BIMBINGEN PJJ Tgl 23-29 Juli 2017

BIMBINGEN PJJ Tgl 23-29 Juli 2017

THEMA:LAWANLAH IBLIS

OGEN:1 Petrus 5 : 8 - 11

Pdt. Maria E br Sitepu

                         

-          Penjelasen Teks

Adi ngerana kita erkiteken tema si seh ku perpulungen ibas minggu enda, situhunna labo ka mesera, erkiteken selaku kalak si erkiniteken man Dibata nggo me jadi tanggung jawabta guna ngelawan Iblis ibas perdalanen geluhta, subuk ibas dirinta bagepe ibas teman-sapih-sapihta. Cuma si jadi maun-maun persoalan, enterem denga perpulungennta adi ngerana masalah iblis maka si terpikir bas ukurna eme kuasa-kuasa si la teridah ntah pe kuasa gelap.

Memang si e labo salah, Cuma adi siidah menurut arti bahasa iblis enda, maka banci siidah, adi bahasa Ibrani Iblis berasal ibas kata SATAN si ertina, memusuhi, melawan, menuduh ras mendakwa ntah pe banci kataken imbang ntah pe kerina kuasa nyata si melawan Dibata ras keterkelinen jelma. Adi ibas bahasa Yunani, Iblis berasal ibas kata Diabolos, si ertina menuduh, memfitnah,

Emakana arah si enda si idah uga kata Iblis enda labo terjeng kuasa-kuasa gelap saja, tapi ise pe si ngelawan Dibata, mereken kata-kata si la tuhu, memfitnah ras sidebanna e termasuk iblis.

Janah hal si enda pe banci siidah ibas bahan pengogennta ibas minggu enda, ibas 1 petrus 5:8-11. Secara umum, bagin enda situhuna ngerana kata nasihat rasul Petrus nandangi serayan ras kalak si nguda denga si lit ibas perpulungen kalak Israel si la tading i tanah Israel ntah pe kalak Israel Diaspora.

Ayat 1-4 ibas 1 petrus 5 enda banci cidahken uga nasihat Petrus man kerina serayan, janah ibas ayat 5-6, uga nasihat Rasul Petrus nandangi kalak singuda. Tapi tentuna aminna pe nasihat enda nggo seh ku kerina serayan bageka pe nandangi anak singuda denga, tapi rasul Petrus tetap erpesan gelah metenget, erkiteken Iblis  banci katawari pe reh guna ganggui kam ibas kinitekenndu man Dibata. Emakana perlu iakap Rasul Petrus gelah :

1.      Paguh Kinitekenndu

Hal si enda si pentingna ibas kita ngenanami kiniseran ibas geluh enda si reh darat nari ntah pe si reh bas nari. Kinipaguhen kiniteken. Erkiteken adi nggo paguh kinitekenndu kai pe si reh lanai kita mbiar guna ngalo-ngalosa

2.      Lawanlah

Adi la kin pas ntah pe payo ibas kinitekennta lawanlah si e, ula rusur kita membijaksanai kai pe dungna kari e banci jadi persoalan si mbelin.

Emakana kedungenna nina rasul Petrus aminna pe nggo me paguh kiniteken janah nggo si lawan tapi reh ia lalap, si aminken me e kerina dalan-dalan si ipake Dibata guna datken kemulian si rasa lalap ibas Kristus nari.

-          Aplikasi

Lawanlah iblis, tentuna jadi tanggung jawabta, tapi perlu siinget bagi bahannta enda, kai pe si la ngena ate Dibata e kerina Iblis, emakana ibas paksa si enda perlu ka sisadari ntah sedekah enda siakap e Iblis tapi kepeken la sisadari iblis enda nggo me deher ras dirinta. Emakana perlu kita metengget janah tetap min paguh kinitekennta gelah enda dalan-dalan si mpengasup kita guna ngelawan si e kerina.