BIMBINGEN PJJ TGL3-9 September 2017

BIMBINGEN PJJ TGL3-9 September 2017

THEMA:NJAGA RAS MPEKENA-KENA BUDAYA

OGEN:Johanes 2 : 1 - 12

Pdt.Maria E br Sitepu

• Penjelasen Teks

Bahan pengogennta si sendah enda situhunna labo bahan si asing nandangi kita kerina, erkiteken bahan enda nggo me cukup rusur si begi bagepe si oge, erkiteken adi siidah ayat 11 ibas bahan pengogennta enda me tanda sengget si pemena si ibahan Tuhan Yesus ibas perdalanen pelayanenNa i doni enda. tapi ibas paksa si enda rikutken temanya si ngerana erkiteken budaya, emakana lit hal-hal simenarik :

1. Enda tanda sengget si pemena

tanda sengget si ibahan Tuhan Yesus harus mengubah lau jadi anggur, tentuna pasti melala jawaban ibas si e, tapi tentuna enda banci ngatakenca Dibata reh ku doni enda tetap mperdiateken budaya si lit ibas sekelewetna, tentuna budaya si la bertabrakan ras kinitekennta

2. Ayat 1-2, cidahken uga Tuhan Yesus mereken waktu nandangi kebiasaan ntah pe budaya si lit ija Ia tading.  adi siidah sejarah, kalak Yahudi adi erbahan acara khusus acara erdemu bayu enda biasana acara si mbelin banci piga-piga wari ilakokenna emakana tentu waktu sibereken Tuhan Yesus ras ajar-ajarna guna reh kubas acara enda alu sada maksud
3. Lau menjadi anggur

Ibas acara erdemu bayu ntah pe acara sidebanna eme sada kemelan adi si mada acara keri anggurna, emakana siidah aminna pe tang-tangna Tuhan Yesus tempa-tempa la nampati, tapi dungna ibahanna lau jadi anggur, hal sienda tentuna ngatakenca Tuhan Yesus pe ietehna posisi ras kebiasaan si lit ibas paksa sie

4. Cerita enda ibas kitab Yohanes ngenca lit

Adi siinget konteks kitab Yohanes ija kitab enda itujuken nandangi kalak Yahudi gelah tek ia Tuhan Yesus eme mesias, emakana tentuna cerita enda cidahken kepeken Tuhan Yesus si mesias eme Dibata si tetap mperdiateken budaya si lit ibas sekelewetna.

• Aplikasi

Arah gambaran si e, situhunna nggo me tangkas nandangi kita, uga kin tanggung jawabta selaku kalak si memiliki budayanta sekalak-sekalak, identitasta selaku kalak karo situhunna cidahken kita harus cidahken identitas enda alu cidahken budaya kalak karo, subuk bahasa, ras sidebanna si tentuna la bertentangan ras kinitekennta selaku kalak Kristen. Melala siidah gundari anak-anakta nggo me kehilangan identitasna selaku kalak karo, nggo me ia tercampur ras budaya sideban, si maun-maun budaya enda la pas ras kita kalak karo. Emakana ibas paksa si enda ipersingeti man banta gelah tetap nginget bagepe tetap njaga identitas dirinta selaku kalak karo. Hal sienda situhuna harus maba kinihagan man banta labo maba kemelan. Melala siidah kalak barat merhat ia mpelajari bagepe njaga kebudayaan,ija ibas karo lit batang belin adat istiadat eme merga silima (Karo-karo,Ginting,Tarigan,Sembiring,Perangin-angin)tutur siwaluh(Sembuyak,Senina,Senina Sepemeren,Senina Sipariban/Sepengalon/Sendalan,Anak Beru,Anak Beru Menteri,Kalimbubu,Puangkalimbubu ras rakut sitelu(Kalimbubu,Sembuyak atau Senina,Anak Beru). Emakana tanggung jawabta gundari marilah sijaga ras si mpekena budayanta si lit ibas kita gelah enda banci jadi tading-tadingen si meherga man kesusurennta.