BIMBINGEN MORIA Tgl 06-12 Agustus 2017

BIMBINGEN MORIA Tgl 06-12 Agustus 2017

Thema:BIAK SI NGAMBATI KEMAJUN

Nats : Bilangen 14 : 1-13

Pdt. Maria E br Sitepu

-          Penjelasan Teks

Bilangen eme salah sada kitab ibas kitab pentateukh si ipercayai eme hasil Tulisan Nabi Musa. Tentuna melala si nggo metehsa adi ngerana kita ntah pe ernin judulna saja, terutama adi siidah ibas bagin-bagin pemena kitab enda, kitab enda ngerana masalah perhitungen ntah pe sensus si ilakoken nandangi kalak Israel ibas paksa si e.

tapi adi terbagesen kita ngogesa kitab enda, kepeken salah sada hal si cukup mbages ituriken ibas kitab enda eme alasan engkai maka kenca lawes ibas deleng Sinai nari bangsa Israel la mis ngepari lau Jordan janah bengket kutanah si nggo ipadanken Tuhan man bangsa Israel.

Hal si enda tentuna erkiteken :

1.      Lit Pemindon ntah pe tuntutan Dibata nandangi kiniteken kalak Israel.

2.      Dibata nuriken hukuman si banci ialoken kalak Israel ibas perbahanen si la ngena ate Dibata si ilakoken kalak Israel

3.      Lit sura-sura Dibata si mehuli nandangi kalak Israel sope ia bengket ku tanah Kanaan (tanah perpadanen)

Emakana adi siidah bahan pengogennta sendah, siidah me salah sada bagin alasan kalak Israel la mis bengket ku tanah perpadanen.

Ibas bagin enda ituriken uga bangsa Israel junggut-junggut man Musa erkiteken kai si kataken mata-mata si utus Musa guna ernin tanah si nggo janjiken Dibata. Adi siidah ibas Bilangen 13, mata-mata si sepuluh dua kalak ndai, sepuluh si ngatakenca payo bagi nina Dibata tanah si e mehumur janah seh kal mejilena, tapi kepeken bangsa ntah pe kalak si ngiani tanah enda tuhu-tuhu megegeh janah ibentengi alu mehuli tapi 2 kalak (Josua ras kalep) ngatakenca harus si taluken erkiteken nggo me idahna uga jilena tanah enda.

Tapi erkiteken cakap si sepuluh kalak ndai erbahanca bangsa Israel junggut-junggut man Musa erkiteken pangen ka iakap kalak enda mate i mesir asangken ibas taneh mesawang enda. (ayat 2).

-          Aplikasi

Cerita si enda situhunna banci jadi pelajaran man kita terkhusus man moria, erkiteken sedekah enda lit piga-piga hal si erbahanca kai si nggo irencanaken kita ntah pe kai sura-sura la banci jadi bagi kalak Israel ndai eme :

1.      La mengandalken Dibata tapi dirina ngenca

Adi siidah bahannta ndai, memang 12 kalak, 10 si ngatakenca mesera janah 2 kalak ngenca ngatakenca banci, adi secara logika manusia pasti la banci, tapi inget kegeluhen enda Dibata si empuna, dahinnta labo ngaturkenca hasil tapi dalankenca, hasil e masalah Dibata. Emakana adi lit sura-suranta dalanken saja bagi kai si ngena ate Dibata, persoalan hasil ntah pe dalan si man bentasan mesera ntah lang Dibata si mpegegehisa

2.      Junggut-Junggut

Enda sada biak si rusur siidah ibas enterem kalak si erkiniteken, lenga dahikenna leben stress ia. Junggut-junggut enda lit situhunna man kalak si lanai lit pengarapennta, adi kita si tetap lit pengarapennta man Dibata lalit istilah junggut-junggut

3.      Nginget masa Lalu

Masa lalu eme kenangan, kita geluh gundari, emakana pikirkenlah kai harus ilakoken kita gundari.

3 biak enda me si banci siidah ibas bahan pengogennta si ngambati kemajun kalak Israel janah biak enda pe si rusur jadi penghalangnta moria guna datken kesuksesan ibas kegeluhennta enda.

Emakana adi siidah uga guna nanggulangisa persoalen si mungkin erbahanca turah biak sib age ?

Ibas bahan pengogennta, musa cidahken kai siharus silakoken eme :

1.      Mpeteruk dirinta i lebe-lebe Dibata

2.      Tek nandangi Kuasa Dibata

3.      Tek lit Rencana Dibata si mehulina si nggo ibahanNa guna kita

Telu hal enda saja nggo banci sidalanken tentuna kai pe si reh kubas kegeluhennta lanai banci ngambati kemajunnta erkiteken kerina si endesken man Dibata.