BIMBINGAN PEKAN KELUARGA WARI SIPEMENA

BIMBINGAN PEKAN KELUARGA WARI SIPEMENA

THEMA:JABU SI DEWASA IBAS KAI-KAI PE

Ogen : Masmur 128 : 1-6

Khotbah : Jakub 1 :1-8
Pdt. Maria E br Sitepu

A.     Penjelasan Teks

-          Jakub 1:1-6

Guna lebe ngangkasa bahannta enda, emaka perlu lebe sinin latar belakang kitab enda. Kitab Jakub eme kitab si itulis Jakub (Jak 1:1) lenga bo jelas isi situhunna Jakub enda, tapi piga-piga ahli ngatakenca Jakub sinulisa surat enda 

eme Jakub senina (saudara tiri) Yesus ras pemimpin Gereja i Yerusalem. Kitab enda itulis nandangi perpulungen kalak Kristen Yahudi si sangana marpar merap i darat kota palestina janah salah sada tujun kitab enda eme mpegegehi perpulungen si sangana ngenanami perbeben erkiteken kinitekenna man Yesus Kristus.

Emakana adi siidah bahan pengogennta khususna ayat sipeduaken nggo me tangkas man banta engkai maka penulis kitab enda ngatakenca “sangap iakapndu adi reh erbage-bage percuban ngkenai kam”. Hal enda tentuna guna mpegegehi perpulungen sisangana ngenanami kiniseran.

Janah adi siidah ka tole bahannta enda, khususna ayat 3-4, icidahken penulis kai kin situhunna fungsi perbeben reh kubas kegeluhennta. Lit 2 hal :

1.       Gelah kita megenggeng

2.       Gelah kita reh dewasana

Tentuna arah si e nggo sieteh perbeben enda reh kubas kegeluhennta labo guna mereken penindasan man banta tapi tuhu-tuhu guna membentuk kita jadi kalak si semakin megegeh ibas erkiniteken man Dibata.

Tapi tentuna melala denga kalak si la ngasup rukur bagi kai si kataken penulis ibas ngalaken perbeben enda, emakana nina penulis ibas ayat 5-6 janah 7-8 eme :

1.       Erpengendes man Dibata

2.       Ula monce-once ibas perbeben si reh kubas kegeluhennta.

-          Masmur 128:1-6

Masmur 128 termasuk salah sada enden-enden  ziarah si iendeken kalak Israel si sangana ziarah ku Yerusalem. Enden-enden tentuna iendeken kalak Israel gelah ia si berkat ku Yerusalem guna ersembah man Dibata datken pasu-pasu man jabuna.

Ibas bahan pengogennta siidah pengarapen kalak Israel man Dibata ibas enden-enden enda eme :

1.       Sanggap ibas kegeluhen khusuna ibas kegeluhen perjabun (ayat 2)

2.       Jabuna bagi min ukurna (ayat 3)

3.       Cawir metua (ayat 6)

Enda me tentuna labo terjeng pengarapen kalak Israel tapi nandangi kita pe si nggeluh gundari e tentu jadi pengarapennta ka. Hal si enda kerina tentuna banci jadi adi kita mereken dirinta ras isi jabunta man Dibata.

B.      Aplikasi

Sendah eme wari siipemena ibas kita menaken pekan keluarga ibas Tahun enda, janah si jadi temanta ibas wari sipemena enda eme “Jabu si dewasa ibas kai-kai Pe”. Si pertama perlu lebe si pahami kai kin situhunna kedewasaan enda. Adi menurut KBBI dewasa eme nggo seh masa akil baliq ntah lanai remaja ras nggo rukur alu dewasa, emakana nina KBBI 2 jenis kalak nggo ikataken dewasa eme :

1.       Alu ernin Umur

2.       Alu ernin carana rukur.

Emakana arah si enda perlu ka kita rukur adi nggo secara umur nggo me banci kita ikataken dewasa tapi secara ukur lang, perlu la kita robah.

Ibas bahan pengogennta ndai khususna ibas Jakub 1:1-8 icidahken salah sada konsep banci kalak ikataken dewasa eme ngasup ia guna ertanggung jawab nandangi dirina khususna ngasup ia ertanggung jawab nandangi kai si nggo iaminkenna guna jadi kinitekenna. Emakana salah sada hal si harus ipahami adi kita nggit dewasa ibas jabunta sekalak-sekalak eme kita ngasup guna ertanggung jawab nandangi tugasta ibas jabu subuk sebagai bapak, nande bagepe anak, gelah arah si enda kai si ikatakan pemasmur ibas masmur 128 banci jadi sikerajangennta ibas jabunnta sekalak-sekalak. Emakana marilah ibas wari sipemena enda si nin jabunnta sekalak-sekalak tuhu kin kita nggo ertanggung jawab ibas kerina dampar kegeluhen khususna ibas jabunta? Adi lang ibas minggu enda marilah siiikuti pekan keluargannta gelah reh tangkasna man banta kai kin bentuk kedewasaan ibas kerina dampar kegeluhennta enda.