BIMBINGEN PERMATA TGL 3-9 September 2017

BIMBINGEN PERMATA TGL 3-9 September 2017

THEMA:ERNAHANGNA

OGEN:Ibrani 10 : 24 - 25

Pdt.Maria E br Sitepu

• Penjelasen Teks

Adi ngerana kita erkiteken penulis kitab ibrani enda labo lit ibas kitab enda si ngatakenca ise situhunna penulis kitab enda. Tapi ibas perdalanenna. Kitab enda pe situhunna itulis nandangi kalak Kristen Yahudi si banci ikataken nggo me dewasa secara kiniteken tapi erkiteken perbeben ras penganiayaan si mesangat erbahanca surut kiniteken bagepe lanai lit semangatna.

Emakana bagin pengogennta si sendah enda situhunna imaksudken penulis guna mereken dorongan semangat mulihken nandangi perpulungen gelah sabar ibas dalani kegeluhenna bagepe ibas ia erkiniteken man Dibata.

Salah sada cara siidah ibas bahan pengogennta enda si arapken penulis eme :

1. Sisampat-sampatenlah

Hal sienda situhunna penting ilakoken perpulungen ibas paksa si e, erkiteken ibas persoalen si bagenda rupana tentu tep-tep kalak berbeda carana guna ngalokenca, lit si ngasup bagepe lit si la ngasup. Alu sisampat-sampaten enda tentuna iarapken e ngasup mereken semangat nandangi perpulungen. Bagi barang adi mberat tentuna reh nahangna adi ras-ras kita mabasa.

2. Ula nadingken persadanta bagepe ibadah man Dibata

Persadan situhunna ibahan guna kita banci reh megegehna guna nangung mberatna perbeben geluh

3. Siahan-ahanlah kita sada ras sideban

Hal sienda penting gelah adi lit perpulungen si la ngasup guna ngalo-ngalo perbeben enda, kita banci mereken dukungan bagepe dalan pulah.

• Aplikasi

Ibas kegeluhen enda tentuna kerina kalak erpengarapen gelah kerehenna maba keriahen ntah pe bagi temanta sendah “ernahangna” beban kalak erkiteken kerehennta labo nambahi beratna kegeluhen enda, emakana selaku permata, generasi muda si secara gegeh, bagepe waktu melala denga, tentuna enda harus si pake guna jadi penampat man kalak sideban, ula ka kerehennta enda erbahanca dongkel kalak sideban. Situhunna hal sienda la mesera guna dalankenca, asal sipertama lebe harus sipahami kepeken tujun geluhta enda guna jadi pasu-pasu man jelma sienterem. Hal sienda saja lebe sipahami situhunna nggo me ngasup kita erbahanca kalak ermeriah ukur jumpa ras kita, tapi adi cara rukurta eme cara rukur kalak egois ntah cara kalak rukur guna dirina jine, banci kita enda labo erban menahang kalak tapi maba beratna saja.