BIMBINGEN KHOTBAH 25 MEI 2017 : KENANGKIHEN TUHAN YESUS KESURGA

BIMBINGEN KHOTBAH 25 MEI 2017

KENANGKIHEN TUHAN YESUS KESURGA

THEMA:“JADILAH SAKSI KRISTUS”

Invocatio : II Korinti 3 : 3

Ogen : Masmur 47 : 1 - 10

Khotbah : Perbahanen Rasul-Rasul 1 : 1 – 11

-          Pengantar

Tentuna hal si mberat adi siinget uga situasi ras kondisi ajar-ajar Tuhan Yesus tupung Yesus Kristus mate i kayu persilang. Ceda atena, mbiar ras sidebanna pasti igejapken kerina ajar-ajar erkiteken kalak siarapkenna banci mereken penampar ntah pe mereken kemenangen man ajar-ajar kepeken nggo harus leben mate asangken ajar-ajar enda.

Tapi kenca 3 wari kematen Yesus bagi si nggo sinisurakken ibas padan sindekah kekeken Yesus ibas si mate nari, tuhu la tanggung adi aku erpengakap keriahen ajar-ajar e, emakana adi siperdiateken bahannta ibas paksa enda

-          Perbahanen Rasul-rasul 1 : 1-11

Nuriken uga kejadin kenca Yesus keke ibas si mate nari. Ibas 40 wari waktu si ipake Yesus sope ia nangkih kusurga, siidah lit piga-piga hal silakokenna nandangi ajar-ajar eme :

1. Mereken pedah-pedah man ajar-ajar

Hal si enda tentu perlu ilakoken Yesus nandangi ajar-ajar si kentisik nari itandingkenna i doni enda gelah jadi saksina. Adi ngerana kita masalah pedah tentuna pedah ningen ertina kata pergegeh, ajar ras sidebanna si erbahan ajar-ajar ngasup guna ndalani tanggung jawab si mbaru si ibereken Yesus nandangi ia kerina

2. Membuktikan Yesus nggeluh me

Hal si mungkin adi siukuri ibas paksa enda si harus ilakoken Yesus ibas paksa si e eme buktikenca kegeluhen si lit ibas Ia nandangi ajar-ajarna. Tentuna hal si enda asing ras membingungkan nandangi sebagian kalak. Adi gelarna keke ibas si mate nari tentuna melala kalak mbiar.

3. Nuriken erkiteken Kinirajan Dibata

Sedekah enda adi siperdiateken ibas kitab Injil, labo melala Tuhan Yesus ngerana tangkas man ajar-ajarna erkiteken Kinirajan Dibata, tapi ibas paksa enda tangkas turiken Yesus man kalak enda (la make perumpamaan) gelah arah si enda tangkas man ajar-ajar kai situhunna Kinirajan Dibata e.

Tapi aminna pe bage la banci ipungkiri adi gelarna itadingken kalak si kelengi kita tuhu morah ateta, enda banci siidah ibas bahannta enda khususna bagin sipeduaken ibas ayat 6-11, ija siidah ibas

Ayat 6

Siidah uga ajar-ajar erpengakap gundari Yesus manteki ntah pe mulihken kejayaan bangsa Israel selaku bangsa Pilihen Allah.

Gambaran enda cidahken situhunna lit ketedehan ate ajar-ajar gelah Yesus ciptaken kedamaian tapi kepeken sura-sura ajar-ajar labo bagi sura-sura Dibata

Ayat 11

Bas bagin enda ikataken uga ajar-ajar la nggit lawes janah natap ngenca ku langit sanga Yesus nangkih kusurga. Hal si enda cidahken kemorahen ate ajar-ajar ibas paksa enda, erkiteken mulihken ka ia tadingken Yesus ibas doni enda.

Tapi harus siinget Tuhan Yesus sisada si ngerana gelah ula tadingken Yerusalem erkiteken lit pemere sipadanken Dibata man ajar-ajar si banci mereken gegeh man ajar-ajar guna jadi saksi Kristus ibas doni enda. Emakana ibas pengogennta si pemena ibas :

-          Masmur 47 : 1-10

Bagin masmur enda ngerana keriahen ukur si idatken bangsa Israel erkiteken nggo me talukenna ntah pe datken ia kemenangen nandangi bangsa-bangsa besar, janah kerina kemenangen sidatkenna enda erkiteken penampat Dibata, emakana ibas paksa si enda bangsa Israel ende-endekenna pujin man Dibata erkiteken si kerina. Janah adi siikutken temanta ibas wari kenangkihen Tuhan Yesus enda, bagin masmur enda situhunna ngajari kita, kepeken kenangkihen Tuhan Yesus enda ngajari kita kepeken Tuhan nggo mereken kita kemenangen arah kekeken ras kenangkihen Yesus Kristus, kita nggo ibereken kiningasupen guna naluken dirinta bagepe kalak si la tek man Yesus Kristus gelah kita ngasup guna dalanken tugas simbaru guna jadi saksi Kristus.

-          Aplikasi

Emakana minggu enda ibas kita mperingeti wari kenangkihen Tuhan Yesus ipersingeti kita kepeken lit tanggung jawabta kenca Yesus nangkih ku surga eme jadi saksi Kristus ibas doni enda. Dibata nggo mereken penampat berupa Kesah si Badia ras pemeteh guna dalanken si e, emakana kai situhunna kebiarennta ibas kerinana. Perban arah si e saja nggo me ngasup guna mereken pengasup ras gegeh guna dalanken si e kerina. Emakana marilah kita jadi saksi bagi Tuhannta Yesus Kristus.