BIMBINGEN PERMATA Tgl 01-07 Oktober 2017

BIMBINGEN PERMATA Tgl 01-07  Oktober 2017

Thema:SURA-SURA DAGING LAWANLAH TETAP

Ogen:Roma 8 : 5 - 8

Pdt. Maria E br Sitepu

-          Penjelasen Teks

Sisadari ibas kegeluhen enda pasti lit 2 sura-sura si lit ibas kegeluhen sekalak jelma eme

1.      Sura-sura daging

2.      Sura-sura roh

Hal si enda me si i petangkas rasul Paulus man perpulungen i roma si terdiri ibas kalak Yahudi si tek bagepe si kalak labo Yahudi si tek,

emakana erkiteken si e perlu lit pemahaman uga kin situhunna adi kita kalak si nggo erkiniteken man Tuhan Yesus

Sipertama lebe kai kin sura-sura daging e ?

Sura-sura daging eme sura-sura erkiteken kemerhatan dirinta ngenca, contohna banci siidah ibas galati 5:19-21, janah adi sura-sura roh eme sura-sura si tentuna erpalasken kesah Si Badia si banci siidah ibas Galati 5: 22-25

Hal si enda me si perlu ipahami perpulungen roma ibas paksa sie erkiteken adi siidah bas bahan pengogennta kalak si ikuasai sura-sura daging mate kap janah ermusuhen ras Dibata bagepe la ngena ate Dibata. Terbalik adi kita ikuasai sura-sura Roh, kegeluhennta enda datken kemalemen erkiteken temani Dibata kita katawari pe aminna pasti hal si enda melala tantangan si banci jadi kubas kegeluhennta.

-          Aplikasi

Permata, anak singuda denga, masa si meriah ibas kegeluhen manusia. Tapi ibas masa enda me rawan sekalak manusia ndabuh kubas dosa, erkiteken tentuna ibas paksa si e melala tawaran-tawaran duniawi si tentuna mpedauh kita arah kinitekennta. Emakana ibas paksa si enda permata iarapken beluh guna memilah-milah kai harus ilakokenna bagepe kai harus ialokenna, gelah tuhu-tuhu labo ia menyesal ibas perdalanen geluhna.

Harus siinget masa depan labo itentukan ibas waktuna tapi masa gundari menentukan kai si banci jadi man anak permatanta emakana iarapken permata ibas kinigudaan ngasup guna cidahken biak Dibata si lit ibas dirina gelah ia banci datken kemalemen ate ibas kegeluhenna. Uga carana :

1. Rusur rembak ras Dibata
2. Ula ndauh arah persekutuan
3. Beluh guna milihi si payo ras lang guna kegeluhenna

Erkiteken kai si terjadi ibas permata tentuna ia si nentukenca kerinana. Emakana permata mulai gundari nari beluhlah milihi kai harus ilakokenna.