BIMBINGEN PJJ TGL 01-07 OKTOBER 2017

BIMBINGEN PJJ TGL 01-07 OKTOBER 2017

THEMA:KEMALEMEN ATE ORANG TUA

OGEN : Masmur 37 : 23 - 26

Pdt.Maria E  br Sitepu

-      Penjelasen Teks

Adi siidah bahan pengogennta ibas paksa enda eme masmur 37 menaken bas ayat 1 nari, emakana si dat, Raja Daud nulisa masmur enda guna jadi kata persinget ntah kata ajar nandangi kalak Israel uga ngatasisa ketidak adilan si ibas paksa si e terjadi i tengah-tengah kegeluhenna.

Hal si enda tangkas kal ibas ayat 1 ija bahan enda ibenaken alu kata ula atendu nembeh ntah ula mencimberu man kalak si erbahan jahat. Tentuna adi siidah kinata kegeluhennta si enda si rusur terjadi ibas kita kalak si erkiniteken uga kita maun-maun cian ras cimberu ras kalak si erbahan jahat erkiteken ia erbahan jahat tapi kegeluhenna sangap kal, kai pe banci idatkenna, tapi kita si tetap dalanken pedah Dibata kegeluhennta enda la bagi sura-suranta.

Emakana ibas bahan pengogennta enda , siidah uga Daud mpegegehi kalak Israel ibas paksa si enda nggo erdua ukur erkiteken situasi si terjadi,

Ibas ayat 23

Ikawali dingen itegu-tegu, inget dalanken pedah Dibata ntah pe ngikutken kata Dibata labo ertina kebayaken, kesuksesan, pangkat ras sidebanna, tapi janji Dibata kam ras kerina isi Jabunta ikawali dingen itegu-teguNa. Tapi tetap harus sipahami bentuk pengkawali Dibata enda tentuna alu mendidik bagi siidah ayat 24, uga Dibata cidahken kepeken bangsaNa banci datken kiniseran  (la mekelek) tapi pengarak-ngarakNa tetap megegeh

Emakana

Ibas ayat25- 26

Jadi kesaksin arah Daud uga sedekah enda pengalamenna nandangi kalak si tetap ngikutken pedah Dibata.Tuhan.kalak sibujur la pernah itadingken Dibata,janah enda iidah permazmur arah siidahna mulai ia kitik nari asa metua

Secara terkhusus adi siidah ayat 26 bagin siterakhir uga adi kita ngikutken pedah Dibata e anak-anak mereken kemalemen ate emaka tadingken sijahat.

-      Aplikasi

Tentuna ibas kerina orang tua ras kita kerina kemalemen eme jadi sada tujunnta geluh, terkhusus man orang tua pastina ngarapken anak si banci mereken kemalemen man banta. Janah hal si enda maun-maun jadi perayaken orang tua arah pendidikan, keleng ate si berekenna man anak, tapi siidah ibas bahan pengogennta enda, kepeken labo terjeng si e saja orang tua ituntut guna rembak ras Dibata erkiteken arah enda pe banci orang tua datken kemalemen si reh na ibas Dibata nari. Emakana ibas bahan pjjnta minggu enda, ipersingeti kita kerina gelah tetap nggit ngikutken pedah Dibata ibas situasi kegeluhen si maun-maun ngajuk kita ngelakoken si la ngena ate Dibata gelah arah si enda pengarak-ngarak Dibata tetap lit ibas kita janah sura-suranta nandangi kegeluhen bagepe jabunta banci tersehi erkiteken pemasun-masun ibas Dibata nari.