BIMBINGEN PJJ Tgl 06-12 Agustus 2017

BIMBINGEN PJJ Tgl 06-12 Agustus 2017

THEMA:GEREJA SI MABA KEJUAH-JUAHEN NANDANGI PERPULUNGEN

Nats : Lukas 4 : 16-19

Pdt. Maria E br Sitepu

-          Penjelasan Teks

Nggo me sieteh kerina kitab Lukas eme salah sada kitab ibas 4 kitab injil Sinoptik si lit ibas pustakanta janah menurut piga-piga sumber sinulisa kitab enda eme Lukas teman ntah pe sahabat Rasul Paulus, tapi mungkin melala pe si la metehsa, kepeken Lukas enda selain ia eme tabib ntah adi gundari banci kataken Dokter kepeken

Lukas enda me sada-sadana ngenca si nulisa Kitab Injil tapi labo ia kalak Yahudi (Kolose 4:10,11,14). Kitab Lukas sendiri pe itulis guna ngatasisa persoalen si sangana lit ibas paksa si e eme :

1.      Pengarapen erkiteken kerehen Yesus sipeduakaliken

2.      Nggo enterem kalak Kristen jadi kalak bayak, erkiteken si e turah melala persoalen, khususna erkiteken kerangapen.

Emakana adi siperdiateken bahannta ibas minggu enda, enda nuriken awal ntah bena-benana pelayanan Yesus. Hal sienda cukup penting itamaken ibas awal, erkiteken enda banci jadi dasar nandangi perpulungen guna ngangkaisa tujun Dibata janah ngangkaisa tugas ras tanggung jawabta.

Adi siidah ibas bagin enda, ibenaken alu judul besar “Jesus la ialoken i nasaret”, hal sienda situhunna adi siidah sejarah, uga Yesus mbelin-mbelin i kota nazaret, tapi ibas paksa Ia ate melayani la ialoken kalak nazaret. Sienda nuduhkenca man kita kepeken maun-maun ibas ingannta sisada banci la ialoken kalak kita. aminna pe mungkin silakoken kita eme hal si mehuli. Hal si enda ka si terjadi nandangi Tuhan Yesus ibas paksa si e ibas awal pelayananNa la ialoken kalak ia, tapi adi siidah ka bahan enda,

Ayat 16

Lakoken Yesus kai si biasa ilakokenNa eme ngajar ibas rumah pertoton.

Bagin enda situhunna nuduhken uga Yesus aminna la ialoken kalak ibas paksa si e, tapi tetap ilakokenNa kai si biasa ilakokenNa eme ngajar Kata Dibata.

Ayat 18

Ibas bagin enda adi sihubungken ibas konteks Kitab Lukas emakana siidah uga kerehen Yesus enda labo man kalak bayak, tapi man :

1.      Man Kalak Musil

2.      Kalak si tertaban

3.      Kalak pentang

4.      Kalak si itindes

Si tentuna labo terjeng jasmani tapi secara rohani, emakana ibas

Ayat 19

Nurikenca Dibata ngenca metehsa ndigan masana Tuhan guna mulahi bangsana, hal si enda tentu jawab penungkunen erkiteken kerehen Yesus sipeduakaliken si terjadi ibas konteks penulisan kitab Lukas enda.

-          Aplikasi

Emakana rikutken temanta sendah eme “Gereja maba kejuah-juahen nadangi perpulungen”, siidah uga bahan pengogennta enda ngajuk :

1.      Gelah tetap ngelakoken tanggung jawabta guna bersekutu

2.      Gelah gereja tetap dalanken fungsina guna melayani man kerina jelma

3.      Gelah gereja tetap jadi saksi Dibata ibas kegeluhen i doni enda.

Hal si enda memang megati silupaken, erkiteken piga-piga cara rukur erpengakap adi nggo dalanken si mehuli nggo lanai perlu ku gereja, ntah pe lanai perlu ersaksi, tapi bahan enda cidahken uga 3 hal e jadi sada paket ibas gereja, gelah gereja tuhu-tuhu maba kejuah-juahen man kerina perpulungenna.