BIMBINGEN MAMRE Tgl 29 Oktober - 04 November 2017

BIMBINGEN MAMRE Tgl 29 Oktober - 04 November 2017

Thema:MAMRE RAS PEMERINTAH

Ogen :Roma 13 : 1-7

Pdt.Maria E br Sitepu

-          Penjelasen Teks

Kitab roma eme kitab si paling melala ngerana masalah teologi bagepe kitab ntah pe surat si gedangna si itulis rasul Paulus nandangi perpulungen, engkai ?

Perban si eteh salah sada maksud rasul Paulus guna nulisken surat enda eme nuriken kais i nggo sedekah enda turikenna ibas ia erberita kurang lebih dua puluh tahunen.

Tentu hal si enda berkaitan ka ras masalah si lit ibas perpulungen roma si ibas paksa si enda melala kalak si mutar baliken pengajaran Yesus si ituriken Rasul Paulus man perpulungen i kota Roma.

Selain masalah si e, kitab roma enda itulis rasul Paulus guna njawabsa persoalen si lit ibas perpulungen roma ibas paksa si e si notabene lit kalak Yahudi ras lit kalak non Yahudi.

Bagin pengogennta enda pe nuriken uga situhunna sikap perpulungen roma nandangi pemerintah si notabene eme pemerintah romawi labo pemerintahan kalak Yahudi.

Adi siidah ibas bagin pemena khususna ayat 1, ituriken rasul Paulus man perpulungen roma gelah patuh man pemerintah, erkiteken adi siidah sejarah ibas paksa si e pemerintah roma dalankenca program si igelari Tax Romano si maba keteraturen man kerina rakyatna. Hal si enda si inin rasul Paulus sebagai bentuk perpanjangan tangan Dibata man perpulungen roma, aminna pe labo kalak Yahudi tapi pemerintah romawi nggo dalanken salah sada maksud Dibata ibas keterpilihenna guna mensejahterakan masyarakat Roma.

Emakana iarapken rasul Paulus gelah perpulungen roma :

1.      La ngelawan nandangi pemerintah

2.      Ngelakoken perbahanen si mehuli

3.      Patuh man pemerintah

4.      Nggalari pajak

5.      Hamatilah ia

6.      Pehagalah ia

Hal si enda me si arus ilakoken perpulungen roma ibas paksa si e nandangi pemerintah romawi.

Tapi adi kita ngerana masalah si gundari tentu melala siidah pemerintah la bagi arusna, emakana penungkunenna man kita patut denga lah si lakoken 6 hal si datas ndai man pemerintahta adi bage kin perbahanenna.

Bagin enda situhunna nggo me cukup tangkas nuriken masalah si e aminna pe la secara eksplist ituriken. Jelas kal ikataken rasul Paulus ibas ayat 1 pemerintah siitetapken Dibata erkiteken pemerintah e dalanken si ngena ate Dibata, emakana adi lit pemerintah e la dalanken bagi kais i sura-suraken Dibata ia nggo kehilangan legitimasi arah Dibata.  

-          Aplikasi

Emakana ibas minggu enda ipersingeti man mamre gelah tetap dalanken 2 tugas ras tanggung jawabna nandangi pemerintah :

1. Teman sekerja
2. Menjaga dan mengontrol pemerintah gelah kerina sidalankenna guna kemuliaan Dibata ras kiniulin kerina jelma.