BIMBINGAN PEKAN KELUARGA WARI SIPEEMPATKEN

BIMBINGAN PEKAN KELUARGA WARI SIPEEMPATKEN

THEMA:DEWASA ERSANGKEP NGGELUH

Ogen :Matius1 : 1-17

Khotbah :Kejadin50 :15-21

Pdt. Maria E br Sitepu

A.     PenjelasanTeks

-          Matius 1:1-17

Matius eme kitab si pertama ibas kitab injil si lit ibas padan simbaru, engkai ? 

lit 2 alasan si biasana ituriken kalak erkiteken si e, eme :

1.       Kitab Matius ngenca si itulis make bahasa Ibrani si debanna alu bahasa Yunani

2.       Kitab Matius me si nurikenca Terombo Tuhan Yesus alu lengkap

Hal si peduaken enda me sijadi bahan pengogennta ibas paksa si enda, tapi sope kita terbagesen ernin bahannta enda, perlu lebe si pahami Kitab Matius enda latar belakang ras tujun.

Adi ngerana kitab Injil kerina menggambarkan sosok Yesus agak berbeda contohna Lukas menekankan Yesus sebagai manusia, emakana ibas kitab MatiusYesus itekankan sebagai raja, hal si enda tentu perlu erkiteken tujun kitab enda eme man Kalak Yahudi.

Emakana nggo me tangkas engkai maka perlu kitab Matius enda ibas benana nuriken terombo Tuhan Yesus, gelah KalakYahudi metehsa Yesus eme Raja siipadanken man bana.Kenca si e adi si idah bahannta enda, lit piga hal si menarik :

1.       Lit gelar Diberu

Hal enda tentuna menarik erkiteken ibas paksa si e jaman patriarchal ija hal sekalak diberu la iperdiateken enda ncidahken kerehen Tuhan Yesus menembus kebiasaan pengkotak-kotakan dilaki ras diberu

2.       Kalak Non Yahudi (Rut)

Engkai ? gelah ketubuhen Tuhan Yesus enda labo man sada bangsa saja tapi man kerina bangsa

3.       Kalak Jahat (Yehuda, amon ras sidebanna)

Ertina ketubuhen Tuhan Yesus enda guna kerina jelma subuk si mehuli ras si la mehuli. Kejadin 50:15-21

Bagin enda nuriken turin - turin Jusup ras senina kerina si nggo si eteh uga perbahanen senina Jusup man bana, uga Jusup idayaken ras ate i bunuh seh ia jadi kalak si terpandang i mesir. Bahannta enda adi si pegermetken menarik kal erkiteken :

1.       Uga penyesalan senina Jusup ibas kerina si nggo ibahanna nandangi Jusup (ayat15)

Aminna pe mungkin salah sada hal si erbahanca senina Jusup enda mbiar man Jusup erkiteken bapana nggo mate, tapi hal positif si banci si idah e me kesedaran ibas kesalahan si nggo ibahan senina Jusup enda man Jusup.

2.       Perbahanen Senina Jusup (ayat 18)

Erjimpuh enda salah sada hal silakoken budak nandangi tuanna, emakana gambaran enda cidahken uga luar biasana penyesalan senina Jusup enda.

3.       KedewasaanJusup (ayat 19-21)

Ibas ayat enda, si idah uga kedewasaan Jusup nandang ise ninana si nggo erbahan jahat man bana, tapi la ibalasna alu kejahatan aminna pe adi si idah posisi Jusup ibas paksa si e sangat memungkinkan guna mbalas kai si ibahan senina ndube man bana

B.      Aplikasi

Kalak karo tentuna la banci lepas arah kegeluhen ersangkep nggeluh, hal siendatuhu - tuhu la banci ipesirang arah kegeluhenna, janah si eteh ibas kegeluhen ersangkep nggeluh enda labo kerina bagi sura - suranta emakana 2 bahannta enda ngajarkenca man banta uga  : Uga ersangkep nggeluh enda

Bahannta ibas matius cidahken uga sangkep nggeluh Tuhannta Yesus Kristus labo kalak si mehuli kerinana, tapi arah si e cidahken kepeken karya Tuhan ibas doni enda labo terjeng man kalak si mehuli tapi kerina kalak i pake Tuhan guna dung isi e kerina Sikap kita ibas ersangkep Nggeluh

Jusup cidahken uga kin sikapna nandangi senina si la bagi ukurna ndube, ia sadar labo ia ngukumsa, dahinna ibas doni enda eme mereken kekelengen man kerina jelma. Hal si enda harus si sadari ibas kegeluhenta ras kade - kadennta aminna pe la bagi ukur labo dahinnta mereken hukumen man kalak. Janah perlu ka si inget kesadaran ntah pe penyesalan perlu lit ibas hubungennta enda, gelah arah si enda lebih dewasa kita ibas ersangkep nggeluh.