BIMBINGEN MAMRE Tgl 16-22 Juli 2017

BIMBINGEN MAMRE Tgl 16-22 Juli 2017

Thema:PERENCANAAN PERBELITEN

Ogen:Kejadian 41 : 39 – 49 

Pdt. Maria E br Sitepu

-          Penjelasen Teks

Kerina manusia ibas doni enda tentuna lit kerina sura-surana subuk e man dirina, jabuna ras pendahinna. Emakana ibas dungi ntah pe peseh sura-sura enda, salah sada hal si paling penting eme perencanaan perbeliten ntah pe perencanaan keuangan.

Sadar ntah la sisadari situhunna adi kita ngerana masalah perencanaan perbeliten, kita harusna meteh kepeken perencanaan perbeliten enda labo terjeng ngerana masalah asakai jumlah sen si harus ipesikap ibas peseh sura-suranta tapi kita ngerana masalah uga ngaturken si nggo lit ibas kita guna datken sura-surannta.

Jadi memang sedekah enda masalah si mberatna bas kita eme masalah ngaturken keuangan labo masalah kurang, tapi uga kita ngaturken si lit ibas kita e.

Ibas bahanta mamrenta sekali enda, banci kita erlajar arah bahan enda :

1.      Memilih si ngaturken perbeliten i tengah-tengah kegeluhennta.

Ibas ayat 40, banci siidah uga raja mesir erkiteken idah kebeluhen Jusup emakana ipilihna ia guna ngaturken si e kerina. Hal si enda pe penting ibas perdalanen geluhta. Sieteh kerina kita tentuna lit si beluh ibas ngaturken si enda lit ka si la beluh, emakana ibas sie mamre perlu ka megermet, apai kin kalak si beluh banci kita erlajar arah ia ntah pe si bereken man bana guna ngaturken keuangan i tengah-tengah jabu. contohna bereken man moria. Erkiteken biasana adi lebih sekalak jelma si ngaturken keuangan e cukup repot kari dungna jadina.

2.      Bertanggung jawab ibas dahin e

Adi siidah ibas bahannta enda, siidah uga Jusup seh kal bertanggung jawabna nandanngi kai tanggung jawab si bereken raja man bana. Hal enda  penting ibas tanggung jawab ngaturken keuangan. erkiteken melala kita la tutus ntah pe setengah-setengah saja ibas tanggung jawab enda. Hal si enda me si maun-maun erbahanca lanai kita ngasup guna ngaturken si e kerina janah adi siidah ibas bahannta enda tole, siidah uga raja mesir la tanggung-tanggung mereken tanggung jawab man Jusup, hal si enda pe perlu ipelajari kita ibas ngaturken si enda, bagi si arah awal ndai, lit kuakap perpayona adi sekalak saja si memang tutus guna dahiken dahin enda, gelah kerina reh raturna ibahanna.

3.      Makeken si lit ibas kita

Adi siidah ibas ayat 47-48,  uga Jusup mulai mpepulung kerinana ibas 7 tahun siriba-riba enda guna7 tahun si reh kari bagi erti nipi raja mesir, emakana hal si enda cidahken ibas kita maun-maun kita enda terlalu boros, melala situhuna kebocoran-kebocoran anggaran ibas geluhta si maun-maun banci si pakeken guna sura-suranta tapi erkiteken la lit kalak si sadar guna ngaturken si e emakana maun-maun mesera siakap kegeluhen enda.

-          Aplikasi

Emakana ibas minggu enda, mamre iajuk gelah nggit ikut muat bagin ibas perencenaan perbeliten aminna terjeng bas jabuna saja, gelah kai sura-sura ibas tengah-tengah jabu banci tersehi. Sedekah enda me siidah uga mamre cenderung lepas tanggung jawab adi masalah enda, cenderung mamre focus ku ndarami sen tapi penggunaanna labo. Emakana perlu kuakap mamre gundari nari perlu jadi semacam tim verifikasi keuangan jabu, gelah tuhu-tuhu kiniraturen erdalan ibas geluhta enda. Janah sura-suranta pe banci tersehi kerinana.