BIMBINGEN KHOTBAH 30 JULI 2017

BIMBINGEN KHOTBAH 30 JULI 2017

MNGGU KUASA DIBATA MENANG NANGDANGI KUASA KEGELAPEN

THEMA:“SEMBAHLAH DIBATA SAJA”

Invocatio : Mazmur 97:7

Ogen : Kejadian 31:31-35

Khotbah : Ketangkasen 14:6-12

Pdt. Maria E br Sitepu

-          Pengantar

Adi ngerana kita erkiteken penembahan man Dibata, tentuna kerina enda eme hak setiap kalak, dibata siapai kin ate si igejapken kita sebagai dibata si mereken keterkelinen janah mereken penampat man kita ntah pe situhu-tuhu mperdiateken kita, tentu eme dibata si sembah kita. bage kape kita kalak Kristen,adi nggo si tentukan Yesus Kristus eme Juruselamat ras Dibatanta ia saja si patut isembah kita lalit dibata sideban.

Tapi ijendalah persoalenna adi kita ngerana erkiteken temanta ibas minggu enda eme sembahlah Dibata saja, ertina perlu lit sikap kita adi nggo siakuken janah nggo sialoken Dibata (Yesus Kristus) jadi Dibatanta. La banci nari gundari sibahan dibata-dibata pendamping nandangi Tuhan Yesusta. Sedekah enda me rusur bage siban, melala sibahan dibata-dibata sideban guna mendampingi dibata si sembah kita. padahal sieteh Dibatanta enda simada kuasa, emakana lanai perlu lit kebiaren ibas dirinta dalani geluh enda.

Hal si enda banci sinin ibas bahan pengogennta ibas  

-          Kejadian 31 : 31-35

Sope kita ku bahan pengogennta enda, perlu lebe siinget-inget mulihi ise kin laban enda, laban enda eme turang ribka, emakana ia eme mama Yakub ras esau, tentuna siinget uga cerita erkiteken hak kesulungan si ibuat Yakub arah Esau, si erbahanca turah pernembah ate Esau emakana erkiteken si e Ribka nuruh Yakub gelah lawes ku rumah mamana laban. Ibas rumah laban enda me arah kiniseran si mesangat kal emakana Yakub banci muat rahel ras lea anak mamana jadi ndeharana. Janah jenda me ibenaken bahannta enda, erkiteken iakap Yakub perbahanen mamana tempa-tempa la adil, emakana lawes ia ras dua diberuna bage kape harta sibereken mamana man bana, tapi erkiteken rahelnangko terafim ntah pe dibata-dibata bapana emakana nembeh ate Laban nandangi Yakub, erkiteken labo persoalen ia lawes adi kin memang guna dahi orang tuana, tapi ula min baba dibata-dibatana si sedekah enda iakap laban maba kesangapen i tengah-tengah jabuna.

Ibas bahan enda si tuhuna lit piga hal banci si nin :

1. Dibata e la banci I wujud nyatakan ibas sada benda

Maksudna bagenda, rikutken temanta sendah, uga kin maka banci dibata i tangkoi kalak, dibata si sembah kita aturenna dibata si mereken kemalemen ntah pe ketenangen man banta ntah pe dibata si njagai kita labo ka dibata si banci ibuat kalak. Ntah adi istilah gundari adi nina Gus Dur “Tuhan itu tidak perlu dibela”.

2. Dibata jagaina kita katawari paksa pe alu cara si mungkin la iangka kita

Hal si enda si terjadi nandangi Yakub erkiteken adi la Dibata si persingeti laban, ntah kai si banci jadi ntah kai si ilakoken laban man Yakub

3. La perlu siduaken Dibata

Bahan pengogennta cidahken uga maka rahel tetap denga tek nandangi dibata si sembah bapana si banci maba kesangapan man banta.

Emakana marilah si sembah Dibatanta si nggo mereken bukti keleng atena man dirinta. Tapi perlu ka siinget, adi nggo si padanken emakana perlu bukti bagekape sikapta guna tetap nembah man Dibata si nggo ipilih kita, erkiteken ibas

-          Ketangkasan 14 : 6 – 12

Si melala ngerana erkiteken pengenehinen Rasul Yohanes i Pulau Patmos erkiteken wari si lebe ntah pe masa depan, maka ituriken ibas bahan pengogennta erkiteken 3 malaikat si reh kubas doni guna

1. Meritaken berita simeriah ibas Dibata nari sila ermasap-masap guna iberitaken man manusia gelah erkemalangn man Dibata
2. Nuriken kuasa doni si nggo italuken kuasa Dibata enda icidahken ali keruntuhen negara babilon simbelin
3. Nuriken manusia  lanai nembah man Dibatta tapi isembahna dibata-dibata sideban labanci lang isiksa ibas api ras kertah ilebe-lebe malekat sibadia  ras anak Biri-biri Dibata.

Erkiteken si e me makana lit pagi penghakiman man kalak si lanai nembah man Dibata. Hal si enda tentuna jadi sada resiko man kita adi kin kita nggo ngakuken tapi labo nembah man baNa janah erkiteken si enda kape kita datken kiniseran ibas penghakiman enda. Tapi si menarik banci siidah ibas ayat 12 ija ikatakenna jenda adi man kalak si ngikutken ras setia man Jesus labo banci kena sib agenda rupana ibas masa penghakiman. 

-          Aplikasi

Minggu enda kita masuk ku minggu minggu kuasa Dibata menang nandangi kuasa kegelapan. Sedekah enda hal si enda terjeng konsep saja man kita, apalagi ibas situasa-situasa bagenda rupana, erkiteken melala kalak nggo mulai sadar ntah la sisadarina nggo nembah man dibata-dibata sideban, hal sienda me sierbahanca nembeh ate Dibata, khususna adi siidah ibas 10 Hukum Taurat, siidah uga Dibata mereken porsi si cukup besar erkiteken nembah man dibata-dibata sideban. Emakana perlu nge  sisadari gundari, mungkin ibas paksa gundari enda lanai bo kita berhadapan ras kuasa-kuasa gelap bagi si lit bas kuta-kuta, tapi kita nggo berhadapan ras kuasa-kuasa gelap si lebih modern si tentuna lebih nukah erbahanca kita nilah arah kinitekennta man Dibatanta. Gundari e jadi PR tar as-ras gelah saling mpersingeti janag mpegeghi gelah tetap min kita nembah man Dibata si tuhu-tuhu si mereken kemalemen janah nggo mereken bukti keleng ateNa man banta.