BIMBINGEN MORIA 9 - 15 Juli 2017

BIMBINGEN MORIA

MEDIATE RAS KEPATE

Matius 25 : 31-46 

Pdt. Maria E br Sitepu

-          Penjelasen Teks

Adi kita ngerana tema moria minggu enda, situhunna hal sienda la banci pungkiri lit ibas diri morianta sekalak-sekalak. Hal sienda banci siidah ija moria ntah pe  diberu adi persoalen lit kemalangen ntah pe kejadin-kejadin si la bagi ukur ibas tengah-tengah jabu biasana moria me si pemenana mediate ras kepate ibas kai si inanami i tengah-tengah jabu.

Tentuna hal si enda la banci lepas ija sekalak diberu rusur make perasaanna. Emakana adi ngerana masalah mediate ras kepate lanai banci si pungkiri kerina moria enda aminna pe mungkin lit si la bage tapi hamper kerina moria i belang-belang doni enda mediate ras kepate nandangi jabuna. Tapi persoalen gundari enda labo ngerana uga sifat moria i tengah-tengah jabuna, tapi uga sifat moria si mediate ras kepate nandangi kejadin-kejadin si lit ibas tengah-tengah masyarakat.

Melala siidah moria gundari adi nandangi jabuna seh kal mediate ras kepate kal ia, tapi adi nandangi lingkunganna melala denga moria si “cuek-cuek bebek” maksudna jenda la diatena padahal la banci pungkiri kita nggeluh ibas tengah-tengah masyarakat, kai si terjadi i tengah-tengah masyarakat ingannta tading tentuna berdampak nandangi diri ras jabuna. Hal si enda perlu lebe ibereken pemahaman man morianta.

Salah sada contoh sederhanna eme adi lingkungannta kalak si gunaken narkoba, lambat laun pasti lit keluarganta si banci terpengaruh ibas si e, emakana ituntut moria guna mediate ras kepate ibas si e.

Ibas bahan pengogennta ibas matius 25 : 31-46

Ituriken Tuhan Yesus kai si banci jadi ibas wari si pedungi nandangi manusia.

Ibas ayat 31-34

Bagian enda ncidahken uga Dibata membagi manusia ibas 2 terpuk, sada arah kawes sada arah kemuhen.

Hal sienda ilakoken Dibata nandangi manusia si ngelakoken hal si mehuli nandangi diri Tuhan (ibas ayat 36)

Tapi tentuna enda jadi sada kebingungan man manusia erkiteken uga maka banci ia mereken pelayanen man Dibata ibas kegeluhenna adi Dibata enda la pernah iidahna.

Hal si enda ijabab Yesus ibas ayat 40, ija siidah pelayanen man Dibata seri adi silakoken nandangi temannta si “musilna”. Ertina Dibata ngarapken pelayanan si bereken manusia enda banci tersehi man kerina jelma la erndobahen. Gelah arah si enda manusia la datken ukumen ibas wari pendungi.

-          Aplikasi

Bas bagin enda cidahken seh kal pentingna pelayanen nandangi sesama, erkiteken enda banci jadi sada ukuran uga kekelengennta nandangi Dibata. Ibas minggu enda moria pe iarapken gelah ngasup guna cidahken kekelengenna nandangi masyarakat sekelewetna arah ia mediate ras kepate nandangi situasi ras masalah-masalah si lit terjadi ibas masyarakat sekelewetna. Arah sienda pe nurikenca masalah masyarakat labo terjeng konsumsi kaum perbapan, tapi kerina kita harus muat bagin ibas si e kerina, gelah banci arah enda ka si cidahken kekelengennta man Dibatanta.