BIMBINGEN KHOTBAH PEKAN DOA BERNGI SIPEPITUKEN

BIMBINGEN KHOTBAH PEKAN DOA BERNGI SIPEPITUKEN

THEMA:KESAH SIBADIA MEREKEN GEGEH DALANKEN PEDAHNA

Khotbah : 1 Korinti 2 : 9 – 16

-          Pengantar

Nggo 6 wari siikuti pekan doa ibas tahun 2017, adi siukuri tuhu cepat kal doni enda berputar, tempa-tempa baru wari sindebih kita ngerana erkiteken tema Doa pekan sipemena eme “Kutandai Dibata si kusembah” gundari nggo me kepe kita seh ibas wari siterakhir ibas pekan Doa tahun 2017 enda. Adi siperdiateken bahan pekan doanta si kurang lebih 7 wari sidalanken plus 3 wari pra pekan doanta ibas jabunta sekalak-sekalak,

teridah pekan doa tahun enda ngarapken man kita kerina anggota ngawan GBKP gelah lebih mulai peduli nandangi sekelewetta. Ertoto labo terjeng hubungannta ras Dibata tapi nggo me aturenna kita keluar guna cidahken buah pertotonta enda. Bagi kalak ertoto mindo jodoh, tapi la pernah ndarat-ndarat rumah nari, ja nge banci dat. Banci jodohta tukang Koran sinaruhken Koran kurumah ntah tukang tagih tv kabel. Emakana tugasta gundari eme ndarat guna cidahken buah pertotonta.

Tapi la banci ipungkiri ibas kerina keputusen tentuna pasti lit tantanganna. Perban enda nggo lumrah. Ertina kai pe pasti lit tantangenna. Hal sienda me si perlu pemena lebih ipahami ntah pe iangka kerina ngawan ni perpulungen kepeken ibas sura-sura si mehuli enda lit tantangan si nggo nimai kita.

Tapi si enda situhunna ngajari kita guna ndarami dalan guna ngadapi si e kerina. Ibas bahan pengogennta ibas :

-          1 Korinti 2 :9 – 16

Ituriken Paulus uga sekalak manusia gelah banci datkenna kepentaren arah Dibata nari, gelah reh terangna penandaina erkiteken kai harus siibahanna guna ngangkasa si terjadi bagepe guna mentasisa kerina persoalen si ibas paksa si enda lit itengah-tengah perpulungen korinti (perpecahan, pengangkan erkiteken Yesus Kristus). Ibas bahan enda, ikataken Rasul Paulus:

1. Rembak kita ras Dibata

Eme salah sada keuntungan ertoto, adi reh rusurna kita ertoto reh deherna kita ras Dibata reh mbagesna pengangkannta.

2. Alokenndu Dibata

Maun-maun kita lupa, melala kita mindo enda ras enda, tapi tuhu kin kita nggo ngaloken Dibata jadi Dibatanta ? erkiteken adi kita nggo tuhu-tuhu ngaloken Dibata jadi Dibatanta lanai perlu lit kebiaren ibas geluh enda terjeng pesikap saja dirinta guna ndalani si nggo ibahan Dibata guna kegeluhennta

3. Dalanken pedahNa, aminna kai pe siterjadi

Enda me si rusur jadi masalah, adi rembak ninta ntah pe ngaloken Dibata nggo me silakoken, tapi dalanken pedahna enda si masalah.

Ibas bagin enda tuhu ipetangkas Rasul Paulus uga penampat Dibata arah Kesah Si Badia mpengasup kita guna ngalokenca kerina pedah Dibata si harus idalanken kita ibas kegeluhennta tep-tep wari.

-          Aplikasi

Sedekah enda, siidah enterem kalak Kristen tutus ngelakoken kai pe pedah Dibata, tapi la ia ngasup guna nahakenca. Hal sienda rusur terjadi bas kegeluhennta selaku manusia erkiteken enterem kita tetap ngandalken kepentaren si lit ibas dirinta guna ngatasisa ntah pe dalanken pedah Dibata. Kita lupa gegeh ntah pe kengasupen situhu-tuhu enda rehna ibas Dibata nari, emakana adi siinget ibas peringeten wari kenangkihen Tuhan Yesus kusurga kai si padanken Dibata guna jadi pergegeh ntah pe penampat man ajar-ajar eme Kesah Si Badia, erkiteken Kesah Sibadia enda me si pengasup kita guna tetap ngasup erdalan ibas rel Dibata janah tetap ngasup guna cidahken keleng ate Dibata nandangi diri ras teman i sekelewetta. Selamat ngikuti LPS Tuhan Yesus simasu masu .