BIMBINGEN MORIA TGL 07-14 OKTOBER 2017

BIMBINGEN MORIA TGL 07-14 OKTOBER 2017

THEMA:JADI BENANG PENJARUMI

OGEN:Lukas 1 : 16 - 17

Pdt. Maria E br Sitepu 

-          Penjelasen Teks

Bagin enda nuriken erkiteken berita ketubuhen Johanes Pembaptis, si tubuh arah Zakharia ras elisabet, tetapi perlu sieteh, Zakharia ras elisabet enda nggo ndekah umurna maka datkenna pupus eme Johanes. Cerita enda banci siperdiateken adi sioge menaken ayat 5 nari. Ije teridah uga dekahna Zakharia ras Elisabet nimai pupus. Emaka kenca nggo dekah,

Dibata mereken pupus man Zakharia ras Elisabet guna jadi jawaban ibas pertoton kalak enda duana. Tapi anak enda harus ibahan gelarna Yohanes si ertina Keleng Ate Dibata.

Jadi kerehen anak enda eme tuhu-tuhu Keleng Ate Dibata nandangi Zakharia ras Elisabet bagepe adi siidah ibas ayat 15-17 teridah kepeken kerehen anak enda nggo me lit tanggung jawab si nggo iaturken Dibata man bana eme :

1.      Mbelin ilebe-lebe Dibata

2.      La banci iinemna anggur ntah minuman keras sideban

3.      Ia dem alu Kesah si Badia

4.      Ia erbahanca kalak mulih rembak ras Dibata

5.      Ia pesikap dalan guna kerehen Dibata (Tuhan Yesus)

Tanggung jawab enda tentuna labo tanggung jawab si kitik nandangi Johanes Pembaptis tapi enda tetap jadi tanggung jawabna ibas perdalanen geluhna

-          Aplikasi

Arah bahan enda situhunna jadi persinget man morianta ibas perdalanen geluhna tep-tep wari erkiteken labo lit sad ape jelma reh ku doni enda lalit tanggung jawabna, tentuna kerina lit tanggung jawabna sekalak-sekalak rikutken talenta si ibereken Dibata man banta. Emakana jadi salah sada kesalahan si mbelin adi kita nggo lit ibas doni enda erkiteken perkuah ate Dibata tapi la sidalanken tugas ras tanggung jawab enda.

Ibas bagin pengogennta khususna ayat 16-17, salah sada tugas johanes pembaptis eme maba kalak si papak mulihken ku dalan si nggo iaturken Dibata, janah adi sihubungken ras kegeluhennta gundari bahasa karona eme jadi “Benang penjarumi”.

Hal si enda situhunna nggo me sieteh kerina khususna man morianta tapi kepeken ibas kinatana hal si enda mesera ilakoken engkai ?

1. Biak manusia si acuh tak acuh ntah la mediate

Hal sienda harus ihindari ibas kegeluhen moria erkiteken kita enda kerina eme makhluk social, geluh la banci sisada, kita bergantung ras kalak sideban, emakana biak la mediate enda harus imasapken ibas kegeluhennta.

2. Kade-Kade

Maun-maun erkiteken kade-kade kita la nggit mperdameken sada masalah ibas perpulungen morianta. Padahal adi sisadari kita enda kerina kade-kade ibas Dibata emakana kita kerina ersenina labo lit beda sada ras sidebanna

3. Meriah kin akapna kalak rubat

Lit biak sekalak moria meriah akapna ernin kalak rubat. Hal si enda la pas ibas kiniersadannta sapih-sapih moria. Kerehennta enda tentuna harus maba dame man jelma si enterem

Emakana marilah moria jadi kalak si maba dame aminna banci kita datken persoalen ibas kegeluhennta tapi enda nggo me jadi sada tanggung jawabta.