BIMBINGEN KHOTBAH 22 OKTOBER 2017

BIMBINGEN KHOTBAH 22 OKTOBER 2017

MINGGU BUDAYA II

THEMA:PEKENA-KENA TRADISI SI MEHULI

Invocatio : I Korinti 13 : 10

Ogen : Matius 15 : 1 – 9

Khotbah : Jesaya 2 : 1 - 5

-          Pengantar

Adi ngerana kita erkiteken budaya ntah tradisi tentuna selaku kalak karo kita la pernah ndauh arah si e kerina, erkiteken kegeluhennta la terpesirang ibas sie contohna saja bahasa si pake kita khususna gundari, e tentuna produk budayanta selaku kalak karo janah lit ka piga-piga tradisi si tetap si dalanken kita si tentuna la bertentangan ras kinitekennta ras kalak Kristen.

Tapi la banci kita tutup mata ibas dirinta ntah pe keluargannta lit denga ka kita si dalanken budaya ntah tradisi si bertentangan ras kinitekennta man Dibata. Melala contoh si tentuna kita metehsa kerina.

Emakana erkiteken si e ibas minggu enda penting kuakap sipahami lebe kai kin erti budaya itu, adi sedekah enda si eteh budaya eme produk manusia si tentuna ibahan guna mereken kiniulin man si dalankenca, janah erkiteken nggo ilakoken generasi ku generasi emakana budaya enda nggo me jadi tradisi si ilakoken manusia. Tapi perlu siinget kegeluhen selalu berubah, emakana erkiteken ia nggo berubah perlu sipahami tradisi pe perlu ikontekstualisasikan ras kegeluhen si gundari khususna kegeluhennta selaku kalak si erkiniteken, emakana ibas minggu enda, ateta min petangkas man kerina perpulungen gelah reh ngasupna ia guna mpekena-kena tradisi si nggo mungkin idalankenna sedekah enda alu terang Kristus, gelah arah si enda reh mehulina tradisi enda janah la bertentangan ras kinitekennta.

Gambaran si e banci siidah ibas bahan pengogenta sipemena ibas

-          Matius 15 : 1-9

Bagin enda nuriken pandangan Tuhan Yesus erkiteken adat istiadat si lit ibas kegeluhennta, adi siperdiateken bahan enda, percakapan si terjadi ibas Yesus ras guru-guru agama Yahudi erkiteken :

“Ajar-ajar Yesus la burihi tanna sope man ia”

Ibas paksa si e lit tradisi si ngatakenca adi man kita la siburihi tannta emakana banci jadi si ipan kita e najis, tentuna adi sigargari pustakannta khususna padan sindekah memang lit si ngerana erkiteken mburihi (bnd Kel:30:17-21), tapi enda labo alu konteks man, emakana tuhu tradisi si e situhuna tradisi tambahan si ilakoken guru-guru agama Yahudi ibas paksa si e.

Emakana erkiteken si e Tuhan Yesus muat sada contoh ajaran agama ras adat si biasa ilakoken guru-guru agama yahudi man perpulungenna.  (ayat 3-6)

Hal si enda cidahken kepeken sedekah enda guru-guru agama Yahudi memposisikan adat ntah pe tradisi idatas ajaran agama. Hal si enda iakap Tuhan Yesus salah, emakana istilah si ibahan Tuhan Yesus eme Pekulah-kulah erkiteken bas biberna ngenca ipujina Dibata tapi ibas kegeluhenna ukurna ndauh sirang ras Dibata.

Bahan si enda persingeti kita kerina erkiteken :

1.      Selaku kalak si erkiniteken nggo kin geluhta enda palasna tuhu-tuhu kiniteken man Tuhan Yesus ntah kinitekennta enda formalitas saja ?

2.      Ibas adat tradisi si idalanken kita selaku kalak karo, apai si akap si paling utama si ilakoken kita ibas gundari enda, tradisi idatas agama ntah agama idatas tradisi ?

Tentuna 2 penungkunen enda banci jadi persinget man banta ibas kita cidahken dirinta selaku kalak si erkiniteken si tetap nggeluh ibas tradisi karonta.

Emakana adi siidah bahan pengogennta sipeduaken ibas  

-          Yesaya 2 : 1-5

Bagin enda nuriken nubuatan Tuhan arah nabi Jesaya. Ija adi siidah ibas bahannta enda, siidah uga ibas wari sipudi lit keriahen ukur nandangi kalak Israel erkiteken Rumah Dibata pajek mulihken janah iarapken gelah kerina kalak Israel lawes ku rumah pertoton ndai guna nembah man Dibata.

Tapi si e banci jadi adi siperdiatekn ayat 5 adi kalak Israel nggit erdalan arah terang si nggo ibereken Dibata man banta.

Engkai ma bagenda ?

Tentuna kita la banci lepas arah Yesaya 1:21-31, ija bangsa Israel ibas paksa si e nggo nadingken Dibata, nggo ia ngelakoken si la mehuli iadep-adepen Dibata, emakana erkiteken si e ate Tuhan ngukum gelah arah ukumen enda kalak Israel banci sadar mulihken erkiteken tugas ras tanggung jawabna selaku bangsa pilihan Dibata.

-          Aplikasi

Tradisi tentuna nggo jadi sada bagin ibas kegeluhennta tapi perlu siinget tradisi enda harus me iterangi alu terang Kristus, adi temanta sendah ngatakenca “si pekena-kena” ertiana tradisi harus banci cidahken terang Kristus ibas pendalankenna janah tradisi pe la banci ganjangen asangken kinitekennta erkiteken kiniteken enda me si nerangi tradisi gelah tradisi ntah pe budaya enda reh mehulina ibas kegeluhennta.