BIMBINGAN PEKAN KELUARGA WARI SIPEDUAKEN

BIMBINGAN PEKAN KELUARGA WARI SIPEDUAKEN

THEMA:DEWASA IBAS KINITEKEN

Ogen : Kejadin7 : 1-5

Khotbah : Epesus4 :13-16

Pdt. Maria E br Sitepu

A.     Penjelasan Teks

-          Kejadin 7:1-5

Bagin pengogennta ibas paksa enda me salah sada turi-turin erkiteken Nuah sekalak nabi si ipilih Dibata ras kerina jabu guna iselamatken ibas banjir si mbelin. Adi siidah sope bahan pengogennta enda khususna ibas kejadin 6:1-8

, turiken penulis kitab kejadin enda, uga manusia nggo ngelakoken perbahanen si jahat ntah perbahanen si la ngena ate Dibata, emakana erkiteken si e lit sura-sura Dibata guna engkernepken kerina manusia alu banjir si mbelin, tapi ibas kerina manusia enda, Nuah ngena ate Tuhan, emakana ate Tuhan  Nuah ras isi jabuna iselamatkenna arah banjir si mbelin enda. Emakana ibas kejadin 6:9-22. Icidahken uga Tuhan mindo man musa gelah erbahan sada kapal guna ia ras isi jabuna. Adi siukuri make logika tentuna hal si enda eme hal si mustahil, engkai? Perban :

1.       Kapal si ipindo Dibata guna ibahan Nuah seh kal galangna, emakana tentuna perlu tenaga guna erbahanca si e

2.       Adi siidah piga-piga film documentary erkiteken bahan enda, siidah Nuah enda tading ibas dataran tinggi emakana la mungkin banci jadi bagi kai si ikataken Tuhan man bana

Tapi aminna pe bage janah tentuna melala pasti cakap kalak erkiteken kai si ibahan Nuah, Nuah tetap ngelakoken kai si ikatakan Dibata.

Tapi labo terjeng je saja, adi siidah ibas bahan pengogennta uga Tuhan pe mindo man Nuah gelah pepulungna perik ras rubia-rubia ibas ayat 2-3, hal si enda tentuna labo hal si menukah guna ilakoken erkiteken adi gelarna pepulung rubia ras perik, lenga bo bagi gundari tading make siding ntah make senjata, adi mbarenda kuakap latihan asangken gundari tapi ibas ayat 5 kerina ilakoken Nuah.

-          Epesus 4:13-16

Epesus eme salah sada surat ntah pe kitab si itulis Rasul Paulus si tentuna itujuken man perpulungen epesus, tapi bagisi nggo ieteh kita kerina surat Epesus enda la bagi surat-surat si deban si itulis Rasul Paulus guna njawab perbeben ntah pe persoalan si sangana turah ibas perpulungen tapi surat epesus enda itulis Rasul Paulus gelah perpulungen epesus tetap bertumbuh ibas kiniteken, keleng ate ras kepentaren si rehna ibas Dibata nari.

Emakana adi siidah bahan pengogennta ibas Epesus enda khususna adi sioge menaken ayat 1 nari, teridah uga pengarapen Rasul Paulus man perpulungen Epesus tetap njaga kiniersadanna sapih-sapih ia alu ngelakoken si mehuli (ayat 2-4) janah si enda kerina ilakoken kita erkiteken kita kerina seri tujunnta guna mpermuliaken Dibata si nggo mate ibas kayu persilang ras nggo mereken talenta ntah pe kebeluhen man banta.

Emakana adi nggo silakoken kerina si e, seh la kita ku kedewasaan kiniteken si iidah ibas bahan pengogennta ayat 13-16, eme :

1.       Lanai kita banci iombang-ambingken kalak (ayat 14)

2.       Nuriken kata situhu-tuhu (ayat 15)

3.       Kiniersadan (ayat 16)

B.      Aplikasi

Ngerana erkiteken temanta sendah eme “Dewasa Ibas Kiniteken” situhuna mesera ka darami indicator guna ernin sekalak si nggo dewasa kinitekenna, tapi arah 2 bahannta enda siidah uga kin kalak si nggo dewasa Kinitekenna :

1.       Arah bahannta si pemena uga sekalak Nuah, aminna pe kai si ipindoken Tuhan man bana la masuk akal ntah pe la terterima logika, tetap ilakokenna, janah labo tentuna sitik cakap si la mehuli si ialokenna erkiteken iikutken perentah Dibata.

Ibas kegeluhennta pe bage, melala hal si mungkin siakap la terterima kita guna idalanken ibas kegeluhennta khususna adi sihubungken arah kinitekennta, tapi enda ia salah sada indicator kedewasan kalak erkiniteken eme kepercayaan nandangi kinitekenna emakana arah si enda banci siukuri dirinta nggo me kita dewasa erkiniteken.

2.       Arah bahannta epesus cidahken uga manfaat ntah pe kiniulin si idatken kita adi kita nggo dewasa secara kiniteken. Tentuna labo situhunna hal si menukah, tapi siidah uga pasu-pasu Tuhan si ibereken man kalak si nggo dewasa kinitekenna.

Emakana marilah si mulai gundari nari nyiksiki kinitekennta sedekah enda nggo me ia dewasa ntah lenga bo ntah anak-anak denga.