BIMBINGEN MAMRE TGL 3-9 September 2017

BIMBINGEN MAMRE TGL 3-9 September 2017

THEMA:KINITEKEN RAS TEKNOLOGI

OGEN:Kejadin 1 : 26 - 28

Pdt. Maria E br Sitepu

• Penjelasen Teks

Ibas paksa gundari enda tentuna teknologi nggo lanai jadi barang mewah nandangi kalak si geluh i babo pertibi enda, erkiteken hampir kerina kegeluhennta gundari nggo makeken teknologi guna jadi alat penunjang kegeluhennta tep-tep wari, benaken hal si kitik nari si ku mbelinna kerina nggo make teknologi, emakana teknologi tentuna ipahami guna nampati manusia guna dalanken tujun geluhna.

Tapi melala siidah kepeken gundari teknologi nggo salah ipergunaken, contohna, teknologi pendingin ruangan ntah pe ac e maba kecedan nandangi ozonnta adi la si control pemakaian, emakana sope kita makeken teknologi perlu lebe si pahami kai kin tujun geluhta, erkiteken la banci lang pemakaian teknologi berkaitan ras kegeluhen manusia.

Ibas kejadin 1 si jadi pengogennta, secara garis besar kejadin 1 enda ngerana erkiteken kisah Dibata nepa si lit ibas doni enda, emakana siidah keteraturan siibahan Dibata ibas ia nepasa e kerina. Ibas bagin pengogennta ayat 26-28, ngerana erkiteken kejadin sanga Dibata manusia.

Bagin enda ibenaken alu pengumuman Dibata erkiteken sura-surana guna nepa Manusia, si memiliki keistimewaan ija ia itepa menam seri ras tempas Dibata. Hal enda tentuna jadi sada persinget man kita kepeken kita enda eme anak-anak Dibata si tentuna mewarisi biak-biak Dibata. Emakana jadi tanggung jawabta guna njaga si nggo bereken Dibata man banta.

Kenca sie Dibata nurikenca tugas ras tanggung jawab manusia ibas doni enda eme engkuasai tinepa si nggo leben itepa Dibata. Ijenda si biasana rusur jadi persoalen, erkiteken konsep engkuasi enda nggo mengarah ku perbahanen si rate-ate, padahal adi siidah bahasa aslina pengertinna situhunna eme gelah manusia “Akan memerintah”, tentuna bahasa enda berbeda pengertinna ras bahasa engkuasai, emakana hal si enda jadi harapan Dibata man manusia, ngaturken tinepa sideban enda gelah ratur. Emakana

Ibas ayat 27 itepana dilaki ras diberu gelah jadi si ngaturkenca si e kerinana.

Ibas ayat 28 enda jadi sada pergegeh uga pasu-pasu Dibata iberekenna man banta ibas tanggung jawab si melala ibereken Dibata man banta, janah manusia harus tetap dalanken tanggung jawab si nggo bereken Dibata man banta.

• Aplikasi

Teknologi tentuna adi sihubungken ras bahan pengogennta eme tinepa Dibata kerina si la banci lang harus iangka manusia bagepe banci ipakena, tapi harus siinget kerina e harus ipake alu kesadaran kita eme gambaran Dibata, erkiteken sieteh kerina melala teknologi si gundari si banci erbahanca kita lanai nginget tanggung jawab bagepe ise dirinta. Kita selaku manusia si ibereken Dibata tugas guna ngaturken si mehuli ibas doni enda harus ngasup ngaturken teknologi enda gelah banci ipake ibas kegeluhennta enda  alu mehuli. Ula kita si iatur teknologi.

Ibas kinata si gundari enterem siidah manusia nggo sangat bergantung nandangi teknologi seh iakapna teknologi enda eme dibatana. Hal sienda me si perlu ipahami mamre uga situhunna fungsi teknologi nandangi kegeluhennta. Kiniteken si lit ibas kita gundari enda harus ipake alu mehuli guna banci jadi filter nandangi teknologi si erbahanca ceda kegeluhen manusia. Emakana marilah si pake teknologi alu mehuli janah si pake si e kerina guna jadi kiniulin man jelma si enterem.