BIMBINGEN MORIA TGL 23-29 Juli 2017

BIMBINGEN MORIA TGL 23-29 Juli 2017

THEMA:MABA PERUBAHAN (AGEN PERUBAHAN)

OGEN: Jesaya 61 : 1 - 2

Pdt. Maria E br Sitepu

-          Penjelasen Teks

Tentuna sada hal si jadi arapen man kerina kalak adi kehadiran ntah pe kerehenna ku bas sada ingan banci maba perubahan nandangi kalak si lit ije khususna perubahan kuarah si mejile. Tapi hal si enda labo hal si cukup menukah jadi ibas geluhta, erkiteken manusia enda lit kerina biak ntah pe sifat bas dirina sekalak-sekalak,

janah erkiteken si e maun-maun la ia nggit berubah aminna pe mungkin perubahan si e banci maba peningkatan ibas kegeluhenna subuk ekonomi, kiniteken ras sidebanna kerina. Hal enda banci siidah ibas tanah karo, uga nggo me melala kalak si reh guna mereken cara guna erjuma, tapi erkiteken iakapna dirina ngenca si beluhna, hal si e la banci erdalan.

Enda me sada gambaran uga perubahan e situhunna penting nandangi sekalak jelma khususna perubahan kuarah si mehuli. Perubahen ku arah simehulina enda jadi pengarapen janah rehna arah Dibata nari ngenca, sebab kerina simehuli reh ibas Dibata nari. Janah padan Dibata pe mpelimbarui kegeluhen manusia.

Arah bahanta enda Dibata nehken padanNa man bangsa Israel si nggo mulih ibas tanah pembuangan nari. Padan Dibata eme maba perubahen nggeluh man bangsa e, ija selama enda bangsa enda nggejabken kegeluhen s idem alu perbeben. Kiniseran, kemusilen, penabanen, enda kerina jadi persoalan si kompleks man bangsa e. nabi jesaya ipake Dibata guna nehken perubahen kempak bangsa e, perubahen kegeluhen  nandangi si musil tentuna kecukupen nggeluh, si getem pusuhna tentuna keriahen situhu tuhu, ras si tertaban tentuna pembebasen. Dibata ngasup ngelakokensa si e kerina kempak bangsa Israel si nterem e, sebab Dibata e erkuasa janah cidahkenNa atena kekelengenNa man bangsa e arah perbahanenNa. Kata enda me mpetetap ukur bangsa enda gelah aminna pe situasi ingan tading berubah tetap ia ngasup ndalanisa sebab ietehna Dibata singkawali Ia (ayat 2).

Tapi perubahan e banci igejabken bangsa e adi bangsa e nggit dingen ngakuken Tuhan selaku Tuhan ras juruselamat. Tentu perubahen e banci jadi nyata adi nggit bangsa e ngaloken perubahen si rehna ibas Tuhan nari. Emaka perubahen siituntut Dibata man banta eme perubahen sikap nggeluhta, si ndube lanai erkiniteken dingen erpengendes man Dibata jadi mulihi erpengendes man banNa.

-          Aplikasi

Kegeluhen doni enda pe menuntut manusia lako berubah, janah setiap manusia pasti erpengarapen guna ndatken perubahen si mehuli. Lit nge sura sura bas pusuh tiap jelma segelah banci min situasi geluhna iubahken, mungkin si musil banci min bayak, si kelungunen banci min lit temanna meriah, si melihe banci min man, si lenga dat dahin banci min dat dahin. Tentuna kerina situasi geluh end abanci berubah adi tekkita man Dibata si mereken perubahen/ simpelimbarui geluhta. Adi la kita tek, labo banci kita berubah ku arah simehuli sebab tangkas kel simehulina nge siibereken Dibata man banta. Selaku moria kita ituntut banyak berubah ibas geluhta, semakin dewasa selaku nande, cara pengerana, perukuren, bagepe perbahanennta harus berubah adi kin gelarta enggo moria. Mari sibereken Dibata muat bagin ngerubah kegeluhenta, au kai? Tentuna alu perbeben geluh doni enda Dibata ngerubah kita. si la beluh ersaber ate, ibereken persoalan si menuntut kesabaren gelah ergegehna arah latihen kegeluhen e. kenca nggo terjadi perubahen bas geluhta moria pe ituntut jadi agen perubahen, simaba perubahen pe kempak kegeluhen kalak si deban, bahkan adi banci kit ape beluh min ngajuk kalak si deban guna ngobahken kegeluhen kalak sideban. Sada ulu gegeh e eme kap Dibata si mpengasup kita.