BIMBINGEN PERMATA Tgl 16-22 JULI 2017

BIMBINGEN PERMATA Tgl 16-22 JULI 2017

THEMA:ERMALU-MALU

Ogen:Kuan-Kuanen 12 : 24; 22:29 

Pdt. Maria E br Sitepu

-          Penjelasen Teks

“Ermalu-malu kita nakku adi kalak mesera kita”, kata enda ntah pernah si begi ndarat ibas orang tuannta sekalak-sekalak khususna permata, cakap enda situhunna nuriken uga kita selaku sekalak jelma ibas doni enda gelah menyadari ise kin dirinta, kai kin tanggung jawabta janah kai harus ilakoken kita. emakana tentuna sisadari kerina kita pasti lit tanggung jawabta ibas kegeluhen enda, subuk kita mamre, moria, KAKR bageka pe man anak-anakta permata. Jadi banci ipake cakap bagenda, “Ermalu-malu lah kita adi kita Mamre, moria,ntah pe permata”.

Terkhusus man permata hal si enda penting guna jadi persinget man permata, gelah sadarina ise kin diri ras tanggung jawabna, erkiteken sedekah enda enterem siidah permata, erkiteken iakapna muda denga ia lanai lit tanggung jawabna, emakana ibas kinigudaanna e, jadi jelma perkisat ia, subuk ibas pendahin, bage ka pe ras Dibata. Hal si enda tentuna labo jadi harapen man permata, erkiteken sieteh permata eme posisi ntah pe masa si sangat menentuken kegeluhenna adi nggo ia erjabu, kai silakokenna gundari e berdampak kai si banci terjadi ibas kegeluhenna ibas wari sir eh, emakana iarapken man permata gelah sadar lebe tugas ras tanggung jawabna ntah pe ermalu-malu selaku sekalak permata.

Ibas bahan pengogennta si pemena si ibuat ibas kuan-kuanne 12 : 24, tentu sieteh kerina kuan-kuanen eme kitab si melala ngerana masalah pengajuk ntah pe kata hikmat raja Salomo man kerina bangsa Israel, subuk selaku orang tua, anak-anak ras kerinana, emakana ibas ayat 24 siidah uga raja Salomo nurikenca ulih kalak mejingkat ibas geluhna, eme kekuasaan. Kekuasaan e  tentuna labo terjeng masalah kekuasaan bagi si pahami kita ngenca, tapi kekuasaan man dirinta ka. Janah adi  jadi kalak perkisat ulihna eme jadi kalak suruh-suruhen me pagi.

Bagin enda situhunna la perlu kita ngerana wari si pepagi nggo me banci siidah ibas kinata kegeluhennta si gundari, enterem kita kalak Indonesia enda erkiteken kisatna, subuk erlajar, rsdna kerina gundari lanai banci jadi kai pe, ia terjeng banci jadi suruh-suruhen, erkiteken la lit kompetensi ntah pe kebeluhen erkiteken ulih perkisat ndai janah adi siidah enterem kalak si berkuasa gundari tentuna enda kerina bekas kinijingkatenna marenda, aminna pe mungkin ibas kinijingkatenna e nai melala si man alankenna ibas perdalanen geluhna, tapi gundari kinijingkatenna maba hasil ibas geluhna. Janah adi siidah ibas kuan-kuanen 22:29, salomo ngulihi mpertegas uga ulih kinijingkaten man kalak Israel.ibas kitab enda eme ulih kecakapen ntah pe kemahiren eme ndatken pengakun,penghormatan,promosi,,kelimpahan ras kecukupan.rsd.,

-          Aplikasi

Emakana marilah ibas bahan permatannta minggu enda, sisadarilah ise kin kita, kai tanggung jawabta, kai harus ilakoken kita, kai harus ibahan kita terkhusus man permata, kai silakokenna gundari e tentuna mereken dampak ibas kegeluhenna ibas wari si pepagi. emakana man permata mejingkatlah ibas dahiken dahinndu erkiteken kinijingkatenndu enda maba ulih si mehuli man bandu.