BIMBINGEN PJJ Tgl 09-15 Juli 2017

BIMBINGEN PJJ Tgl 09-15 Juli 2017

Thema:BENAKEN IBAS GELAR TUHAN

BAHAN:Jakup 4 : 13 - 17

Pdt. Maria E br Sitepu

-          Penjelasen Teks

Rencana ntah pe sura-sura tentuna lit ibas kerina kegeluhen manusia si nggeluh ibas doni enda. Lalit sada pe manusia si la ersura-sura ibas kegeluhenna. Hal si enda tentuna erkiteken manusia eme tinepa si erpengarapen gelah kegeluhen reh ulina wari lepas wari.

Emakana guna datken si e kerina perlu sura-sura ibas kegeluhen gelah perdalanen geluh enda banci teraturken ras lit si man tujun ibas geluh enda.

Tapi maun-maun la banci sipungkiri ibas datken sura-surana, enterem manusia terjeng ngadalken kengasupen si lit bas ia. Iakap manusia arah kengasupen ntah pe kebeluhenna ia ngasup datken kerina sura-surana enda.

Salah e mungkin kata si paling tepat ibas pemahaman manusia, erkiteken sadar ntah la sisadari aminna kita nggo ersura-sura perdalanen geluh enda la terprediksi sitik pe kai si banci jadi emakana perlu lit gegeh sideban ibas si e kerina.

Kitab pengogenta ibas paksa enda eme kitab si itulis sekalak serayan ibas gereja yerusalem si mereken pengajaran ntah persinget si praktis nandangi perpulungen siituju surat enda. Kemungkinan besar tujun kitab enda eme kalak yahudi si nggo tading i darat tanah Israel janah nina piga-piga literature kemungkinansi ituju surat enda eme perbinaga ras nggo dewasa secara kiniteken, tapi iakap perlu denga kata persinget guna ia tetap ngasup dalani ras mpekena perbahanen-perbahanenna bagi si ngena ate Dibata.

Emakana adi siperdiateken bahannta enda ibas

Ayat 13

Tangkas kal kepeken lit sura-sura si mbelin si iarapken kalak enda ibas ia ate guna erbinaga eme untung si mbelin. Emakana perlu lit kata persinget bagepe pergegeh nandangi kalak enda eme

Ayat 14

Kegeluhen enda lalit ise pe metehsa kai si banci jadi. Manusia banci ersura-sura tapi labo manusia banci mutuskenca Dibata me si mutuskenca kai si banci jadi

Ayat 15

Pengendesen man Dibata ibas kerina rencana si nggo ibahan kita, gelah kita ngasup guna ngalokenca kai si terjadi

Ayat 16

Ula percaya diri kal. Percaya diri e penting tapi adi terlalu banci jadi dungna kecewa kita, erkiteken asakai kin gegeh ras kengasupennta guna ersura-sura keputusan e itangan Dibata erkiteken ia metehsa kai si butuhken kita

Ayat 17

Tetap dalanken kai si mehuli i lebe-lebe Dibata aminna pe mungkin hal si enda la erbahanca kita datken sura-suranta.

-          Aplikasi

Benaken ras dungi kai pe ibas gelar Tuhan, enda hal si pentingna ibas dalani kegeluhen, gelah kai si isura-suraken kita banci tersehi. Janah aminna pe mungkin enda la tersehi tapi ibas pengendesennta man Dibata kerina kita ngasup ngalo-ngalosa kai si bere Dibata man banta. Gundari tading kita ngaloken si mehuli janah si terbaik asa ngasup ras gegehta guna datken sura-suranta. Selebihna bereken man Dibata kerina perban sieteh Dibata ngenca metehsa kai kin si butuhken anak-anakNa ibas kegeluhen i doni enda.