BIMBINGEN MAMRE TGL 17-23 September 2017

BIMBINGEN MAMRE TGL 17-23 September 2017

KEPEMINPINAN KARO

THEMA:MAMRE RAS BUDAYA

OGEN:Roma 12 : 8

Pdt. Maria E br Sitepu

-          Penjelasen Teks

Hampir kerina kalak bas doni enda merhat jadi pemimpin, subuk e man dirina, jabu bagepe ibas masyarakat ja ia tading. Sura-sura si enda tentuna nggo me jadi kesemalen ibas kegeluhen enda, khususna nandangi sekalak dilaki ntah pe mamre. Tentuna sekalak mamre ersura-sura gelah ia banci jadi pemimpin ibas kegeluhen si dalanina.

Tapi perlu isadari enterem kalak salah guna memposisikan dirina gelah banci jadi sekalak pemimpin, hal si enda banci siidah arah lagu langkahna, contohna eme :

1.      Gaya ngerana si meganjang kal

2.      Gaya eruisna si tempa-tempa sekalak kalak si lit

3.      Ras melala denga sideban si biasana si idah tempa-tempa iban-ban gelah teridah bagi sekalak pemimpin

Padahal sadar ntah la sisadari kepemimpinan enda labo ngerana masalah gaya ntah pe penampilan tapi kita ngerana masalah fungsi ras guna man dirina bagepe man jelma si enterem. Emakana sekalak si atena jadi pemimpin perlu memahami kai harus ilakokenna ibas dirina ersura-sura jadi sekalak pemimpin.

Ibas bahannta sendah, ituriken Rasul Paulus uga situhunna jadi sekalak kalak Kristen ersikap nandangi dirina ibas situasi si lit ibas paksa si e, ija ibas paksa si e perpulungen Roma iperhadapkan nandangi masyarakat heterogen (majemuk) emakana perlu sikap si perlu tetap icidahkan sekalak kalak Kristen, gelah arah si enda kalak Kristen tetap ngasup eksis ibas situasi si mungkin kurang bersahabat nandangi ia ibas paksa si e.

Bahannta enda situhunna menarik adi sihubungken ras uga adi kita ersura-sura jadi sekalak pemimpin, erkiteken bahan enda banci jadi referensi kita uga jadi sekalak pemimpin

1.      Sekalak pemimpin eme sekalak si ngasup petetap ukur kalak

2.      Sekalak pemimpin eme sekalak si nggit melayani

3.      Sekalak pemimpin eme sekalak si tutus erdahin

4.      Sekalak pemimpin eme sekalak si erdiate ras kepate

4 hal si tentuna perlu lit ibas dirinta, khususna kalak si atena jadi pemimpin erkiteken dahin pemimpin enda tentuna maba dampak si mbelin nandangi kerina kalak.

-          Aplikasi

Tentu siinget sanga pemilihan kepala daerah ibas kutanta Tana Karo, kurang lebih lit 7 pasangan calon, hal si enda situhunna cidahken uga meserana darami sekalak pemimpin si banci jadi usihen nandangi kalak karo. Engkai ? penungkunen si e si sulit guna jawabsa, erkiteken melala alasan si tentuna lit adi kita ngerana masalah si enda, tapi si pastina adi kita ngerana uga kin situhunna kepemimpinan kalak karo, tentuna kepemimpinan si erpalasken budaya karo. Emakana sekalak pemimpin kalak karo, la banci lang erpengakap kerinana si ilakokenna bagi kai si ilakokenna man dirina bagepe jabuna, erkiteken bas kalak karo kita kerina lit hubungan perkaden-kadenna. Emakana hal si enda si penting harus tetap ipahami mamre GBKP ibas paksa gundari, kepemimpinan labo persoalen ise ia, tapi uga kin ia ibas ia ernin masalah-masalah si tentuna dasarna eme dasar Kekristenan ras dasar budaya karo.