BIMBINGEN MAMRE Tgl 06-12 Agustus 2017

BIMBINGEN MAMRE Tgl 06-12 Agustus 2017

Thema:PANG NJAYO

Nats : 2 Tesalonika 3 : 6-15

Pdt. Maria E br Sitepu

-          Penjelasan Teks

2 tesalonika eme surat si itulis Rasul Paulus nandangi Perpulungen i Tesalonika, secara umum surat 2 tesalonika enda, berbeda ras surat si pertama, erkiteken ibas surat pertama berisi pergegeh janah jawaban penungkunen-penungkunen si ibereken perpulungen Tesalonika nandangi Rasul Paulus.

Tapi adi siidah surat si peduaken enda lit masalah si terjadi ibas perpulungen tesalonika, erkiteken timbulna ajaran-ajaran sesat ntah pe ajaran Gnostik si ngatakenca :

1.      Kerehen Dibata si peduakaliken nggo seh (Parousia)

Hal si enda erbahanca kebingungan ibas tengah-tengah perpulungen Tesalonika paksa si e. emakana perlu iakap Rasul Paulus guna tetap mereken pergegeh ras penjelasan erkiteken pengajaran si la tuhu ndai.

2.      Lanai ia perduli nandangi dirina (daging) erkiteken pengajaran gnostik ndai si ngatakenca nggo me dagingta enda ntah pe dirinta nggo sempurna erkiteken penampat kesah si badia

Hal si enda me si erbahanca kalak Tesalonika nggo mekisat janah lanai ia dalanken kai si harus ilakokenna ibas tengah-tengah kegeluhenna.

Emakana erkiteken si enda, siidah ibas bahan pengogennta, Rasul Paulus ngajuk perpulungen Tesalonika gelah :

1.      Ola Kisat guna dalanken kai si ngena ate Dibata

Ibas ayat 6,7,13,14 iajarken rasul Paulus man perpulungen tesalonika, erkiteken kai si harus ilakokenna rikutken kinitekenna man Dibata.

2.      Ola Kisat guna darami kebutuhan geluh

Ibas ayat 8, 9,10,11,12, teridah uga Rasul Paulus labo terjeng persoalan Rohani saja iperdiatekenna tapi iperdiatekenna persoalan kebutuhan perpulungen Tesalonika ibas paksa si e. ibas bagin enda teridah uga Rasul Paulus ngarapken lit sada prinsip ibas kalak Tesalonika gelah nggit tetap nggeluh bagi si jadi kewajibanna labo bergantung man kalak ntah pe ngarapken kai si labo sikerajangenna. 

-          Aplikasi

Emakana ibas minggu enda eme minggu budaya man mamre, ipersingeti kita man mamre salah sada budaya si lit ibas kalak karo eme Njayo ntah pe ibas bahasa Indonesia Mandiri. Njayo eme salah sada sikap si arapken lit ibas masyarakat karo si nggo me ia erjabu. Ertina njayo enda eme lepas arah ketergantungan nandangi keluarga gelah ia pe banci ngurusi dirina sisada alu kiningasupen si lit ibas ia.

Ibas bahan pengogennta situhunna cukup tangkas man kita kerina uga Rasul Paulus ngarapken perpulungen Tesalonika gelah ngasup Njayo ibas kegeluhenna khususna selaku kalak Kristen. Njayo si maksudken ijenda adi siidah lit 2 eme :

1.      Njayo secara Kebutuhan nggeluh

Tentuna enda nggo me jadi kebiasaan ntah pe sieteh kerina adi ibas kalak si nggo erjabu iarapken ia nggo me harus dalanken kerinan alu kiningasupen si lit ibas ia ntah pe lanai tergantung 100 % nandangi keluarga. Sedekah enda melala denga siidah keterbalikan si terjadi, memang payo kita la banci 100 % lepas arah keluargannta, tapi persoalenna ijenda eme persoalen kebutuhen. Maksudna sedekah enda me si erbahanca maun-maun kita la ngasup guna njayo alu tuhu erkiteken kebutuhan. Salah sada hal si harus ipahami kita ibas pengertin njayo eme ngasup guna makeken kai si lit ibas kita guna memenuhi kebutuhannta emakana adi kalak njayo ulanai ingetna ia uga gel-gel, tapi kai si lit ibas ia pakekenlah guna ncukupi kebutuhan geluhna.

2.      Njayo Secara kiniteken

Melala denga kita ikataken Kristen tetapi lenga njayo kita secara kiniteken, lit denga ka kita tek nandangi kiniteken-kiniteken si adi. Hal si enda me siarapaken Rasul Paulus nandangi perpulungen i tesalonika gelah ia ngasup njayo labo secara kebutuhan ngenca tapi secara kinitekenna.

Emakana ibas minggu ipersingeti kita erkiteken budayanta eme Njayo, gelah labo terjeng persoalen geluh ngenca kita ngasup njayo tapi ibas kiniteken bage ka pe ibas perukuren kita ngasup Njayo. Gelah tuhu-tuhu Dibata saja si jadi ingannta ernalem bas kegeluhen enda.