BIMBINGEN KHOTBAH 15 OKTOBER 2017

BIMBINGEN KHOTBAH 15 OKTOBER 2017

MINGGU MORIA GBKP

THEMA:NANDE SI ERKINITEKEN

Invocatio : Kejadin 17 : 16

Ogen : Rut 4 : 13-22

Khotbah : Matius 15 : 21-28

Pdt. Maria E br Sitepu 

-          Pengantar

Minggu enda kita bengket kubas minggu moria si tentuna iarapken ibas minggu enda, moria ngasup guna memahami tugas ras panggilanna selaku sekalak moria, nande, ndehara ibas kegeluhenna.

Sedekah enda adi siperdiateken melala moria ntah pe pernanden si memahami peningkatan ntah pe kemajun perdalanen jabu tergantung uga ia ngasup guna memanage ras mengatur keuangan jabu bagepe pendidikan man anak.

Arah si enda enterem erpengarapen jabuna banci jadi jabu si terpenalem ibas kai pe. Tapi kinata bas kegeluhen paksa gundari enda, aminna pe melala cara nggo ibahan pernanden guna datken sura-surana enda nandangi jabuna tapi kepeken e la terdalanken. Melala denga siidah jabu si la erdalan bagi kai seharusna aminna pe nggo me iaturkenna kerinana.

Ibas minggu enda, kinata enda me si ate iidah janah idarami kai kin situhunna si lepak ibas pedalanken morianta enda, gelah arah si enda banci moria ntah pe pernanden datken kemalemen ate subuk ibas jabuna bagepe man dirina jine.

Ibas bahan pengogennta si pemena, si ibuat ibas

-          Penjelasan teks

1. Rut 4 : 13-22

Nuriken happy ending ntah akhir bahagia kegeluhen Rut, engkai ? mari siperdiateken kitab rut enda kerinana.

1.      Ruth itadingken mate dilakina

Tentu enda sada hal si sangat menyakitkan nandangi sekalak diberu si erjabu.

2.      Ruth ngikutken bibina mulih ku kuta si metuana

Hal si enda pe tentuna pertaruhan si luar biasa ibas kegeluhen ruth, erkiteken sieteh adi sekalak diberu itadingken mate dilakina ibas paksa si enda banci ia mulih kukutana, tapi ruth memilih guna ngikutken si metuana erkiteken keleng atena

3.      Ruth erdahin i juma

Adi sioge kepeken pilihan ruth enda labo maba keriahen ukur tang-tangna man bana, erkiteken seh ia kukuta si metuana labo ntabeh iakapna tapi harus ia erdahin guna datken pangan man bana ras si metuana

4.      Ruth lalit pupusna arah dilakina si pemena

Siidah ibas Ruth 1, kurang lebih 10 tahun ia erjabu ras mahlon tapi la datkenna pupus, tentuna enda jadi sada persoalan man Ruth

Tapi siidah ibas bagin pengogennta kerina ketutusen ruth enda datken ulih si luar biasa :

1.      Erjabu ia ras boas

Ibas Ruth 2:1, ituriken boas eme kalak bayak janah kerina kalak mehangke man bana, hal si enda tentuna jadi sada kesangapan man Ruth, si nggo datken melala perbeben ibas pilihanna guna ngikutken Naomi

2.      Datken sekalak anak dilaki

Tentuna enda me sura-sura kalak si erjabu datken pupus, arah si enda tentuna ertambah-tambah keriahen si igejapken Ruth bagepe Naomi ibas paksa si enda.

Emakana adi siidah ka bagin pengogennta si peduaken ibas

2. Matius 15 : 21-28

Bagin enda nuriken cerita sekalak diberu kanaan dahi Tuhan Yesus erkiteken anakna iseluki setan (sakit) janah mekelek kal.

Lit 2 tokoh harus siperdiateken jenda,

1.      Yesus

Kai silakoken Yesus nandangi diberu kalak kanaan enda

·         La aloina pemindon diberu kalak kanaan enda

Ibas piga-piga literature ngatakenca, lit beda la ngaloi ras la ibegina. Enda harus sipahami kita ibas kita mindo ntah ngerana ras Dibata

·         Tempa-tempa itolak Yesus pemindon diberu kanaan ndai (ayat 24)

·         Tempa-tempa itolak Yesus alu cara si agak keras (ayat 26)

2.      Diberu Kanaan

Kai silakoken Diberu kanaan ndai :

·         Reh ia ndahi Tuhan Yesus erkiteken sakit anakna

Harus siinget kalak kanaan e bangsa kafir jadi keberanian diberu kalak kanaan enda tuhu luar biasa

·         La ia putus asa mindo man Dibata

Siidah uga cara Yesus ngerana man diberu kanaan enda tapi la pernah surut diberu kanaan enda

·         Peterukna bana

Adi siidah ayat 26 e cukup keras tapi uga sikap diberu kanaan enda peterukna bana i lebe-lebe Yesus

Erkiteken si eme maka banci malem anak diberu kanaan ndai.

-          Aplikasi

Ngerana erkiteken kemajun ntah pe peningkatan ibas jabu tuhu kita la banci lepas arah pendidikan bagepe ekonomi, tapi situhunna arah 2 bahan pengogennta enda iajari kita kepeken kiniteken enda penting kal ibas kegeluhen jabu gelah jabu enda banci jabu si terpenalem.

Ruth ras diberu kanaan cidahken si e kerina, uga ketutusen ibas kiniseranna maba kemalemen ate dungna. Siidah uga ia tetap paguh ibas kinitekenna aminna pe melala perbeben sir eh erkiteken pemindonna enda.

Emakana gundari man kita moria, salah sada hal si perlu si inget nggo me kita jadi nande ntah pe moria si tuhu-tuhu, nande si labo terjeng keleng atena ngenca man jabuna tapi nande si tuhu-tuhu erkiniteken man Dibata, gelah arah si enda jabunta pe banci nggejapken perkuah ate Dibata.

Selamat ulang tahun man moria, tetaplah jadi moria si tetap erpengendes man Dibata janah jadi moria si mereken kemalemen ate man jabu bagepe sekelewetna.