BIMBINGEN MAMRE Tgl 01-07 Oktober 2017

BIMBINGEN MAMRE Tgl 01-07 Oktober 2017

Thema:JUDI

Ogen:Heber 13 : 5; 1 Timotius 6 : 10

Pdt. Maria E br Sitepu

-          Penjelasen Teks

Kebutuhan ras ekonomi e jadi salah sada alasan kalak bas doni enda ngayaki kebayaken khususna sen ntah pe duit. Hal si enda situhunna la banci tersalahi erkiteken kita nggeluh ibas doni enda si dem alu erbage bage kebutuhan si tentuna kebutuhan enda banci terpenuhi alu litna sen ibas kita.

Tapi megati manusia erkiteken ngayak-ngayak si enda lupa ia guna tetap darami sen enda bagi si ngena ate Dibata. Ndabuh ia kubas cara si la pas eme judi, bunganken sen ras sidebanna.

Secara terkhusus ngerana kita masalah judi. Secara pengertin (KBBI) judi eme M permainan dengan memakai uang sebagai taruhan, seperti main dadu dan kartu. Sedang judi dalam bentuk kata kerja, judi berarti mempertaruhkan harta dalam permainan tebakan berdasarkan kebetulan dengan tujuan mendapatkan sejumlah uang atau harta yang lebih besar dari harta atau uang semula emakana arah pengertin enda banci kataken judi eme ngayaki sesuatu si labo kita empuna janah labo lit keleng ate ibas judi enda, erkiteken labo lit kalak adi gelarna erjudi ngarapken radu-radu menang kerinana.

Emakana ibas bahan pengogennta sipemena ibas :

a.       Heber 13:5

Kitab enda itulis nandangi kalak perantauan khususna kalak Kristen Yahudi gelah tetap dalanken kai si ngena ate Dibata aminna pe ibas perantauan tentuna melala persoalan si banci jadi erbahanca ia nadingken kinitekenna man Dibata.

Ibas bagin 13 enda penulis ngerana erkiteken nasihat uga dalanken si ngena ate Dibata. Salah sadana eme ngerana masalah kerangapen nandangi sen. Bagi siarah datas ndai tentuna erkiteken kebutuhan ras situasi banci jadi kalak si nggo erkiniteken nadingken kerinana erkiteken ngayak-ngayak sen, emakana iarapken penulis gelah kalak enda tetap ermengkah arah si lit ibas ia, la perlu merangap erkiteken sen enda, erkiteken janji Dibata tangkas man banta eme la pernah tadingkenNa kita. Cuma tentuna perlu lit ketegasan ibas kita guna mpedauh si la ngena ate Dibata arah kita.

Janah ibas bagin sipeduaken ibas :

b.      1 Timotius 6 : 10

Rasul Paulus mereken nasehat man Timotius erkiteken ajaran si tuhu, khususna masalah kerangapen nandangi duit. Nina rasul Paulus man Timotius kerangapen nandangi sen enda me sumbul kerina kejahaten. Melala terjadi kalak ndabuh ibas kinitekenna erkiteken masalah duit enda, emakana ipersingeti Rasul Paulus man timotius gelah ula sempat ndabuh ibas si bagenda rupana.

-          Aplikasi

Judi memang rusur jadi masalah ibas paksa si enda, khususna ibas gereja, janah hal si enda rusur ibahas ibas pa mamre, erkiteken biasana si erjudi enda dilaki, memang lit diberu tapi umumna dilaki. Emakana enda ibas paksa si enda ipersingeti kita mulihken mamre gelah ula ndabuh ku bas perbahanen si e, erkiteken labo terjeng masalah ekonomi si banci terkena dampakna tapi cara rukur, sifat ras sidebanna banci terimbas erkiteken judi enda, emakana selaku mamre si nggo ngendesken diri man Dibata sidauhi judi enda ibas bentuk kai pe gelah kita tuhu-tuhu banci jadi mamre si luar biasa janah tentuna jadi mamre si tetap cidahken biak Dibata ibas perdalanen geluhta.