BIMBINGEN KHOTBAH 10 SEPTEMBER 2017

BIMBINGEN KHOTBAH 10 SEPTEMBER 2017

MINGGU PERMATA

THEMA:JADI PEMIMPIN TUPUNG NGUDA

Invocatio : Masmur 144 : 12

Ogen : 1 Timotius 4 : 11-16

Khotbah : Keluaren 33:11 ; Bilangen 27 : 15-23

Pdt.Maria E br Sitepu

• Pengantar

Sipertama lebe tentuna sikataken selamat Ulang tahun man anak-anakta permata, erkiteken ibas tanggal 12 September iperingeti me ulang tahun kategorial permata GBKP si pe 69-ken, tentuna lanai termasuk umur singuda enda, tapi erkiteken si ngerayaken eme permata harusna ibas umur 69 jiwa harus tetap bagi permata, pelayanan pe tetap luar biasa bahkan adi banci reh luar biasana ibas pertambahan umur permata enda. 

Ngerana kita erkiteken ulang tahun tentu me sieteh adi gelarna ngerayakan ulang tahun kerina gabah-gabah biasana ibahan alu warna si ceria, la pernah kuidah adi kalak erulang tahun warna si ipakena warna mbiring kerina, kecuali erkiteken dress code si biasa ilakoken anak-anak gundari. Hal sienda ngatakenca situhunna ulang tahun enda maba keriahen nandangi si er ulang tahun, erkiteken tetap ipasu-pasu Dibata ia seh sada tahun enda nggo banci ibentasina alu mehuli, aminna pe adi biasana permata melala tentuna perbebenna khususna ibas dalanina program si nggo iaturken erkiteken masalah keuangan, tapi enda labo mengurangi keriahen ibas ia er ulang tahun.

Tapi melala ka siidah ibas pertambahan umur kalak lupa kepeken pertambahan umur enda labo terjeng keriahen tapi lit sada hal si harus ipikirkenna eme tanggung jawab ibas pertambahan umurna enda, erkiteken enterem ka siidah kalak nggo ka metua tapi sifatna bagi danak-danak denga, e ertina la iangkana makna ulang tahun enda ntah la ietehna tanggung jawab si nggo nimai ia ibas perdalanen kegeluhen ku lebe enda.

Ibas minggu enda, kita ipersingeti erkiteken si e, ibas  

• Penjelasan teks

1. 1 Timotius 4 : 11-16

Bahan enda eme kata persinget nandangi permatanta si sedekah enda mungkin erpengakap ia labo lit gegeh ntah pe lalit gunana ibas jelma si enterem. Tentuna sieteh kerina ise kin timotius enda, ia me anak rohani Paulus, nguda denga, janah permela ras la beluh ngerana, tapi ibas paksa si enda, Rasul Paulus ngajarken man Timotius gelah :

1. Tetap jadi usihen aminna pe nguda denga

Adi ngerana kita erkiteken jadi usihen, enterem kalak erpengakap si nggo melala panna “sira kegeluhen” ntah pe nggo metua enda me si harus jadi usihen. Memang payo prinsip si e, tapi labo pas kal, erkiteken usihen labo ngerana masalah usia tapi masalah tapi si man usihen, maksudna aminna pe nguda denga kita tapi adi perbahanennta eme perbahanen si ngena ate Dibata tentuna e banci jadi usihen man ise pe ibas kegeluhen enda.

2. Makeken waktu alu mehuli

Hal sienda tentuna harus ipahami permatanta, melala permata erpengakap erkiteken nguda denga ia emakana wari-wari kegeluhenna enda i isi alu hal-hal si la penting, emakana enda si erbahanca la ia datken kesuksesan ibas masa depanna erkiteken masa ngudana labo ipakena alu mehuli

3. La makeken talenta si ibereken Dibata

Muda identik alu pemahaman enerjik, kreatif, inovatif ras sidebanna, tapi enda maun-maun la ipake permata, erkiteken bagi si pemena ndai, sibuk ia ngayaki hal si sea-sea ibas masa ngudana

4. La njaga dirina

Enda hal si terjadi biasana ibas anak singuda denga, eme kinilangasupenna guna njagai dirina ras kebadiaanna. Hal sienda penting kal, erkiteken adi la kita njagai dirinta ise nari, khususna man kita si tading ibas tanah perantauan enda.

Tapi tentuna perlu siinget si e kerina banci jadi erkiteken lit dorongan ras motivasi arah kalak sideban, ibas

2. Keluaren 33:11; Bilangen 27 : 15-23

Nurikenca sekalak tokoh si luar biasa ibas perdalanen bangsa Israel bengket ku tanah kanaan eme Josua, sieteh uga luar biasana sosok Josua enda aminna pe nguda denga ia tapi banci kerinana idalankenna alu mehuli, engkai :

1. Tetap ia rembak ras Dibata

Hal sienda me situhunna mpengasup Josua guna ngalokenca tugas ras tanggung jawab si mbelin si bereken Dibata nandangi ia guna mabasa bangsa Israel bengket ku tanah perpadanen.

2. Dukungan arah orang tua

Arah bahan renungen ibas bilangen siidah uga Musa mindo man Dibata gelah ipilihna pemimpin si mbaru man bangsa Israel, arah sienda siidah uga dukungan si bereken musa nandangi Josua, tentuna secara psikologis dukungan musa enda nandangi Josua erbahanca reh megegehna Josua ngaloken tanggung jawab si e.

• Aplikasi

Jadi pemimpin tupung nguda tentuna sada ketedehen ateta, tapi hal sienda labo menukah guna datkenca, bahannta sendah nuriken uga kolaborasi permata ras orang tua (mamre, moria) ngasup membentuk sekalak anak permata jadi pemimpin, aminna pe mungkin terjeng dirina saja lebe. Hal sienda me si perlu si pahami nandangi kita perpulungen ibas minggu permata enda, permata enda eme bagin ibas gereja, emakana sada tanggung jawab man banta guna mereken nasehat janah mereken dukungan man bana ibas kegeluhen enda. bagepe man permata, belajarlah guna jadi pemimpin ibas kiningudaanndu enda, erkiteken arah si e kam ngasup guna dalani wari-wari ngudandu enda alu mehuli erkiteken kam nggo ngasup guna mimpinsa dirindu ras kalak sideban.