BIMBINGEN MORIA Tgl 02-08 Juli 2017

BIMBINGEN MORIA Tgl 02-08 Juli 2017

THEMA:BELASKENLAH KEBENAREN DIBATA!

Nats:Perbahanen Rasul-Rasul 4 : 8-22

Pdt. Maria E br Sitepu

-          Penjelasen Teks

Kenyamanan eme tujun kerina manusia ibas doni enda, melala hal si ibahan manusia gelah banci iakapna nyaman ibas kegeluhenna subuk rumah, kendaraan ras sideban si tentuna mereken kenyaman lebih ibas ia dalani kegeluhenna enda.

Tapi sadar ntah la sisadari situhunna kenyamanan si ibahan kita eme kenyamanan si la tuhu-tuhu nyaman ibas ertina situhuna, erkiteken adi siidah gundari kinata kegeluhennta, melala hal-hal si mungkin terjadi ibas geluhta si la bagi ukurta subuk e ibas jabunta, masyarakat ingannta tading ras ingannta erdahin, tapi erkiteken nggo me jadi sada kebiasaan gundari lanai siakap la nyaman ibas si e kerina. Padahal adi rikutken kinitekennta gundari, kai si la pas ibas geluh enda khususna perbahanen si la ngena ate Dibata, kita selaku kalak si metehsa e la pas situhunna lit tanggung jawabta guna ngatakenca kai si pas na guna idalanken, tapi endamia masalahna lanai kita pang ntah pe nggo me siakap labo dalih si e kerina. Emakana bagi sikukataken ndai, kenyamanannta enda situhunna labo kenyamanan si tuhu-tuhu tapi kenyamanan si ibahan kita saja.

Ibas bahan pa morianta minggu enda, siidah uga rasul Petrus ras Johanes pang ngatakenca kai situhu-tuhuna i lebe-lebe pengadilen agama.masalahna ija kenca Petrus rsa Johanes mpepalem kalak sipangpangen ibas Rumah pertoton. aminna pe mungkin resiko si banci idatkenna eme hukuman mati, tapi si e kerina labo mepesurut rasul enda duana guna ngatakenca kai kin situhuna eme ibas gelar Yesus Rasul e mpepalemsa. Emakana lit piga-piga hal si banci ipelajari kita ibas nuriken kebenaren Dibata arah bahan enda :

1.      Ayat 8

Kesah Si Badia si mpengasup Rasul e nuriken kata situhu-tuhu aminna lit resiko

2.      Ayat 13

Adi nuriken kebenaren Dibata labo masalah ganjang teruhna pendidiken tapi kininggiten

3.      Ayat 14

Jadiken  contoh ibas dalanken kebenaren Dibata

4.      Ayat 19

Ngerana kebenaran Dibata alu kiniteruken ukur

5.      Ayat 20

 melala tantangan , tapi si e labo erbahanca maka  la nuriken kebenaren Dibata.

-          Aplikasi

Adi siukuri secara manusia memang tuhu hal enda seh kal meserana ngelakokenca, erkiteken :

1.      Nggo me jadi biak

2.      Enterem manusia lenga siap guna ngaloken kebenaren Dibata

Tapi si enda kerina labo erbahanca kita surut ibas nurikenca kebenaren Dibata. Banci jadi lalit perubahan si teridah, tapi si pasti kita harus nuriken si e kerina. Erkiteken salah sada tanggung jawab kita selaku kalak si erkiniteken eme mereken kekelengen nandangi kerina jelma. Adi ia nggo ibas dalan si salah la si kataken tentuna kita la keleng nandangi temannta. Makana marilah ibas kerina tantangan si pasti lit manjar-manjar kita guna ngelakoken si e.