BIMBINGEN MAMRE Tgl 02-08 juli 2017

BIMBINGEN MAMRE Tgl 02-08 juli 2017

THEMA:LINGKUNGAN HIDUP

Nats : Kejadin 2 : 4b-15

Pdt. Maria E br Sitepu

-          Penjelasan Teks

Sieteh kerina manusia enda la banci nggeluh sisada, manusia eme makhluk sosial si ibas perdalanen geluhna tergantung ras kalak sideban bagepe ras tinepa sideban. Lalit manusia si ngasup guna geluh sisada ntah pe la tergantung ras ise pe. Hal si enda sipertama perlu lebe ipahami manusia terutama mamre ibas paksa enda, gelah arah si enda kita ate minggu enda membangun kesadaran mamre gelah keleng atena nandangi tinepa sideban, labo terjeng diri ras manusia.
emakana ibas bahannta minggu enda, khususna ibas bahan mamre enda, kita iajuk guna memahamisa uga posisi ras tanggung jawab manusia nandangi tinepa sideban enda.

Emakana ibas bahannta kejadin 2:4b-15, ije nuriken erkiteken peken eden, si eteh kerina eme ingan tading si ibahan Dibata guna manusia si pemena. Ibas bena-bena peken eden enda ibahan Dibata, menarik kal siidah uga salah sada tugas ras tanggung jawab manusia eme guna ngusahaisa ras njagasa kai si nggo leben itepa Dibata. Sedekah enda memang enterem manusia erpengakap ia me tinepa si utama, janah erkiteken si e kerina emakana melala manusia ate-ate saja me eksploitasi tinepa sideban enda guna keutungenna jine. Tapi ibas bahan si enda kepeken Dibata nepa manusia guna ngelakoken sebalikna guna njagai ras ngusahai kerina tinepa enda.

Tapi adi terus kari sioge bahan enda, teridah uga sinuan-sinuan enda bagepe tinepa sideban enda ibahan Dibata guna manusia ka, jadi banci kataken lit simbiosi mutualisme ijenda, ija kerehen manusia mabai keuntungen man tinepa sideban janah tinepa sideban enda pe maba keuntungan man jelma.

-          Aplikasi

Ibas paksa geluh enda, emakana manusia tergantung denga ras tinepa sideban emakana nggo me tanggung jawabta guna njagai ras ngusahai sie kerina. Inget istilah si ipake ibas bahannta eme njagai ras ngusahai, labo terjeng muat hasil ngenca tapi uga njagai si e kerina gelah banci maba kiniulin man kerina.

Adi bas kalak karo si adi tentu siinget melala denga si ngatakenca kerina si lit bas doni enda kerina er tendi emakana perlu sibahan sikap man bana gelah ia pe mereken si terbaik man kita. adi sihubungken si e ras temanta enda tentuna labo kita tek si e kerina, tapi sipahami adi sikap ibahan kita, tentuna pe tinepa sideban enda sikap pe ibahanna nandangi kita. emakana man kita mamre khususna, memenuhi kebutuhen nggeluh nandangi diri ras keluarga eme sada kewajiban si la banci lang ilakoken sekalak mamre, tapi inget ibas si lit denga ka tanggung jawabta selaku manusia si nggo itepa Dibata guna njagai kerina sinasa lit gelah kita pe banci datken keuntungen ibas si e kerina.