BIMBINGEN KHOTBAH 13 AGUSTUS 2017

BIMBINGEN KHOTBAH 13 AGUSTUS 2017

MINGGU PERINGETEN HUT 72 TAHUN

THEMA:“KUASA DIBATA SI MBEBASKEN”

Invocatio : Roma 8:21

Ogen : Hakim-Hakim 7:1-15

Khotbah : Masmur 44:1-9

Pdt. Maria E br Sitepu

-          Pengantar

Hampir kerina manusia i pertibi enda ngarapken kebebasan ibas kegeluhenna, subuk e

1.      Bebas ibas kemusilen

2.      Bebas ibas sakit penakit

3.      Bebas ibas perbeben

4.      Ras bebas ibas kai pe

Erkiteken si e, maka melala kalak ngelakoken kai pe guna datken kebebasan e, subuk si ngena ate Dibata bageka pe si la ngena ate Dibata. Memang adi siidah banci idatkenna kebebasan bagi siarapkenna e tapi penungkunen tuhu kin ia bebas bagi pengertin bebas situhu-tuhu? Tentu lang, erkiteken siidah bebas e kentisik ngenca kedungenna nggo ka mulihken kerina kebiaren e nge rim-rim kegeluhen manusia, ibas bahan pengogennta sipemena :

-          Hakim-Hakim 7 : 1-15

Secara umum kitab hakim-hakim enda nuriken keadaan bangsa Israel sanga masa hakim-hakim (13  kalak), ibas paksa si enda icidahken uga kemerosotan moral ras rohani kalak Israel si nggo tading ibas tanah perpadanen janah erkiteken si e tentu lit dampak ntah pe hukuman si bereken Dibata man bangsa Israel guna jadi pelajaran man kalak Israel ibas paksa sie.

Bagin pengogennta enda pe ngerana erkiteken si e, aminna pe sope Gidoen ipilih Dibata jadi hakim lit kemajun si ilakoken Debora, tapi banci siidah kenca Debora lawes, bangsa Israel mulihken erdosa man Dibata, emakana ipelepas Dibata bangsa Midian pitu tahun dekahna merentah kalak Israel (Hakim-hakim 6:1), tapi tentuna erkiteken keleng ate Dibata nandangi bangsa enda, emakana ipilihna mulihken hakim si banci mulahi bangsa Israel ibas tangan bangsa Midian. Gideon me gelar hakim siipilih Dibata. Gideon eme anak perana ibas keluarga si la itandai ibas suku manasye ija siidah ibas hakim-hakim 6:11 dahinna eme ngerik gandum. Hal si enda menarik erkiteken piga kali Dibata cidahken kepeken pilihen enda labo bagi kai si biasa pikirken kalak (anak raja, anak bangsawan, kalak hebat, rsdna), emakana hal si enda banci jadi bukti awal kita guna ngangkasa kepeken Kuasa Dibata eme si mbebasken labo erkiteken gegehta ntah pe kebeluhennta.

Emakana ibas bagin pengogenta, nuriken uga Gideon mimpin bangsa Israel guna naluken bangsa midian. Adi siidah bahan enda, menarik kal, erkiteken ibas ayat 12, ituriken uga nteremna bangsa midian si ate erperang ras bangsa Israel, tapi menaken ibas ayat 2, nina Dibata man Gideon enteremsa Kuakap kalak ras kam. Hal sienda adi siukuri secara doni tentuna nggo me hal si lang-lang, erkiteken adi erperang si lang-langna jumlahta seri me gelah lit kemungkinan menang, tapi ibas Dibata labo e persoalenna.

Hal sienda pe tentu igejapken Gideon tapi adi siidah ibas ayat 13, uga nipi sekalak kalak midian erbahanca tetap ukur Gideon guna ngelawan bangsa midian.

Enda me bukti si peduaken ibas bahan enda, uga Kuasa Dibata enda ngasup mbebasken. Labo bagi kai si biasana tapi erkiteken kuasa Dibata kerinana. Emakana adi siidah ka bahan pengogennta sipeduaken ibas

-          Masmur 44 : 1 – 9

Bagin masmur enda situhuna banci ikataken sada pengakun nandangi kuasa Dibata si mbelin nandangi kalak Israel, tapi menarik kal adi siterusken ngoge kuteruh, erkiteken secara garis besar bahan enda ngerana erkiteken kemorahan ate bangsa Israel, erkiteken tadingken Dibata ia ibas ngelawan musuhna. Janah adi siterusken ka kebingungan enda pe banci turah erkiteken iakap pemasmur lalit dosa si banci nurikenca penolakan Dibata erkiteken kalak Israel ibas paksa si e tetap setia ras padanna man Dibata

Hal si enda eme bukti si peteluken uga Kuasa Dibata eme si mbebasken kita, labo usaha ntah pe perbahanen kita.

-          Aplikasi

Sola Fide, istilah si lanai asing ibas kita kalak Kristen, hanya karena anugerah, ertina kerina enda erkiteken perkuah ate Dibata nandangi kita. 2 bahan si oge kita ibas minggu enda cidahken kepeken :

1. Labo erkiteken kebeluhen ntah pe kepentarennta maka kita ngasup bebas

Melala kalak berusaha gundari guna bebas ibas kerinana arah sains ntah pe kuasa-kuasa sideban, tapi bagi si bas bagin pemena, kerina enda sea-sea ngenca erkiteken Kuasa Dibata ngenca si ngasup guna mbebasken kita.

2. Labo erkiteken perbahanenta

Melala kalak khususna kalak Kristen, erpengakap kerina silakokenna enda banci erbahan ia datken kebebasen ibas kebiaren si lit ibas doni enda, emakana enterem kalak ngelakoken hal si mehuli gelah datken sura-surana saja.

Emakana nggo me tangkas man kita ibas paksa si enda, kerina si lit ibas kita gundari enda labo erkiteken kita, tapi erkiteken Dibata si merekenca, kebebasan negaranta pe gundari si idatken kita ibas 17 Agustus 1945 e kerina erkiteken kuasa Dibata. Coba min siukuri banci kin kalak make bamboo runcing menang ras kalak make senjata. Tentuna lang, tapi adi kita kalak si erkiniteken lalit si la banci, erkiteken kuasa Dibata mpengasup kita guna ngelakoken si e kerina. Emakana marilah kita tetap erpengendes man Dibata saja ibas geluh enda, gelah tuhu-tuhu kuasa Dibata saja si jadi ibas kegeluhennta enda.