BIMBINGEN KHOTBAH 05 NOVEMBER 2015

BIMBINGEN KHOTBAH 05 NOVEMBER 2015

MINGGU REFORMASI GEREJA(500 thn)

THEMA:MPELIMBARUI KEGELUHEN ERSEMBAH

Invocatio : Jeremia 1 : 10

Ogen : Markus 11 : 15 – 19

Khotbah : 2 Kronika 35 : 20 - 26

Pdt. Maria E br Sitepu

-          Pengantar

Minggu enda kita bengket kubas minggu reformasi gereja, tentu si inget ibas tahun enda kita mperingeti 500 tahun reformasi gereja si ipelopori bapak-bapak gerejanta (martin Luther, Zwingli, Johanes Calvin ras sidebanna).

Tentuna ngerana erkiteken reformasi enda, la banci si pesirang alu sejarah, ija ibas paksa si e tatanan gereja lanai bagi arusna,

nggo melala aturen-aturen si ibahan gereja nggo lanai bagi kai arusna, khususna gereja katolik ibas paksa si e, emakana timbul me keinginan guna mpekena mulihi kai kin si jadi tanggung jawab gereja bagepe kai situhunna inti ibas ajaran Kristen. Adi siinget salah sada pemicu turahna reformasi enda eme Surat pengampunan Dosa si ipedarat gereja katolik ibas paksa si e.

Nginget si e tentuna nggo me jadi tanggung jawabta guna njagai kegeluhennta selaku kalak si erkiniteken gelah tetap ibas dalan Kristus.

Ibas bahan pengogennta sipemena sinibuat ibas :

-          Markus 11 : 15-19

Tuhan Yesus cidahken uga kita selaku kalak ersembah harus tetap mpertahankan kebadian erkinitekennta man Dibata. Salah sadana eme njagai kebadiaan Rumah Pertoton.

Adi siidah ibas bahan enda, uga Tuhan Yesus mpelawes kalak si erbinaga ntah pe maba barang ku kesain rumah pertoton. Padahal adi siukuri kalak enda ibas kesain rumah Pertoton la ia bas rumah pertoton, tapi si e pe la ibere Tuhan Yesus, engkai ?

Perban adi siidah ibas bahan pengogennta nina Yesus enda Rumah Pertoton. Jadi aminna terjeng bas kesainna saja la banci erkiteken enda kerina bagin ibas rumah pertoton si tentuna ipake guna ersembah man Dibata.

Tentuna hal si enda cukup luar biasa berani, erkiteken labo sitik ngenca kalak si ernembeh ate man Tuhan Yesus ibas kai si ilakokenna enda, janah adi siidah ibas ayat 18 hal si enda pe erbahanca  guru-guru agama ras imam-imam si mbelin darami dalan guna munuh Tuhan Yesus. Tapi si e kerina labo erbahanca surut keinginan Tuhan Yesus perban Tuhan Yesus tuhu keleng ateNa man BapaNa si isurga.

Tapi adi siidah kinata gundari gereja, melala si ngelakoken praktek-praktek erbinaga ibas gereja. Banci kin e ?

Sipertama perlu lebe sipahami arah bahannta enda :

1.      Rumah pertoton enda nggo bagi pajak, tentuna gejek, melket ras sidebanna adi gelarna pajak.

2.      Kerina si ilakokenna enda guna keuntungan dirina jine labo guna kai pe (kemuliaan Dibata)

Arah si enda tentuna nggo me jadi sada gambaran uga kin situhunna posisi gereja enda, banci si bahan tapina alu njaga kebadiaan Rumah Pertoton enda.

Emakana uga carana kita mpelimbarui kegeluhen ersembahta man Dibata :

1.      Uga kita ernin kubas dirinta ibas kita erkiniteken bagepe caranta ersembah man Dibata ibas kai si biasa ibahan kita, payo ntah lang.

Sipeduaken banci siidah ibas bahan pengogennta ibas :

-          2 Kronika 35 : 20-26

Tentuna sieteh kitab 2 Kronika enda eme kitab lanjutan 1 tawarikh bagepe kita raja-raja sinurikenca perdalanen bangsa Israel sanga ipimpin raja.

Khususna ibas bahannta enda, kita ngerana erkitekan raja Josia. Ise kin raja Josia enda.

Raja Yosia eme raja Yehuda, ia  anak Raja Amon. Sejarah cidahken raja Josia eme raja si ngelakoken si mehuli i lebe-lebe Dibata eme :

1.      Tadingkenna kinitekenna si adi guna nembah man Dibata

2.      Mpekenana Rumah Pertoton

3.      Pegeluhna mulihi peringeten paskah man bangsa Yehuda

Tentuna hal si luar biasa, tapi ibas si e kerina raja Josia ndabuh erkiteken sikapna man kalak sideban. Hal si enda banci si nin ibas bahan pengogennta enda, engkai ?

Perban ia ngolangisa maksud raja mesir eme Neko guna erperang ras karkemis, hal si enda tentuna kurang pas, erkiteken adi sini bahannta enda, kai si lakoken raja mesir enda eme perentah Dibata janah si iserangna enda labo raja Josia tapi karkemis si adi siidah ibas peta eme deher lau eprat jadi tentuna raja mesir enda la banci lang mentas arah tanah kalak Yehuda.

Emakana rikutken bahan enda sipeduaken si pentingna eme uga kita mpekena lebe dirinta ibas ersembah man Dibata ula lebe si urusi kalak. Si enda maun-maun erbahanca kita ndabuh kubas kesombongan rohani.

-          Aplikasi

Arah 2 bahan enda situhunna mpersingeti mulihi man kita kerina perpulungen, aminna pe nggo me kita ngelakoken reformasi gereja ibas 500 tahun si lewat tapi e la banci ngadi bage saja, erkiteken kita harus tetap mereformasi gerejanta ibas kegeluhen si gundari erkiteken la banci ipungkiri pasti ibas perdalanen gerejanta melala denga penyimpangan-penyimpangan si tentuna terjadi erkiteken biak manusia si la erbias-bias, emakana ibas minggu reformasi enda marilah si periksa dirinta bagepe gerejanta nggo me ia erdalan bagi kai arusna gelah tuhu-tuhu kegeluhen ras gerejanta enda guna ersembah man Dibata saja.