BIMBINGEN MORIA Tgl 29 Oktober-04 November 2017

BIMBINGEN MORIA Tgl 29 Oktober-04 November 2017

Thema:TERPENALEM IBAS ENGKELENGI

Oen Pilipi 2 : 1-5

Pdt. Maria E br Sitepu

-          Penjelasen Teks

Kitab Pilipi eme kitab si itulis Rasul Paulus ras piga-piga temanna nandangi perpulungen Pilipi. Kitab ntah surat enda ertujun guna :

1.      Pengataken bujur rasul Paulus erkiteken penampat si ibereken perpulunge Pilipi man bana (bnd Pilipi 4 : 14-19)

2.      Nurikenca man perpulungen Pilipi kai situhunna maksud ras sura-sura Dibata ibas kejadin si sangana nderpa rasul Paulus (Ipenjara)

3.      Ngajuk man perpulungen Pilipi gelah nambahi ntah meningkatkan kiniersadan sapih-sapih perpulungen

Emakana arah enda sieteh kepeken kitab Pilipi enda labo itulis Rasul Paulus guna ngatasisa masalah si lit i tengah-tengah perpulungen bagi surat-suratna sideban tapi banci kataken surat enda eme surat tedeh ate Rasul Paulus man perpulungen i Pilipi.

Adi siidah tujun sipeteluken ibas surat enda, emakana sieteh kai situhunna maksud rasul Paulus nulisken bahan pengogennta ibas wari sisendah enda eme gelah Kristus saja si tetap jadi usihen ibas perdalanen perpulungen Pilipi, perban adi siidah bahannta enda keleng ate Kristus me si :

1.      Mpegegehi

2.      Ngapuli

Tapi tentuna alu sikap ras perbahanen si tetap ngerambeken diri ras Dibata bagepe tetap si keleng-kelengen sapih-sapih perpulungen.

Janah hal si enda banci jadi adi kita tetap mentingken kepentingen kalak si enterem asangken kepentingen dirinta jine.

-          Aplikasi

Ibas minggu enda moria iajuk guna banci terpenalem ibas engkelengi. Kelengi situhuna hal si la mesera guna dalankenca ibas kegeluhen enda, tapi masalah rusur si banci jadi kalak engkelengi kalak sideban gelah ia pe ikelengi, enda me salah sada erti ntah pe pemahaman ibas engkelengi kalak, kelengi kalak bagi siniajarken Yesus eme kelengi si la nuntut balas janah la erdobahen man ise pe, emakana moria la banci lang selaku kalak si erkiniteken man Yesus harus ngasup guna ngelakoken si e kerina, khususna ibas minggu enda uga moria ngasup ernin masalah teman eme masalahna ka, gelah banci iberekenna solusi ntah pe penampat man temanna.