenanami perbeben si mesangat kal erkiteken kinitekenna man Tuhan Yesus. Kitab enda eme salah sada kitab surat am, si ertina kitab enda eme surat si itujukken ku melala perpulungen labo terjeng sada perpulungen ngenca. Tapi adi siidah secara umum bagi sidatas ndai, surat enda khusus man perpulungen si sangana ibas perbeben.

Adi siidah ibas bagin pemena .

Ayat 1-3

Bagin enda eme lanjuten penjelasan ibas bagin sope si enda. Ija siidah uga tanggung jawab selaku kalak si nggeluh mbaru ibas diri Yesus Kristus gelah itadingkenna kegeluhenn si la ngena ate Dibata jadi susu (Kata Dibata) e lah tetap jadi penggurun. Erkiteken manusia nggo leben ngenanami kiniulin Dibata ibas geluhna.

Ayat 4-5

Yesus eme batu penjuru janah eme pemilihen Dibata  tapi lit penolaken ibas doni enda nandagi Yesus tapi tetaplah setia  guna perdalanen kiniulin gereja bagepe man kalak sitek

Ayat 6-7

 Yesus si nggo ipilih si erbahanca kalak datken kemalemen bagepe keriahen ukur e pe itulak kalak apalagi pengikut Kristus..

Ayat 8

Tapi labo erkiteken i itulak kalak Yesus e makana manusia  la tek nandangi Yesus. Erkiteken Yesus itulak tapi Ysus e me Ulu ibas kerinana ntah pe palas ibas nggeluh manusia.

Ayat 9-10

Emakana man  kerina si nggo datken kesangapen guna terpilih jadi sikeranjangen Dibata perubahin lagu langkahna bagi kalak si nggo nandai Dibata ula bagi kalak si la tandaina Dibata sidem alu ate keleng..

Bageka pe adi siidah ibas bahannta si peduaken sinibuat :

-          Masmur 22 : 23-32

Bagin enda secara garus besar nuriken kecedaan ate Daud erkiteken kerina persoalen si inanamina tapi adi siidah khususna ibas bahan enda, Daud nggo me ngasup guna ngataken bujur man Tuhan aminna pe ia sangana ibas persoalen si mberat.

Hal sienda si mesera rusur terjadi ibas kalak erkiniteken gundari, bahasa “Move on” ibas perbeben e cenderung mberat, kita ndekahen ndabuh ibas situasi melankolis ibas perbeben e, la kita mis nggit erdalan ku tahapan selanjutna eme tahapan pengangkan erkiteken si terjadi kerina. Emakana perlu kita erlajar arah Daud enda, kai si iturikenna ibas bahan enda, labo ibas situasi si meriah tapi ibas sangana melala perbebenna. Gundari penungkunenna ngasup kin kita bagi Daud enda ngataken bujur mereken pujin man Dibata ibas perbeben si paksana gundari nderpa kegeluhennta?   

-          Aplikasi

Tentuna adi sihubungken dua bahan enda situhunna nggo me si dat titik pangkalna engkai maka Daud tempa-tempa labo lit kebiarenna. Erkiteken kita nggo menang, kita nggo ipilih Dibata. Keterpilihen si ibereken Dibata enda labo keterpilihen si ibahan manusia si banci saja itadingkenna. Pilihan Dibata man kita enda mengandung sada konsekuensi eme Dibata njagai kita ibas kerina situasi si terjadi ibas kegeluhennta. Cuma gundari bagi temanta :

1. Nggit kita muji Ia
2. Nggit kita ngikutken kai kataNa

Adi si e kita ngasup ngelakokenca kita pasti jadi pemenang ibas kerinana.