BIMBINGEN MORIA Tgl 01-07 OKTOBER 2017

BIMBINGEN MORIA Tgl 01-07 OKTOBER 2017

THEMA:BAGI MANUK SI INDUNG-INDUNG

OGEN:Johanes 10 : 7 - 18
Pdt. Maria E br Sitepu

-      Penjelasen Teks

Tentuna sieteh kitab Yohanes enda itulis nandangi kalak Yahudi, emakana adi siperdiateken ibas Yohanes 1:1, uga penulis ngutip kitab kejadin si tentuna ipahami bangsa Yahudi sebagai tulisan Nabi Musa, nabi si ipehaga bangsa Yahudi. Jadi Yohanes nggit mpetandaken Tuhan Yesus alu pemahaman kalak Yahudi.

Ibas bahan pengogennta enda, situhunna perlu sipahami menaken ibas Yohanes 9, erkiteken Yohanes 10 ras 9 enda lit hubungenna, penurin Tuhan Yesus erkiteken permakan situhu-tuhu enda turah erkiteken kejadin sekalak kalak pentang si ipedarat ibas rumah pertoton nari, emakana bagin enda kritikan man kalak ahli-ahli taurat bagepe kalak si ngajarken ajaran sesat si rusur erpengakap ia me permakan si tuhu-tuhu.

Ibas Yohanes 10 Tuhan Yesus nuriken uga kin biak sekalak permakan :

1.                      Mereken keterkelinen

2.                      Mereken kegeluhen situhu-tuhu

3.                      Nggit ngasamken kesahna guna biri-birina

4.                      Jagaina biri-biri e arah serigala (perbeben)

5.                      Itandaina biri-birina

Enda me piga-piga hal si jadi biak sekalak permakan nadangi biri-birina

-      Aplikasi

Arah bahan enda, moria situhunna banci erlajar uga jadi nande si cakap ntah pe nande si luar biasa nandangi anak i tengah-tengah jabu.

1.                      Ngajari anak

Ugapape melalana gundari pendidikan si lit ibas darat nari, nande selaku kalak si leben nandai anakna bagepe ietehna anakna lit tanggung jawabna guna ngajari anak subuk anak enda kitik denga, seh kari anak enda nggo me erjabu.

Hal si enda tentuna perlu ilakoken gelah anak banci mpersiapken dirina guna jadi sekalak diberu si dewasa bagepe jadi sekalak diberu si pagi banci ka jadi sekalak nande, gelah arah enda labo lit kebiaren anak nandangi proses si banci idalanina ibas kegeluhen.

Tapi perlu ipahami ngajari ibas konteks anak lenga erjabu berbeda ras anak si nggo erjabu. Erkiteken adi nggo erjabu tentuna lit batas-batasan si perlu iinget sekalak nande gelah anak pe banci jadi dewasa ras banci erlajar arah pengalamen geluhna

2.                      Ngepkep anak

Ibas kinata kegeluhen biasana anak adi nggo kenca ia erjabu janah nggo lit pupusna la banci terpesirang arah nandena, jenda perang penting sekalak nande guna tetap ngepkep anakna alu pemahaman ngepkep enda guna perkembangan kedewasaan anak labo guna itami-tami. Sedekah enda me siidah melala anak nggo me jadi manja erkiteken pengepkep orang tua. Inget salah sada tugas orang tua tentuna mpersiapken anak gelah ngasup dalani kegeluhenna si ugapanape

Emakana marilah kita moria erlajar arah Tuhan Yesus uga kin jadi permakan si tuhu-tuhu, permakan si tetap mereken kedewasaan, pemakan si tetap ngajarken arti kegeluhen tapi permakan si tetap cidahken keleng atena nandangi biri-birina.