BIMBINGEN KHOTBAH PEKAN DOA BERNGI SIPETELUKEN

BIMBINGEN KHOTBAH PEKAN DOA BERNGI SIPETELUKEN

THEMA:KEMALEMEN ATE IBAS PERSADAN

Khotbah : Masmur 133 : 1 – 3 

Pdt. Maria E br Sitepu

-          Pengantar

Ibas berngi si peduaken nderbih kita ngerana masalah tutus ras patuh ibas kita ertoto man Dibata, tentuna hal sienda harus tetap siinget selaku kita kalak si erkiniteken man Dibata, gelah pertotonta enda labo jadi hal si bersifat formal saja erkiteken kita kalak Kristen. Tapi tuhu-tuhu mbages kal ertina bas kegeluhennta.

Sedekaha enda enterem kita nggo me tutus ras patuh ibas dalanken si e kerina khususna ibas kita ertoto man Dibata, tapi enterem denga si lenga bo ngangkasa kepeken pertoton enda labo gelah kita banci nuriken perbeben ntah pe mindo man Dibata, tapi kepeken sadar ntah la sisadari Ertoto eme dalan-dalannta mbangun hubungan si mbages ras Dibata ntah pe mbangun kiniersadannta man Dibata. Engkai maka bage, erkiteken adi ertoto, kita nuriken situhu-tuhunna man Dibata ntah pe lalit si terbuni ilebe-lebeNa. Hal si enda me jadi salah sada syarat ibas mbangun hubungan ntah pe mbangun kiniersadan ras Dibata.

Tapi aminna pe bage enterem denga kalak si erkiniteken labo ngangkasa si e, erkiteken pengakapna ertoto e cara siipake guna mindo man Dibata janah enterem denga ka si la ngangkasa kai situhunna untungna membangun kiniersadan ras Dibata arah kejujuran ras ketutusan kita ertoto. Emakana ibas paksa enda, bahan pekan doanta berngi sipeteluken ngajari kita pentingna ertoto guna mbangun kiniersadan ras Dibata. Ibas

-          Masmur 133 : 1-3

Bahan enda situhunna labo bahan si mbaru ibas kalak Kristen, nggo me rusur si begiken bahkan lit enden-enden siibahan kalak arah bahan pengogennta enda. tapi labo kuakap lit salahna ibas wari enda mulihken kita mpebagesi pemahamannta erkiteken bahan enda. masmur 133:1-3 secara historis itulis Raja Daud ibas paksa bangsa Israel sangana berziarah. Tentuna hal enda itulis erkiteken kesadaran pemasmur ntah raja Daud pentingna kiniersadan ibas kegeluhen manusia. Bayak, sehat ras sidebanna e penting tapi inget kiniersadan ibas sapih-sapih kita enda seh kal pentingna gelah kita banci datken kemalemen ate ibas kai pe si lit ibas kita. melala contoh siidah keluarga, Negara, organisasi ras sidebanna sontar ntah pe hancur erkiteken la lit kiniersadan sapih-sapih ia. Emakana ibas bahannta ibas

Ayat 1

Uga ulin ras senangna adi kalak ersenina sada perarih

Engkai maka terjeng kalak ersenina ? adi ibas bahasa Indonesia ipake (saudara-saudara), ertina e ngatakenca labo ersenina darah tapi ersenina ibas pengertin si lebih luas. Adi siukuri kita me situhunna kerina ersenina lalit sada pe kita la ersenina ibas Dibata, emaka kiniersadan ibas kerina jelma enda tentu me jadi sada ketedehen ate jelma sienterem.

Janah ibas kiniersadanta enda kita datken :

1. Minak wangi simeherga (ayat 2)

Analogi minyak enda situhunna ngatakenca bahwa kiniersadan e mereken kita sada hal si luar biasa ntah pe dat hal si meherga si labo menukah datkenca. Janah adi siidah analogina ka tole eme penangkuhen Harun, jadi kiniersadan mereken kita pasu-pasu emekap kuasa (gambaran takal), keriahen, gegeh, kinihagan (gambaran janggut ras gambaran minak e maler ku kerina daging kulanta tentuna enda pe gambaren uga kiniersadan enda erbahanca kita ngasup guna mentasisa kerina persoalen nggeluh) janah kebadiaan (gambaran jubah)

2. Embun (ayat 3)

Enda gambaran pemere Dibata ibas kiniersadannta

Emakana situhunna kiniersadan e sapih-sapih kita saja si ersenina tentuna mereken kita hal si luar biasa ibas kegeluhennta

-          Aplikasi

Emakana situhunna arah bahan pengogennta, sieteh ras sisadari uga pentingna kiniersadan ibas kegeluhen manusia. Apalagi adi sihubungkan ras pekan doannta enda, uga pentingna kiniersadannta ras Dibata ibas pertoton. Adi masmur 133 ngerana terjeng kiniersadan ibas kita ersenina nggo melala janji Dibata man kita. apalagi adi kita ersada ras Dibata, tentuna kemalemen ate ibas dalani nggeluh enda jadi sikerajangennta. Jadi tuhu hal si enda eme pasu-pasu si mbelin man kita kerina.

Tapi genduari persoalen si utamana, nggit kita ersada ras Dibata ? piga-piga hal perlu sipahami gelah kita banci ersada ras Dibata arah pertotonta :

1. Lalit si terbuni

Enda bagi si awal ndai, adi ersada tapi melala si itutupi labo gelarna ersada, ersada eme keterbukaan ibas kerinana, aminna pe mungkin hal si enda mela siakap tapi perlu lit keterbukaan. Memang tuhu Dibata metehsa kerinana, tapi maun-maun Dibata enda nggit ngidah keterbukaan dirinta ibas kita ngerana man baNa

2. Si endesken Dirinta man Dibata

Adi gelarna ersada tentuna, kita harus mereken dirinta seutuhna ibas persadannta ras Dibata, la banci setengah-setengah. Enda si rusur jadi masalah kalak si atena ersada ras Dibata, la tuhu-tuhu ia mereken dirina

3. Nggit kita ngelakoken kai si perentahkenna man banta

Adi kita ersada tentuna pasti lit hak dan kewajiban si datken kita ibas kiniersadannta ras Dibata. Inget kiniersadannta ras Dibata lanai ngerana masalah hak gundari tapi ngerana masalah kewajiban, erkiteken hak ta lenga bo si pindo nggo bereken Dibata jadi marilah sidalanken tanggung jawabta.