BIMBINGEN KHOTBAH 24 SEPTEMBER 2017

BIMBINGEN KHOTBAH 24 SEPTEMBER 2017

MINGGU PERDAMEN

THEMA:ERDAME BIAK KALAK SI ERSEMBAH.

Invocatio : Kuan-Kuanen 29 : 8

Ogen : Roma 12 : 17-21

Khotbah : Matius 5 : 21-24

                                                                Pdt. Maria E br Sitepu

-          Pengantar

“Membenci adalah hal yang sangat menyiksa”, tentuna adi sibegi pernyataan enda, melala kuakap kita si setuju, erkiteken sadar ntah la sisadari membenci ntah pe merawa[1], situhunna menyiksa dirinta, erkiteken biasana si terjadi kalak si ibenci ntah pe irawai kita eme kalak si nai ikelengi kita, engkai maka bage ?

erkiteken rasa enda turah erkiteken perbahanen si la sue ras sura-suranta ntah pe perbahanenna si menyakiti dirinta. Tapi aminna pe bage, kuakap kita kerina kalak si lit ibas doni enda la pernah terpesirang arah sifat enda. Kuakap kita kerina nggo me pernah merawa ntah pe membenci sekalak jelma ntah mungkin seh ngasa gundari nembeh denga ateta ernin ia. Emakana adi cuba siukuri situhunna melala kerugin si banci idatken kita adi tetap denga sipertahankan si e kerina salah sadana eme la kita nyaman ibas kegeluhen enda. Erkiteken ja nge banci nyaman ntah pe malem adi biasana kalak si jadi imbangnta enda teman si deherna ras kita. tentuna enda nambahi persoalen saja man kegeluhennta.

Ibas minggu enda, kita bengket ku bas minggu perdamen ija kita iajuk guna ngangkasa salah sada tanggung jawabta selaku kalak si ersembah man Dibata eme ngasup erdame subuk man kalak sideban bagepe erdame ras dirinta.

Emakana ibas 2 bahan pengogennta enda icidahken uga kin biak kita selaku kalak si ersembah man Dibata.

-          Penjelasan teks

1. Erkiteken Merawa

Matius 5 : 21-24

Tentu siinget bahan enda eme termasuk salah sada bahan si terkenal kal eme pengajaran Jesus i datas uruk. Ibas pengajaren enda melala si ajarken Yesus nandangi enterem jelma ibas paksa si e, salah sadana eme kerna merawa.

Adi siperdiateken bahannta enda, siidah

Ayat 21, singetken Tuhan Yesus man kalak, erkiteken salah sada perentah ibas sepuluh pedah Dibata eme erkiteken munuh, emakana ikataken ula munuh gelah ula kam iadili erkiteken kesalahanndu ndai. Tapi kepeken labo hal si e saja, kepeken ibas

Ayat 22

Ikataken Yesus :

1.      Kalak si merawa man senina

2.      Kalak ngisaken kalak sideban

3.      Kalak si ngatakenca kata si la pantas pe man temanna

Kerina iukum Dibata pagi, emakana ula sempat kita merawa. Tapi payo kin la banci kita merawa ?

Adi siidah ayat 22 enda situhunna merawa si imaksudken Tuhan Yesus eme merawa si la mereken pengajaran ntah pe mendidik. Emakana merawa epe situhunna adi ibas tujun mendidik  banci tapi epe perlu iukuri lit ije kekelengen entah lang.

Emakana ibas ayat 23

Ikataken kepeken merawa enda labo terjeng hubungen ras teman tapi ras Dibata ka, erkiteken adi sangana kita merawa ntah pe membenci kai pe si bereken man Dibata la alokenna, erkiteken kita ngerana masalah pusuh si la meciho ngadap ku Dibata.

Emakana ibas :

2. Roma 12 : 17-21

Hal si enda ingetken mulihi Rasul Paulus nandangi perpulungen roma, si sangana ibas paksa si e geluh ibas komunitas masyarakat heterogen, kalak Yunani, Kalak si la tandaina Dibata ras kalak sideban. Tentuna si e banci jadi pemicu persoalen si berujung ku perbahanen si la mehuli si banci ialoken kita. salah sada hal si menarik jenda ras perlu jadi bahan perhatiannta eme

Ibas ayat 20 ras ayat 21

Ibas ayat 21

Ikataken balaslah kejahaten alu perbahanen si mehuli. Adi siukuri kinata gundari hal si enda seh kal meserana dalankenca, erkiteken biak manusia adi nggo ialokenna kejahaten pasti ibalasna alu kejahaten. Enda me kekhususan kalak si erkiniteken man Dibata, kita la banci ibabai arus kegeluhen enda, tapi kita me si ngaturken kai harus si lakoken kita bagi si ngena ate Dibata

Ibas ayat 20

Ikataken Dibata pagi si mereken ukumen, enda si maun-maun kita lupa, siakap kita me hakim ibas kegeluhen enda, harus si inget kita kerina eme tinepa Dibata, erbalas eme hak Dibata, kita terjeng ngingetkenca adi kalak erbahan si la mehuli bagepe cidahken kekelengen gelah ia banci robah.

-          Aplikasi

Adi siukuri memang payo kerina si ikataken ibas minggu enda, uga sekalak kalak si erkiniteken harus ngasup erdame subuk man dirina ras man kalak sideban, tapi persoalenna gundari eme uga kita ngasup dalankenca, pasti tuhu mesera, tuhu latih dalankenca si e khususna man kalak si tuhu-tuhu erbahan hal si la ngena ateta, tapi enda gelarna tantangan ibas perlumban kegeluhen, ngasup kin kita ngatasisa si e kerina ? adi ngasup kita pasti seh kita ku garis finish si nggo padanken Dibata man banta. Selamat berdame Tuhan Yesus Memberkati. 

---

[1] Kata membenci ibas bahasa Indonesia biasana adi bas bahasa karo ipake kata merawa, tapi adi siidah erti bahasa enda, situhunna membenci enda banci kataken keleken asangken merawa. Biasana adi kalak benci ningen, kai pe adi berhubungan ras si ibencina enda la atena ngena, emakana dua kata jenda ipake kami.